TOKANYI lo dikambo dia lɔsɛnɔ ndo nyɔi tekɔ efula ndo ntshikitana. Anto amɔtshi fɔnyaka dia l’ɔkɔngɔ wa nyɔi, vɔ wayotetemala nsɛna, ondo lo woho okina kana lo dihole dikina. Akina fɔnyaka dia vɔ wayonyomotɔ dia tɔsɛna lo eongelo kekina. Koko akina fɔnyaka dia nyɔi komiyaka lɔsɛnɔ.

Mbeyaka monga ko wɛ ekɔ la dietawɔ diayɛ hita lo dikambo sɔ, ndo kɛsɔ nemanɛka la wetshelo wakayalongola kana mbekelo ya lɛnɛ akayotɔ. Lam’ele tokanyi tendana la kɛnɛ katomba l’ɔkɔngɔ wa nyɔi ntshikitana efula, onde ekɔ onto ɔmɔtshi kana dihole dimɔtshi diakokaso nkondja ekadimwelo wa mɛtɛ ndo wakoka mbɛkɛ otema lo dimbola diatshindja anto wɔɔngɔ sɔ?

Aya ntambe efula yetsha ewandji w’ɛtɛmwɛlɔ wetshelo w’ɔnɛ anima w’onto havu. Ambetawudi wa lo ɛtɛmwɛlɔ wa weke suke la tshɛ, mbuta ate Akristo, ase Hindu, ase Juda, waa Mizilma ndo akina mbetawɔka dia anima w’onto havu, mbuta ate vɔ mimɔka lo demba di’onto l’ɔkɔngɔ wa nyɔi ndo tɔsɛnaka l’andja wahɛnama. Ase Buda lo wedi awɔ, mbetawɔka dia oma lo woho wootɔ onto mbala heyama mbuta, wolo kana wolo wa lo yimba wele le onto koka mbokonya lo eongelo k’ɔngɛnɔngɛnɔ kelamɛ Nirvana.

Lo ndjela wetshelo ɛsɔ, anto efula wa l’andja w’otondo wamboyokoma lo mbetawɔ dia nyɔi ndjiholɛka anto lokuke otsha lo lɔsɛnɔ lo andja okina. Le anto efula, nyɔi ekɔ nna di’ohomba lo awui wakomɛ onto lo lɔsɛnɔ ndo vɔ mɛnaka dia nyɔi ekɔ etenyi kɛmɔtshi ka lolango la Nzambi. Ko kakɔna kata Bible lo dikambo sɔ? Lam’alangɛ adia sawo dikina diayela. Okadimwelo awɔ mbeyaka kambiya.