O tondũ Ngai nĩ Veva, o namo alaĩka nĩ syũmbe sya veva itonekaa, na iyĩthĩawa na “nyama na mavĩndĩ.” Alaĩka ala aĩkĩĩku mekalanasya ĩtunĩ na Ngai.—Luka 24:39; Mathayo 18:10; Yoana 4:24.

Ĩvinda ya tene, ve mavinda alaĩka meekĩaa mĩĩ ya andũ nĩ kana meanĩsye wĩa ũla manengetwe nĩ Ngai kũũ nthĩ, na mamina wĩa woo nĩmaumasya mĩĩ ĩsu.—Asili 6:11-23; 13:15-20.

O na kau alaĩka mawetetwe Mbivilianĩ ta aũme na mavinda onthe maumĩlaa ta aũme, vai mũlaĩka o na ũmwe wĩthĩawa na mwĩĩ wa mũndũũme kana wa mũndũ mũka. Alaĩka maitwaanaa na maisyaa. O na ĩngĩ, alaĩka mayaaũmbwa mekalae kũũ nthĩ me twana tũnini kana andũ aima, na ĩtina maikw’a na maithi ĩtunĩ. Alaĩka moombiwe nĩ Yeova na nĩkyo kĩtumi Mbivilia ĩmetĩte “ana ma Ngai.”—Yovu 1:6; Savuli 148:2, 5.

Mbivilia nĩwetete ĩũlũ wa “ithyomo sya andũ na sya alaĩka,” na ndeto isu syonanasya kana syũmbe ila syĩ mĩĩ ya veva syĩ kĩthyomo kĩla itũmĩaa. O na kau Ngai nĩwatũmĩaa alaĩka kũneena na andũ, ndetĩkĩlĩtye andũ mamavoye kana mamathaithe.—1 Akolintho 13:1; Ũvuan’yo 22:8, 9.

Kwĩ nguthu mbingĩ mũno vyũ sya alaĩka, o na nĩvatonyeka makethĩwa me mbilioni mbingĩ. *—Ndanieli 7:10; Ũvuan’yo 5:11.

Mbivilia yonanasya kana alaĩka me “ũtonyi vinyanĩ,” na ũu nĩ kwasya kana me vinya na ũĩ mwingĩ kwĩ andũ. Alaĩka me ũtonyi wa kũthi na mĩtũkĩ kwĩ kĩndũ o na kĩva mũndũ ũtonya kũsũanĩa.—Savuli 103:20; Ndanieli 9:20-23.

O na kau alaĩka me ũtonyi mwingĩ wa kũsũanĩa na wa kwĩka maũndũ, ve maũndũ amwe matesa kwĩka, o na ve maũndũ amwe matesĩ.—Mathayo 24:36; 1 Vetelo 1:12.

Alaĩka mombĩtwe me na ndaĩa syĩ kĩvathũkany’o, na me na ũthasyo wa kwĩnyuvĩa. Na kwoou o tondũ andũ mailyĩ, alaĩka no menyuvĩe kwĩka kĩla kĩseo kana kĩla kĩthũku. Ĩndĩ ũndũ wa kũmakya nĩ kana ve alaĩka amwe manyuvie kũleana na Ngai.—Yuta 6.