Ha kholwa hi kumbhelela a ku zvontlhe lezvi Nungungulu a zvi tsumbisako zvi ta maheka? Jesu i wa kholwa, niku lezvi a nga gondzisa zvi wa aka kukholwa ka lava va nga muzwa. Ehleketa hi mufananiso lowu a wu nyikileko ka Kanelo yakwe ya le Citsungeni ka Mateu 5:18. Hi kuma lezvi: ‘Hizvinene ndziku ka n’wina: Ku ta kala ku hundza a tilo ni misava, na cima ku nga fuvangi a ndzhatana mun’we kutani xidokho cinwe ca nayo, kala zvontlhe lezvi zvi maheka.’

A letela ga gi tsongwani ka ciHebheru i י (yod), ku nga letela go sangula ka Tetragrama, ku nga vito go basa ga Nungungulu, Jehovha. * Niku ka magezu ni maletela ya Nayo wa Nungungulu, a vatsali va kale ni vaFarisi va wa wona ‘cidokho cin’we’ ca letela na ci hi ni tlhamuselo wa hombe.

Jesu i wa wula ku zvi wa olova ku a tilo ni misava zvi nyamalala a ku hundza ku a magezwana matsongwani ya Nayo ma nga maheki. Kanilezvi a Mitsalo yi hi tiyisa kubaseni lezvaku a tilo ga civiri ni misava ya civiri zvi ta tshama kala kupindzuka. (Lisimu 78:69) Makunu a magezu yakwe ma kombile lezvaku a ku na mhaka ni yin’we ya Nayo yi to kala ku maheka hambu leyi ya yi tsongwani nguvhu.

Xana Jehovha Nungungulu wa chela kota hambu hi zvilo zvi tsongwani zvi wuliwako hi Mhaka yakwe? Ina. Ehleketa hi lezvi: A vaIzrayeli va kale va wa leletelwe ku nga tshovi ne rambu gin’we ga yivhana ya Pasika. (Eksodusi 12:46) Lezvo zvo khwatsi a hi zvilo zva hombe. Va zvi zwisisile a ku hikuyini va nga kala va nga faneli ku tshova marambu? Zvo khwatsi ahihi. Kanilezvi Jehovha i wa zvi tiva lezvaku a mhaka leyo yi wa phrofeta lezvaku Messia i wa nga ta tshoviwa marambu kudaweni kakwe laha ka mhandze. — Lisimu 34:20; Johani 19:31-33, 36.

Makunu a magezu ya Jesu ma hi gondzisa yini? Hinawu hi nga tiyiseka hi kumbhelela lezvaku zvontlhe lezvi Jehovha a zvi tsumbisako zvi ta maheka hi ndzhati ni cidokho. Hi nga wona kutiyiswa hi ku kumako ka letela ga gi tsongwani ga ciHebheru!