Jemaroñ ke lukkuun lõke bwe aolep kallim̦ur ko an Anij renaaj jejjet im m̦ool? Eokwe, Jijej ear l̦ap an tõmak men in im katak ko an rar kõkajoor tõmak eo an ro rar roñjake e. L̦õmn̦ak kõn waanjoñak eo ear kwal̦o̦ke ilo katak eo an Ioon Tol̦ eo ilo Matu 5:18 (UBS): ‘Toon wõt an lañ im lal̦ pãd, kõkal̦l̦e eo ak m̦õttan jeje eo ediktata ilo Kien ko reban jako, m̦ae iien eo ejem̦l̦o̦k [ak enaaj jejjet] men otemjej.’

Jeje eo ediktata ilo kajin Hibru ej י (yod), im eñin ej jeje eo jinointata iaan jeje ko emãn ilo kajin Hibru (Tetragrammaton) me rej kwal̦o̦k kõn ãt eo eokkwõjarjar etan Anij, Jeova. * (Lale kõmel̦el̦e eo itulal̦.) Ekar jab aorõk wõt ippãn skraib im Parisi naan ko im kajjojo jeje ilo Kien eo an Anij, ak ear bar aorõk ippãer bwe en jejjet wãween aer je jeje ko kajjojo.

Jijej ear ba bwe toon wõt an lañ im lal̦ pãd, kallim̦ur ak mel̦el̦e ko rediktata ilo Kien Moses renaaj jejjet kũtieer. Im Baibõl̦ ej kaalikkar bwe lañ im lal̦ renaaj pãd ñan indeeo. (Sam 78:69, UBS) Innem, naan ko an Jijej rej kaalikkar bwe ãinwõt an naaj lañ im lal̦ pãd ñan indeeo, aolep kallim̦ur ko ak m̦õttan jeje eo ediktata ilo Kien Moses reban likjab ak renaaj jejjet kũtieer.

Jeova ej ke kaorõk kallim̦ur ak mel̦el̦e ko reddik? Aet. L̦õmn̦ak m̦õk kõn men in. Jeova ear jiroñ RiIsrael ro bwe ren jab ruje jabdewõt iaan di ko diin l̦aam̦ eo me rej kõjerbale ilo iien Kwõjkwõj in Kijoone eo. (Exodus 12:46, UBS) Men in emaroñ kar juon mel̦el̦e edik. RiIsrael rein rar ke mel̦el̦e etke rar jab aikuj ruje di ko diin menninmour eo? Bõlen rar jab lukkuun mel̦el̦e. Bõtab, Jeova ear jel̦ã bwe mel̦el̦e in ej juon kanaan kõn Messaia eo bwe rejjãmin ruje di ko diin ilo iien eo renaaj m̦ane, im totoiki ioon al̦al̦ in eñtaan eo.​—Sam 34:20; Jon 19:31-33, 36, UBS.

Innem ta eo naan ko an Jijej rej katakin kõj kake? Kõj bareinwõt jemaroñ lukkuun lõke bwe aolep kallim̦ur ko an Jeova ekoba mel̦el̦e ko reddik renaaj m̦ool im jejjet kũtieer. Alikkar bwe jeje jidikdik in ilo kajin Hibru el̦ap an kõkajoor tõmak eo ad!