Хуцау зӕрдӕ цӕмӕй байвардта, етӕ еугурӕйдӕр ке исӕнхӕст уодзӕнцӕ, уобӕл нӕ бон федарӕй ӕууӕндун цӕмӕн ӕй? Йесо уобӕл ӕппундӕр нӕ дузӕрдуг кодта, ӕма цӕбӕл ахур кодта, е адӕни ӕууӕндундзийнадӕ федар кодта. Ӕркӕсӕн, Йесо адӕни хонхбӕл ку ахур кодта, уӕд ци цӕветтонтӕ ӕрхаста, уонӕмӕ. Финст ӕнцӕ Матфеййи 5:18 стихи: «Ӕцӕгӕй уин зӕгъун: арв ӕма зӕнхӕ ку нӕбал уонцӕ, уӕддӕр Закъони тӕккӕ минкийдӕр дамугъа кенӕ дамугъайӕй еу ханхӕ дӕр нӕ фӕгъгъӕудзӕй – еугурӕйдӕр исӕнхӕст уодзӕнцӕ».

Дзиуиттаг алфавити ци дамугъатӕ ес, уонӕй тӕккӕ минкъийдӕр дамугъа ӕй י (йод). Еци дамугъайӕй райдайуй тетраграмматон – дзиуиттаг дамугъатӕй финст Хуцауи ном, Йеговӕ *. Уомӕй уӕлдай ма киунугидӕснитӕ ӕма фарисейтӕ Хуцауи Закъони дзурдтӕ ӕма дамугъатӕй «еу ханхӕ дӕр» хъӕбӕр ӕхсидзгӕбӕл нимадтонцӕ.

Киристе куд загъта, уомӕ гӕсгӕ, арв ӕма зӕнхӕ ку нӕбал уонцӕ, уӕддӕр Хуцауи закъони дзурдтӕй тӕккӕ минкъийдӕр дамугъа дӕр ӕнӕисӕнхӕстуогӕй нӕ байзайдзӕй. Арв ӕма зӕнхӕ ба, Библи куд зӕгъуй, уотемӕй, ӕносмӕ дӕр уодзӕнцӕ (Псалом 78:69). Мадта еци дзурдтӕй бӕрӕг ӕй, Хуцауи закъони алли дзурд дӕр ке исӕнхӕст уй.

Цума Йеговӕ Хуцау листӕг хабӕрттӕ ӕхсидзгӕбӕл нимайуй? Расагъӕс кӕнӕн уӕхӕн цӕветтонбӕл: рагон израилӕгтӕн загъд адтӕй, цӕмӕй Комуадзӕни уӕриккӕн е ’стгутӕй еу дӕр ма басастайуонцӕ (Рацуд 12:46). Ӕвӕдзи, етӕ листӕг хабӕрттӕ адтӕнцӕ. Цума ’й израилӕгтӕ лӕдӕрдтӕнцӕ, уӕриккӕн е ’стгутӕ сӕттун цӕмӕн не ’нгъезуй, уой? Ӕвӕдзи нӕ. Фал ӕй Йеговӕ ба зудта, еци листӕг хабӕрттӕ федӕнмӕ ке амудтонцӕ: Мессийи гъезӕмӕртти гъӕдӕбӕл ку рамардтонцӕ, уӕд ин е ’стгутӕй еу дӕр нӕ басастонцӕ (Псалом 34:20; Иоанни 19:31–33, 36).

Мадта Киристей дзурдтӕй ци ес базонӕн? Махӕн дӕр нӕ бон ӕй федарӕй ӕууӕндун, Йеговӕ Хуцау зӕрдӕ цӕмӕйдӕриддӕр байвардта, етӕ еугурӕйдӕр листӕг хабӕртти уӕнгӕ дӕр ке исӕнхӕст уодзӕнцӕ. Бӕрӕг ӕй, дзиуиттаг минкъий дамугъайӕн дӕр устур хъаурӕ ке ес!