SANEYITSO LƐ MLITSƆƆMƆ | ŊWƐIBƆFOI—ANI AMƐYƐ LƐƐLƐŊ? NƆ HEWƆ NI ESA AKƐ OLE
Ŋwɛibɔfoi Ahe Anɔkwa Saji Komɛi
Ani obaasumɔ ni ole ŋwɛibɔfoi ahe anɔkwa saji komɛi—mɛi ni amɛji, bɔ ni fee ni amɛba shihilɛ mli, kɛ nɔ ni amɛfeɔ? Biblia lɛ, ni ji Nyɔŋmɔ Wiemɔ ni ajɛ mumɔŋ aŋma lɛ mli pɛ ji he ni wɔbaanyɛ wɔná hetoo ni ja fe fɛɛ lɛ yɛ. (2 Timoteo 3:16) Mɛni Biblia lɛ wieɔ yɛ sane nɛɛ he?
-
Bɔ ni Nyɔŋmɔ ji Mumɔ lɛ, nakai nɔŋŋ ŋwɛibɔfoi lɛ hu ji mumɔŋ bɔɔ nii ni “bɛ heloo kɛ wui.” No hewɔ lɛ, akɛ hiŋmɛii enaaa amɛ. Ŋwɛibɔfoi anɔkwafoi lɛ ashihilɛhe ji ŋwɛi, ni amɛnyɛɔ amɛkɛ Nyɔŋmɔ sharaa hiɛ kɛ hiɛ.—Luka 24:39; Mateo 18:10; Yohane 4:24.
-
Bei ko ni eho lɛ, ŋwɛibɔfoi tsɔɔ amɛhe gbɔmɛi bei komɛi ni amɛbaa shikpɔŋ lɛ nɔ koni amɛbatsu nitsumɔi ni Nyɔŋmɔ kɛwo amɛdɛŋ lɛ. Kɛ́ amɛtsu amɛtã lɛ, amɛtsakeɔ amɛhe amɛtsɔɔ ŋwɛibɔfoi ekoŋŋ ni amɛyaa ŋwɛi.—Kojolɔi 6:11-23; 13:15-20.
-
Eyɛ mli akɛ kɛ́ Biblia lɛ miiwie ŋwɛibɔfoi ahe lɛ, ewieɔ amɛhe akɛ hii, ni be fɛɛ be ni ŋwɛibɔfoi lɛ baatsake amɛhe amɛtsɔ gbɔmɛi lɛ, amɛtsakeɔ amɛhe akɛ hii moŋ, kɛ̃lɛ abɔɔɔ amɛ akɛ hii loo yei. Amɛboteee gbãla mli, ni amɛfɔɔɔ ŋwɛibɔfoi krokomɛi hu. Kɛfata he lɛ, abɔɔɔ ŋwɛibɔfoi akɛ gbɔmɛi yɛ shikpɔŋ lɛ nɔ akɛ abifabii, gbekɛbii loo onukpai kɛkɛ lɛ sɛɛ mli lɛ amɛtsɔmɔ ŋwɛibɔfoi. Nyɔŋmɔ bɔ amɛ akɛ ŋwɛibɔfoi; enɛ hewɔ ni Biblia lɛ tsɛɔ amɛ akɛ anɔkwa ‘Nyɔŋmɔ lɛ bii’ lɛ.—Hiob 1:6; Lala 148:2, 5.
-
Biblia lɛ wieɔ akɛ ayɛ “gbɔmɛi kɛ ŋwɛibɔfoi awiemɔi,” ni tsɔɔ akɛ mumɔŋ bɔɔ nii ni yɔɔ ŋwɛi lɛ yɛ amɛwiemɔi, ni amɛkɛ amɛhe gbaa sane. Nyɔŋmɔ tsɔ ŋwɛibɔfoi anɔ ekɛ gbɔmɛi wie moŋ, kɛ̃lɛ, Nyɔŋmɔ eŋmɛɛɛ gbɛ akɛ wɔsɔle wɔhã amɛ loo wɔjá amɛ.—1 Korintobii 13:1; Kpojiemɔ 22:8, 9.
-
Ŋwɛibɔfoi akpei nyɔŋmai abɔ toi akpei nyɔŋmai abɔ yɔɔ; amɛyibɔ lɛ baanyɛ ashɛ akpekpei toi akpei abɔ po.—Daniel 7:10; Kpojiemɔ 5:11.
-
Ŋwɛibɔfoi ‘ahe wala’ waa—amɛhe wala kwraa fe adesai—ni amɛnilee nɔ kwɔ kwraa fe adesai anɔ. Ekã shi faŋŋ akɛ kɛ́ atsu amɛ lɛ, amɛhe yɛ oya waa, ni amɛhe yɛ oya bɔ ni adesa ko jwɛŋmɔ nyɛŋ ashɛ he.—Lala 103:20; Daniel 9:20-23.
-
Yɛ bɔ ni ŋwɛibɔfoi yɔɔ hewalɛ, ni amɛle nii lɛ fɛɛ sɛɛ lɛ, husu yɛ amɛnyɛmɔi lɛ ahe, ni nibii komɛi yɛ ni amɛleee.—Mateo 24:36; 1 Petro 1:12.
-
Abɔ ŋwɛibɔfoi akɛ mɛi ni yɔɔ sui kpakpai kɛ heyeli ni amɛkɛhalaa nɔ ni amɛsumɔɔ. No hewɔ lɛ, taakɛ eji yɛ adesai agbɛfaŋ lɛ, amɛ hu amɛbaanyɛ amɛhala akɛ amɛbaafee ekpakpa loo efoŋ. Dɔlɛ sane ji akɛ, ŋwɛibɔfoi komɛi hala akɛ amɛbaatse Nyɔŋmɔ hiɛ atua, ni amɛfee nakai hu.—Yuda 6.
