BANTU bamba byavula bingi pa bumi ne pa lufu. Bamo balanguluka’mba inge muntu wafwa utwajijila kwikala na bumi mu mubiji mukwabo nangwa’mba uya na kwikala ku mpunzha ikwabo. Kabiji bakwabo balanguluka’mba usemwa jikwabo ne kwikala na bumi mu kilengwa kikwabo. Bakwabo bamba’mba lufu yo mpelo ya muntu.

Kampe ne anweba kuji byo mwayukapo pa uno mutwe, kwesakana na ko mwakomejile ne kisho kyenu. Byo kiji kuba’mba bantu bamba byapusana pusana pa kimweka inge muntu wafwa, abya kujipo muntu ye twaketekela wafwainwa kwitubuula mukumbu wa buno bwipuzho bwakatazha bantu nyi?

Pa myaka yavula yapitapo, bantangi ba bupopweshi bafunjisha lufunjisho lwa kuba’mba mweo kechi ufwa ne. Bantu bavula baya mu bupopweshi bwayukanyikwa nabiji bwa Bena Kilishitu, bwa ba Hindu, bwa Bayudea, bwa ba Mozilemu ne bukwabotu baitabila’mba mweo kechi ufwa ne. Bamba kuba’mba muntu inge wafwa, mweo wanji utwajijila kwikala na bumi ku mpunzha ya mipashi. Bantu baya mu bupopweshi bwa ba Budda, baitabila’mba muntu inge wafwa usemekelwa mu kintu kikwabo ne kuya ku mpunzha ikwabo ko atwajijila kwikala bwikalo bwa lusekelo kabiji bwa mutende yo batela’mba Nirvana.

Na mambo a luno lufunjisho, bantu bavula mwaya ntanda baitabila’mba lufu lulengela bantu kuya na kwikala mu kyalo kikwabo. Bantu bavula bamba’mba lufu lwibalengela kwikala na bumi bukwabo kabiji bamba kuba’mba lufu kyo kyaswa muchima wa Lesa. Pano Baibolo waambapo’mba ka pa uno mutwe? Mwane tangai mutwe walondelapo. Musakukumya bingi pa kuyuka mukumbu.