Akalilembo Kacepesha mu CiHebere Kalalenga Twacetekela Ukuti Fyonse Ifyo Lesa Alaya Fikafikilishiwa
Bushe twalicetekela ukuti amalayo ya kwa Lesa yonse yakafikilishiwa? Yesu alicetekele ukuti ifyo Lesa alaya fikafikilishiwa kabili ifyo alesambilisha fyalengele abalekutika kuli ena baba ne citetekelo. Moneni icilangililo alandile mu Lyashi lya pa Lupili, icalembwa pali Mateo 5:18 apatila: “Ndemweba icine cine nati, nangu umuulu ne calo fingapita, tapakonaike akalilembo nelyo akalitoni ke lembo mu Mafunde, kano fye fikasuke fyonse aficitika.”
Akalilembo kacepesha mu filembo fya ciHebere ni י (yod), kabili e kalilembo kabalilapo mu filembo fine ifya mu ciHebere ifimininako ishina lya kwa Lesa, Yehova, ifyo beta ati tetragramatoni. * Bakalemba na baFarise tabalemona ukuti ifyacindeme fye mu Mafunde ya kwa Lesa mashiwi ne filembo ifyalimo, lelo balemona ukuti na “kalitoni ke lembo” akali konse kalicindeme.
Ico Yesu alelandapo ca kuti umuulu ne calo kuti fyapita, lelo nangu fye kantu akanono akalembwa mu Mafunde te kuti kakaane ukufikilishiwa. Na lyo line, Amalembo yalanda ukuti imyulu ne sonde fikatwalilila ukubako umuyayaya. (Amalumbo 78:69) Kanshi aya amashiwi yalola fye mu kuti tapali nangu cimo icalembwa mu Mafunde icishakafikilishiwe.
Bushe Yehova Lesa alibika amano na ku tuntu utunono uto Baibolo yalandapo? Ee. Tontonkanyeni pali ici: Abena Israele balibebele ukuti tabaalingile ukufuna ifupa lya mpaanga ya pa Ca Kucilila. (Ukufuma 12:46) Ukucita ifi kwalemoneka kwati takwacindeme. Na lyo line, bushe balishibe icalengele Lesa abebe ukuti tabaalingile ukufuna ifupa ili lyonse? Nalimo tabaishibe. Nomba Yehova Lesa ena alishibe ukuti ukucita ifi kwalicindeme pantu kwali no kufikilisha ubusesemo bwa kuti ifupa lya kwa Mesia talyali no kufunwa ilyo bamwipeye pa cimuti.—Amalumbo 34:20; Yohane 19:31-33, 36.
Finshi tusambililako ku fyo Yesu alandile? Na ifwe bene tulingile ukucetekela ukuti amalayo ya kwa Yehova Lesa yonse yakafikilishiwa, kumo fye na malayo ayamoneka ayanono. Akalilembo akanono aka mu ciHebere kalalenga twacetekela sana ukuti fyonse ifyo Lesa alaya fikafikilishiwa.
^ para. 3 Akalilembo kacepesha mu filembo fya ciGriki ni iota kabili kalipalana na ka mu ciHebere ka י (yod). Apo Amafunde ya kwa Mose yalembelwe mu ciHebere kabili yalitwalilile ukuba mu ciHebere na mu nshiku sha kwa Yesu, nalimo Yesu alelanda pa kalilembo ka mu ciHebere.
Nalimo Kuti Mwatemwako ne fi
AMASUKO KU MEPUSHO YA MU BAIBOLO
Bushe Umutende pa Calo Ukesa Shani?
Sambilileni ifyo Lesa alaya ukuleta umutende pa calo ukubomfya Ubufumu bwakwe.
BAIBO—AMALEMBO YA CALO CIPYA
Finshi Baibo Yalaya Ukuti e Fikacitika ku Ntanshi?
Kuti mwapapa nga mwabelenga pa fisuma ifyo Baibo yatulaya.
