OYA sibai ba oi fabö’ö-bö’ö mbua wangera-ngera sanandrösa ba wa’auri hegöi fa’amate. So ösa zanguma’ö wa so wa’auri na no aefa mate ira, te ba mboto bö’ö mazui so ba nahia tanö bö’ö. So göi danö bö’ö zanguma’ö, wa ifuli tumbu ira ba khala-khala tanö bö’ö. Tanö bö’önia lawa’ö wa fa’amate andrö afuriata ngawalö hadia ia.

Te so göi nifaduhusiu tödö samösa sanandrösa ba duho da’a, molo’ö famaha’ö i’otarai ba wa ide-ide mazui si to’ölö nifaduhusi tödö ba mbanuau. Börö me oya sibai mbua wangera-ngera sanandrösa ba zalua na no aefa mate, hadia so zi tola mame’e fanema li si tefaudu hegöi nifaduhusi tödö?

Ba zi hauga abad, labe’e wamaha’ö ira sondrönia’ö ba agama sanandrösa ba noso si lö mate-mate. Fefu zolo’ö agama sebua simane niha Keriso, Hindu, agama Yahudi, Dawa, ba tanö bö’önia, faduhu dödöra wa so noso si lö mate-mate, mazui so zauri nasa moroi ba mboto na no aefa mate, ba auri si yawa ba dalu mbanua. Faduhu dödö niha Buddha wa na no hauga kali ifuli tumbu zi samösa niha tola aefa nosonia moroi ba wamakao ba irasoi nifotöi Nirwana (nahia wa’ahono dödö sa’ahonoa).

Börö wamaha’ö-wamaha’ö simane da’ö, ato niha ba zi sagörö ulidanö zi faduhu tödö wa auri niha si mate ba nahia tanö bö’ö. Ato göi danö bö’ö zanguma’ö wa fa’amate no ohitö dödö Lowalangi. Hiza’i, hadia niwa’ö Zura Ni’amoni’ö sanandrösa ba zalua andre? Baso artikel aefa da’a. Te tola manö tokea dödöu ba wanema linia.