Ԝәк Хԝәде, мәләк рʹӧһʹ ьн, «гошт у һәсту» йед ԝан тʹӧнә. Әԝана мәләкед амьн ьн, у тʹәви Хԝәде ль әʹзмана нә, һьм жи рʹастә-рʹаст дькарьн Ԝирʹа хәбәр дьн (Луԛа 24:39; Мәтта 18:10; Йуһʹәнна 4:24).

Ԝәхтәки, мәләк хԝә дькьрнә дьлԛе мәрийа, кӧ ԛьрара Хԝәде ль сәр әʹрде биньн сери у паши тʹәмамкьрьна шьхӧле хԝә, әԝана диса дьбунә кәсен рʹӧһʹ (Һʹакьмти 6:11-23; 13:15-20).

Ча Кʹьтеба Пироз дьбежә, мәләк тʹьме дьлԛе мерада хӧйа дьбун, ле әв найе һʹәсабе кӧ әԝана сәр дӧ кʹома пʹарә вәдьбьн, кʹома жьна у кʹома мера. Әԝана нә дьзәԝьщьн у нә жи зарʹа тиньн. Хенщи ԝе йәке, мәләк мина мәрьва ль сәр әʹрде нәһатьнә буйине, чаԝа кӧ һьнәк дьфькьрьн ԝәки әԝана зарʹ бун, пашԝәхтийе мәзьн бун, паше мьрьн, чун ль әʹзмен у бунә мәләк. Йаһоԝа мәләк әʹфьрандьнә; ләма жи Кʹьтеба Пироз ԝана нав дькә «лаԝен Хԝәде» (Ибо 1:6; Зәбур 148:2, 5).

Кʹьтеба Пироз гьли дькә дәрһәԛа «зьманед мәрьва» у «мьлйакʹәта». Әв йәк дьдә кʹьфше кӧ мәләк жи хәбәр дьдьн. Рʹаст ә Хԝәде мәләк дьданә хәбате, сәва кӧ мәрийарʹа хәбәр дьн, ле Әԝи изьн нәдайә мә кӧ әм бәр ԝана та бьн, йан жи ԝанарʹа дӧа бькьн (1 Корьнтʹи 13:1; Әʹйанти 22:8, 9).

Бь һʹәзар у һʹәзара мәләк һәнә, демәк һʹәжмарʹа ԝан дьгьһижә милйона * (Данийел 7:10; Әʹйанти 5:11).

Мәләк «хԝәйиԛәԝат ьн», демәк гәләк щар жь мәрьва ԛәԝаттьр ьн, у әԝана пʹьрʹ сәрԝахт ьн. Әʹшкәрә йә кӧ әԝана дькарьн бь ләзәкә ӧса мәзьн щигӧһасти бьн, кӧ һәла һе әм нькарьн бьдьн бәр чʹәʹве хԝә жи (Зәбур 103:20; Данийел 9:20-23).

Рʹаст ә мәләк пʹьрʹ ԛәԝат у сәрԝахт ьн, ле һәнә тьшт, дәрһәԛа чь жи әԝана ньзаньн (Мәтта 24:36; 1 Пәтрус 1:12).

Мәләк кәс ьн, у әԝана бь хәйсәт-һʹӧнӧред ӧса һатьнә әʹфьрандьне кӧ Хԝәде хԝәш тен. Азайа бьжартьна ԝан жи һәйә. Ләма жи анәгори мәрийа, әԝана хԝәха дькарьн бьжберьн ԛәнщи, йан хьрабийе бькьн. Ле йазьх, һьнә мәләк сафи кьрьн мьԛабьли Хԝәде дәрен (Щьһуда 6).