Ol enjel oli spirit olsem God, oli “no gat mit mo bun.” Ol gudfala enjel oli stap long heven wetem God.—Luk 24:39; Matiu 18:10; Jon 4:24.

Samtaem ol enjel oli jenisim bodi blong olgeta i kam bodi blong man, blong save mekem ol wok blong God long wol ya, mo taem oli finisim wok blong olgeta oli jenis bakegen i kam enjel.—Jajes 6:11-23; 13:15-20.

Long Baebol ol enjel oli man, mo taem oli jenis oli man nomo. Be i no gat wan samting we i soem se ol enjel oli man o woman. Oli no mared mo gat ol pikinini. Oli no bon fastaem long wol ya olsem wan bebi, pikinini, o bigman, nao taem oli ded oli jes go long heven olsem wan enjel. Jehova nao i wokem ol enjel, taswe Baebol i kolem olgeta se “ol pikinini blong tru God.”—Job 1:6, NW; Ol Sam 148:2, 5.

Baebol i se i gat “lanwis blong ol man mo blong ol enjel,” hemia i soem se ol enjel oli gat wan lanwis mo oli save toktok. Nating se God i yusum ol enjel blong oli toktok wetem ol man, be hem i no wantem se yumi wosipim ol enjel mo prea long olgeta.—1 Korin 13:1; Revelesen 22:8, 9.

I gat plante taosen enjel we oli plante we plante, maet namba blong olgeta i kasem bilian.—Daniel 7:10; Revelesen 5:11.

Ol enjel oli ‘strong mo oli gat paoa.’ Oli gat moa paoa bitim ol man, mo oli waes moa bitim olgeta. Oli save spid mo oli spid bitim ol narafala samting long wol ya.—Ol Sam 103:20; Daniel 9:20-23.

Nating se oli waes mo oli gat paoa, be i gat sam samting we oli no save.—Matiu 24:36; 1 Pita 1:12.

Ol enjel oli gat ol gudfala fasin mo oli fri tu blong jus. Olsem ol man, oli save jusum blong mekem samting we i gud mo samting we i nogud. Be sore tumas, sam enjel oli jusum blong rebel agensem God.—Jud 6.