Nitukigumya mali ngu emirago ya Yahwe yoona niija kuhikirra? Yesu akaba nakigumya ngu emirago ya Yahwe niija kuhikirra kandi n’ebintu ebiyayegeseze bikombeka okwikiriza kw’abantu abamuhuliirizaga. Tekerezaaho eky’okurorraho ekiyabalizeeho obwakaba ali ha rusozi, omu Matayo 5:18: “Baitu mananukwo nimbagambira nti iguru nensi okuhikya obubirikahwaho, enyuguta emu nobukakuba akaragalika kamu akomu biragiro tikalihwaho, okuhikya byona obubirihiki’ra.”

Akanyuguta akakyakizireyo kuba akataito omu Ruheburaniya nuko י (yod). Akanyuguta kanu nuko karukubanza omu nyuguta ina ez’Oruheburaniya ez’ibara lya Ruhanga, Yahwe. * Kwongereza ha bigambo byonyini hamu n’ekiragiro kya Ruhanga, Abahandiiki hamu n’Abafalisayo batwaraga buli ‘karagalika kuruga omu kiragiro’ kya Ruhanga kuba kakuru muno.

Yesu akaba namanyisa ngu omu kiikaro ky’akagambo akataito akali omu Kiragiro kya Ruhanga kugenda katahikiriziibwe hakire ensi n’iguru bihweho. Baitu kandi, Ebyahandiikirwe nibitwegesa ngu iguru n’ensi tibirihwaho. (Zabuli 78:69) Nahabweki, ebigambo binu bikooleka ngu busaho n’akagambo akataito akali genda katahikiriziibwe omu Kiragiro.

Yahwe Ruhanga afaaho ensonga ezirukuzooka kuba ntaito? Amananu gali ngu, ego. Tekerezaaho kinu: Ruhanga akaragira Abaisareri kutahenda igufa lyona ery’entaama ei bali nibagenda kuhonga ha kiro eky’okuhingurwaho. (Okuruga 12:46) Enu ekazooka kuba nsonga ntaito muno. Notekereza, bakamanya ensonga habwaki bali batasemeriire kuhenda igufa lyona ha ntaama? Nangwa. Baitu, Yahwe Ruhanga akaba akimanyire ngu, ensonga enu entaito yali niija kuhikiriza obunabbi oburukukwata hali Masiya nk’oku busaho igufa lye na limu eryakuhendekere hanyuma y’okuhanikwa ha muti.​—Zabuli 34:20; Yohana 19:31-33, 36.

Ebigambo bya Yesu nibitwegesa ki? Naitwe nitusobora kwesigira kimu byona Yahwe eby’araganiize ngu nibiija kuhikirra otwaliiremu n’emirago erukuzooka kuba ntaito. Kunu kakunihiza okw’amaani kuruga omu kanyuguta akataito ak’Oruheburaniya!