Аллаһ-Таала кими мәләкләр дә ҝөзәҝөрүнмәз варлыглардыр, онлар руһдур, онларын әти вә сүмүјү јохдур. Јахшы мәләкләр ҝөјдә јашајыр вә онларын Аллаһын һүзуруна чыхмаг рүсхәти вар (Лука 24:39; Мәтта 18:10; Јәһја 4:24).

Бәзән мәләкләр јер үзүндә Аллаһын бујруғуну јеринә јетирмәк үчүн инсан ҹилдинә ҝирмиш, тапшырыгларыны јеринә јетирәндән сонра јенидән әввәлки вәзијјәтләринә гајытмышлар (Һакимләр 6:11—23; 13:15—20).

Мәләкләр инсан ҹилдинә ҝирәндә киши ҝөркәминдә ҝөрүнсәләр дә вә Мүгәддәс Китабда киши ҹинсиндә тәсвир олунсалар да, онлар киши вә гадын ҹинсијјәти олмајан варлыглардыр, онларын ҹинсијјәти јохдур. Мәләкләр нә евләнмир, нә төрәмирләр. Бәзи мәләкләрин өлән көрпә вә бөјүкләрин руһлары олдуғуна инананлар да вар. Амма бу фикир Мүгәддәс Китабда тәсдигини тапмыр. Мәләкләри Јеһова Аллаһ јаратдығы үчүн Мүгәддәс Китабда онлар «Аллаһ оғуллары» адланыр (Әјјуб 1:6; Зәбур 148:2, 5).

Мүгәддәс Китабын бир ајәсиндә јазылан нөвбәти сөзләр, «инсанларын вә мәләкләрин дилиндә данышырамса» ҹүмләси ҝөстәрир ки, ҝөзәҝөрүнмәз варлыглар даныша билир вә онларын өз дили вар. Аллаһ кечмишдә Өз бәндәләри илә мәләкләр васитәсилә данышса да, мәләкләрә сәҹдә гылмағы вә онлара дуа етмәји гадаған едиб (1 Коринфлиләрә 13:1; Вәһј 22:8, 9).

Мүгәддәс Китаба әсасән, мәләкләрин сајы он минләрлә он минләрдир. Һәтта, ола билсин, милјардларла мәләк вар * (Дәнјал 7:10; Вәһј 5:11).

Мәләкләр инсандан гат-гат гүдрәтли варлыглардыр вә онларын шүуру бәшәринкиндән алидир. Мүгәддәс Китабда јазыланлардан ҝөрүнүр ки, онлар физики аләмин сүрәт өлчүләрини ашан чох ити сүрәтлә учмаг габилијјәтинә маликдирләр (Зәбур 103:20; Дәнјал 9:20—23).

Үстүн гүдрәтә вә шүура малик олсалар да, мәләкләрин дә билмәдији шејләр вар (Мәтта 24:36; 1 Бутрус 1:12).

Аллаһ мәләкләри јараданда онлара илаһи хүсусијјәтләр вә ирадә азадлығы бәхш едиб. Онларын да бизим кими, јахшы әмәлләрлә шәр әмәлләр арасында сечим етмәк ихтијары вар. Чох тәәссүф ки, бәзи мәләкләр шәр әмәлләри сечиб Јараданларына үсјан етдиләр (Јәһуда 6).