A ñaki makjainná nga sitjoson Niná ngayeje jmeni xi tso. Je Jesús koankjainle, kʼoa josʼin kitsoya kisitaja kjoamakjainle xi kinrʼoéle. Tobʼelañá, kʼianga kinchja̱yajinle chjota ya jngo sonnindo, jngo choa̱ tsakʼéjna xi faʼaitʼa ya Mateo 5:18, i kitso: “Xi kjoakixi xi xinno, jo saʼnda nga kjoetʼa ngʼajmi kao sonʼnde, nijngojin letra, nijngojin choa̱ xi cha̱ xi tsʼe kjoatéxomabi, saʼnda nga koa̱njngo kjoatéxomabi ngayije”.

Je letra xi ngisasa jchi̱ kji kʼianga én hebreo kui jebi: י (yod), kʼoa kui fitsʼiani je Tetragrámaton, je jaʼaínle Jeobá. * Je chjota skribano kao chjota fariseo nʼio kitsjoale kjoandosin je én kao letra xi faʼaitʼa Kjoatéxomale Niná ninga to i̱nakji je letra.

Je Jesús kʼoakitso nga koa̱n kjoetʼa ngʼajmi kao sonʼnde tikʼoajinni nga tsín kuitjoson je Kjoatéxoma. Kʼoa je Biblia kʼoatso nga tsínkʼia jme xi koa̱nle Sonʼnde kao ngʼajmi (Salmo 78:69). Kʼianga kʼoakitso je Jesús, kui xi kitsonile nga ñaki kuitjoson ngayeje jmeni xi tso Kjoatéxoma.

A tsjoále kjoandosin Jeobá ninga xi toʼi̱natjín. Jaon. Tikjaʼaitsjenla tʼatsʼe jebi: je chjota israelita kʼoatsakʼinle nga nijngojin nindale sixkoa̱ je barré xi tsʼe Sʼuí Paxko (Éxodo 12:46). Tsakui nichxin tosʼa choa kjoa koa̱nná jebi. Tonga a ñaki koanjinle anni nga kʼoatsakʼinnile nga nijngojin nindale sixkoa̱. Tsakui nichxin mai. Tonga Jeobá be nga tjín xi kitsoyanile. Kui kitsoyanile nga nijngojinla nindale Mesías koa̱nxkoa̱ nga ni̱kʼientʼa yá kjoañʼai (Salmo 34:20; Juan 19:31-33, 36).

Je énle Jesús ñaki bʼéjngo tokoán nga ñaki kuitjoson ngayeje jmeni xi tso je Jeobá. Jngo kjoachoya xi nʼio tse tsjoáná je letra hebrea xi ngisasa nʼio jchi̱ kji.