Ove una onthumbi yokuti omilao aviho via Huku mavifuisuapo? Jesus ankho una onthumbi yokuti mavifuisuapo. Ovipuka ankho alongesa vana vevitehelela vayumba vali onthumbi mu Huku. Tala ongeleka apopile Melongomona alingile Komphunda, ivasiwa mu Mateus 5:18: “Mokonda ame tyotyili ndyimupopila okuti, eulu nohi vipondola okupwa, mahi petupu ondaka naike Movitumino mailambe, aihafuiswapo aiho.”

Okaletela okatutu mo Hebreu okaka י (yod), okandaka aka okotete mo Tetragrama ine menyina lia Huku, Jeova. * Ovahoneki vovitumino nova Faliseu kuvo onondaka nonoletela Mbovitumino via Huku mbuna esilivilo. Tupu ankho vatala okuti kese ‘ndaka’ ina esilivilo.

Jesus ankho ukahi nokupopia okuti eulu nohi vipondola okuhakalako vali, mahi kutupu Ondaka naike ya Huku ihamafuiswa-po. Mahi Ombimbiliya ipopia okuti eulu nohi kamavihanyuako. (Salmos 78:69) Ngotyo Jesus ankho ukahi nokupopia okuti petupu Ondaka ya Huku naike mayahafuiswapo.

Okuti Jeova Huku wesuka noundaka oututu? Eenga. Soka kuetyi: Ova Isilayeli kohale ankho vapelwe otyitumino tyokuhateye enkhipa nalike liongi lio Pasikwa. (Êxodo 12:46) Ankho otyipuka otyitutu. Okuti ova Isilayeli ankho vetyii omokonda yatyi ankho vahapondola okuteyela enkhipa liongi oyo? Tyafuile ankho kavetyii. Jeova Huku utyii okuti onondaka ombo mbulekesa etyi matyikamoneka na Mesiya. Ankho tyilekesa okuti kamateyua enkhipa nalike putyina amaipaelwa momuti wemone.​—Salmo 34:20; João 19:31-33, 36.

Oityi tulilongesila konondaka mba Jesus? Nonthue tupondola okukala nonthumbi yokuti omilao aviho via Jeova Huku tyotyili mavifuisuapo umwe, aloo umwe omilao omitutu. Onondaka ombu ononthutu mbo Hebreu mbupondola okutulongesa unene!