Nyinaa Mɛlɛka cho ni, nduyɛ maalikɛiya bɛɛ nyinaa nda cho ni. A nɔ ŋdial te, nduyɛ a nɔ vɛlɛ lapaa le. Maalikɛiyaa cho lo lechoo wo chɔmndo o Mɛlɛka lo wa, a cho a Mɛlɛka latulu o choo choo niŋ.—Luku 24:​39; Maatiu 18:​10; Chɔŋ 4:​24.

O paandoo niŋ, mi maalikɛiya ndaa chua dialuŋ ŋwana chieeyaŋ le walta Mɛlɛka ndoo ke nda laŋ tosaa o chieeŋndo hoo choo. Okoŋ te ndaa chii pɛ walta ndalaŋ tosa, a miiŋguŋ o inyinaya.—Chɔɔchiaa 6:​11-23; 13:​15-20.

Baabuiyo soo a maalikɛiya okɔɔ maa waŋ piaanduaa nda cho ni. Nduyɛ, a Mɛlɛka ndoo viam bɛɛ o chieeŋndo choo wa, dialuŋ waŋ piaanduaa ndaa chua ni. Kɛ teŋgeŋ cho nda tɛɛŋ maa waŋ piaanduaa a waŋ laanduaa le. Maalikɛiya chue nɔ le, nduyɛ a vilu ŋchua le. Mɛlɛka toosiaa maalikɛiya o chieeŋndo choo maa ŋwaŋchiee le, o wa chɛlɛkpiaa, chuaambuaa, ɔɔ kaasoŋnda. Chɛhowa toosiaa maalikɛiya ni. Lelaŋ Baabuiyo veelu nda ni aa chuauwaa Mɛlɛka tonyaa.—Choobu 1:​6; Sam 148:​2, 5.

Baabuiyo soo a “sɔɔŋ maŋgalaŋ waŋchieeya a sɔɔŋ maŋgalaŋ maalikɛiya dimi woŋ” okɔɔ. Hei chɔm maa nyaa yoomaa cho o inyinaya wa bɛɛ nɔ suɛi maŋgalɛi i ndɛi. Mi che bɛɛ mi Mɛlɛka ndoo soliŋ maalikɛiya kpeku le ma suukaŋ a waŋ chieeya, kɛ lepilɛ bɛɛ o chɛl le mi waŋ chieeya piɛi nda le.—1 Kɔliŋtiaŋ 13:​1; Sɔɔŋ Chɔɔmaŋndoŋ 22:​8, 9.

Maalikɛiya cho waalaŋ o waalaŋ niŋ. Nduyɛ pɛŋ, naapum o biiliɔŋndaŋ niŋ nda cho ni.—Daaniɛɛ 7:​10; Sɔɔŋ Chɔɔmaŋndoŋ 5:​11.

Kpaayaa pila maalikɛiya nɔ ni, nduyɛ a hiou waŋ chieeya kpaayaa poloŋ. A nɔ kɔl kaloo ma hiau waŋchieeya poloŋ. A keleŋa vɛlɛ o hiou waŋchieeya, nduyɛ a nyɛ o nyɛ wanachioo yiyaŋ pɛ.—Sam 103:​20; Daaniɛɛ 9:​20-23.

Mi che bɛɛ maalikɛiya nɔ kɔl kaloo tau vɛlɛ a kpaayaa, kɛ a nɔ kpeleŋndo. Nduyɛ sɔɔŋ pum cho a sina a muŋ okɔɔ le.—Maatiu 24:​36; 1 Pitɛ 1:​12.

Mɛlɛka toosiaa nda a kaalaŋ yɛ yɛ, a suliŋnda ndɔlaŋ, vɛlɛ a hɛnɛkɛyɛi. Maa waŋchieeya, nda bɛɛ nɔ chuaŋ chuaa le ma tosa suɛi kɛndɛi, ɔɔ suɛi wɔɔŋnde. O cho suɛi imɔnɔ le sinaa maa mi maalikɛiya apum tosa chuaŋ chuaa le Mɛlɛka simullo.—Chudi 6.