Wọhọ epanọ Ọghẹnẹ ọ rrọ ẹzi nọ ma rẹ ruẹ hẹ na, ere ọvona ma rẹ ruẹ ikọ-odhiwu hu keme emama ẹzi a rrọ, yọ a wo “uwo gbe igbenwa ha.” Ikọ-odhiwu nọ i yoẹme kẹ Ọghẹnẹ a be rria obọ odhiwu, yọ a rẹ ruẹ Ọghẹnẹ ovao dhe ovao.​—Luk 24:39; Matiu 18:10; Jọn 4:24.

Evaọ okenọ u kpemu, ikọ-odhiwu a jẹ hae romavia kẹ ahwo-akpọ nọ Ọghẹnẹ o te vi ai uwou ziọ obọ otọakpọ obonẹ, yọ a tẹ nya uwou na no, a vẹ wariẹ nwene oma zihe ruọ emama ẹzi.​—Ibruoziẹ 6:​11-23; 13:​15-20.

Dede nọ Ebaibol na o dhesẹ nọ ikọ-odhiwu nọ e romavia kẹ ahwo yọ ezae, oware ovo u dhesẹ hẹ inọ ejọ ezae hayo ejọ eyae. A rẹ rọo hayo yẹ emọ họ. Ofariẹ, ikọ-odhiwu yọ ahwo-akpọ vẹre he, yọ a jọ emọboba hayo ekpako nọ i whu no kẹsena a te kpohọ obọ odhiwu hu. Jihova ọ ma ikọ-odhiwu na, fikiere Ebaibol na o se rai “emọ Ọghẹnẹ.”​—Job 1:6; Olezi 148:​2, 5.

Ebaibol na ọ ta kpahe “ẹrọunu ahwo gbe orọ ikọ-odhiwu,” onọ u dhesẹ nọ ikọ-odhiwu a wo ẹvẹrẹ obọrai gbe oghẹrẹ nọ a rẹ rọ ta ẹme. Dede nọ Ọghẹnẹ ọ rọ ikọ-odhiwu ta ẹme kẹ ahwo-akpọ no, ọ kẹ ahwo-akpọ uvẹ re a gọ ae hayo lẹ se ai vievie he.​—1 Ahwo Kọrint 13:1; Eviavia 22:​8, 9.

Ikọ-odhiwu na a bu te idu ikpe isia idu ikpe buobu, koyehọ a bu te ima idu buobu gbidigbidi. *​—Daniẹl 7:10; Eviavia 5:11.

Ikọ-odhiwu a wo ‘ẹgba’ gaga, yọ a wo ogaga gbe areghẹ vi ahwo-akpọ kpekufiẹ. A rẹ sae rra kpohọ ugbothabọ nọ ohwo-akpọ ọ rẹ sai te he, yọ a rẹ rra vẹrẹ gaga.​—Olezi 103:20; Daniẹl 9:​20-23.

Dede nọ ikọ-odhiwu a wo ogaga gbe areghẹ gaga, a wo ọnyaba, yọ u wo eware jọ nọ a riẹ hẹ.​—Matiu 24:36; 1 Pita 1:12.

U wo oghẹrẹ ugboma nọ Ọghẹnẹ ọ ma kẹ ikọ-odhiwu na, yọ a wo emamọ iruemu buobu, je wo uvẹ nọ a rẹ rọ salọ oware nọ a gwọlọ ru. Fikiere wọhọ ahwo-akpọ, a rẹ sae salọ sọ a re ru oware uwoma hayo uyoma. Rekọ u yoma kẹhẹ inọ ikọ-odhiwu jọ a salọ nọ a re yoẹme kẹ Ọghẹnẹ hẹ.​—Jud 6.