Xana hi nga tiyiseka leswaku switshembiso hinkwaswo swa Xikwembu swi ta hetiseka? Yesu a a tiyiseka hi mhaka yoleyo naswona leswi a swi dyondziseke swi tiyise ripfumelo ra vayingiseri vakwe. Xiya xikombiso lexi a xi nyikeleke eka Dyondzo yakwe ya le Ntshaveni, lexi kumekaka eka Matewu 5:18 leyi nge: “Hikuva ndzi tiyisile ndzi ri eka n’wina, matilo ni misava swi nga hatlisa swi nyamalala ku ri ni ku va nhlanga yin’we leyitsongo eka hinkwato kumbe xipetlu xin’we xi nyamalala eNawini ku nga si endleka swilo hinkwaswo.”

Letere leritsongo ngopfu ra tialfabete ta Xiheveru i י (yod), leri nga letere ro sungula ra Tetragrammaton, ku nga vito ro kwetsima ra Yehovha Xikwembu. * Ku engetela eka marito ni maletere lawa a ma ri eka Nawu wa Xikwembu, vatsari ni Vafarisi a va teka ‘nhlanga yin’wana ni yin’wana leyitsongo’ yi ri ya nkoka swinene.

Yesu a a vula leswaku swi nga koteka leswaku matilo ni misava swi nyamalala hi ku hatlisa ku ri ni ku va vuxokoxoko lebyitsongo bya Nawu byi nga hetiseki. Hambiswiritano, Matsalwa ma hi tiyisekisa leswaku matilo ni misava swi ta tshama hilaha ku nga heriki. (Pisalema 78:69) Marito lawa ya ntikelo ma kombise leswaku a xi kona ni xin’we eka Nawu lexi nga ta tsandzeka ku hetiseka!

Xana Yehovha Xikwembu u byi teka byi ri bya nkoka vuxokoxoko lebyi vonakaka byi nga nyawuli? Ina, u byi teka byi ri bya nkoka. Xiya mhaka leyi: Vaisrayele va khale a va lerisiwe leswaku va nga tshuki va tshova ni rhambu ni rin’we ra xinyimpfana xa Paseka. (Eksoda 12:46) Kumbexana, u nga vona onge a ku ri xileriso lexi nga nyawuriki. Xana a va swi twisisa leswaku hikwalaho ka yini a va nga fanelanga va tshova ni rhambu ni rin’we ra xinyimpfana? Kumbexana a va nga swi twisisi. Kambe, Yehovha Xikwembu a a swi tiva leswaku vuxokoxoko lebyi a ku ri vuprofeta bya leswaku Mesiya a a nga ta tshoviwa ni rhambu ni rin’we loko a dlayiwa emhandzini ya nxaniso.—Pisalema 34:20; Yohane 19:31-33, 36.

Xana marito ya Yesu ma hi dyondzisa yini? Na hina hi nga tiyiseka hi ku helela leswaku switshembiso hinkwaswo swa Yehovha Xikwembu swi ta hetiseka lerova a ku nge sali ni xin’we xa swona. Hakunene letere leri leritsongo ra Xiheveru i xitiyisekiso xa nkoka swinene!