AMO nochi maseualmej moiljuiaj sanse tlamantli tlen nemilistli uan mikilistli. Sekij kiijtouaj kema se akajya miki, yauij kanajya uan nopaya itstokej. Sekinok moiljuiaj nojua tlakatisej uan kiampa sampa itstosej. Uan sekinok kiijtouaj kema se akajya miki, nopaya tlami nochi inemilis.

Uelis ta nojkia timoiljuia seyok tlamantli pampa kampa timoskaltik o ipan moreligión ya nopa mitsmachtijkej. Ipan ni tonali maseualmej kineltokaj miak tlamantli. Uajka, ¿nelnelia uelis tijmatisej tlake pano kema se akajya miki?

Ipan miak xiuitl, katli tlayakanaj ipan religiones tlamachtijtokej alma amo kema miki. Ipan miak uejueyi religiones, kej katli tlaneltokaj ipan Cristo, katli itstokej ipan hinduismo, judaísmo uan islam, kiijtouaj maske timikij tijpiaj se alma tlen nojua yoltok uan yaui kampa itstokej mijkatsitsij. Uan budistas kiijtouaj kema se maseuali ya miakpa mijki uan miakpa tlakatki, ayokmo tlaijiyouia uan nama kena nochipa tlauel yolpaktok, inijuantij kiiljuiaj nopa kej nirvana.

Nochi ni tlamantli tlen tlamachtijtokej kichijtok miakej maseualmej ma moiljuikaj moneki timikisej pampa kiampa uelis tiitstotij kanajya. Yeka moiljuiaj tlauel ipati timikisej pampa toTeotsij kiampa kineki ma pano. Maske kiampa moiljuiaj, ¿tlake kiijtoua Biblia? Timitstlaneuij xijpoua nopa seyok tlamachtili. Tlauel mitspaktis tijmatis tlake kiijtoua Biblia.