VANTU va kala na visinganieka via ku liseza-seza ku tuala ha muono na ku-tsa. Vamo ve ku singanieka nguavo mu nima ya ku tsa kasi va ka tualelelaho ku yoya, halumo mu cifua ceka ni cihela cikuavo. Vakuavo co nguavo va ka semuka lueka linga va ka kale na muono ukuavo. Kaha kua kala vamo ve ku singanieka nguavo ku-tsa ca pua lika ku hua ca viose.

Halumo nenu mua kala na visinganieka vienu ku tuala ha cimpande eci, ku liya na cisemua ni cihela ci mua kolela. Mu ku linga vantu ve ku handeka via vingi ku tuala ha cimpande caco, vuno kua kala mpundu muntu ni cihela ku tu hasa ku uana vikumbululo via cili na via vusunga ku cihula ca ku kaluua ngeci ni?

Vakuluntu va malombelo ve ku longesa vantu nguavo muvila lika ue ku tsa vunoni muono kuahi. Vakua malombelo a engi​—ngeci mua Vakua Kilistu, vaHindu, vaYundeya, vaMusulumanu, na vakuavo​—va tsiliela nguavo muntu ua kala na cimbembesi ka ce ku tsa. Kaha nguavo ce ku tualelelaho ku yoyela muilu mu nima ya ku tsa ca muntu. VaBuda co va tsiliela nguavo nkala muntu ue ku semuka vintsimbu via vingi cikuma. Kaha mu nima yaco, imo ndzili ya kala mu kati keni, ye ku heta ha cifua ca ku lembama, ci ve ku sana nguavo Nirvana.

Omo lia vilongesa viaco evi, cingi ca vantu mu mavu ose va na tsiliela honi ngecize ku-tsa ce ku sokolola lipito lia ku ka kala mu cihela ceka. Ngeci mukemuo, vantu vamo ve ku singanieka nguavo ku-tsa ca pua mutamba ua seho ya kama mu muono, kaha nguavo ca pua naua mutamba ua cizango ca Njambi. Vunoni vika ya handeka Mbimbiliya ha cimpande eci? Tua mi vundila mu tande cimpande ci na hatako. Halumo vikumbululo viaco vi ka mi komouesa.