Wau vo Nzambi Mwanda, ambasi mpe vangwa ya mwanda ke ina ye “nitu ko ngatu visi.” E mbasi zakwikizi ku zulu bekalanga, bena yo nswa walwaka vana ndose a Nzambi.—Luka 24:39; Matai 18:10; Yoane 4:24.

Ezak’e ntangwa, muna sala e salu ina Nzambi kabavananga ova nza, ambasi nitu za wantu bavuatanga. I bosi vava bafokolanga e salu kiau, bakitukanga diaka se mianda.—Afundisi 6:11-23; 13:15-20.

Kana una vo muna Nkand’a Nzambi ambasi beyikilwanga nze ayakala yo vuata nitu za wan’amakala ntangwa zawonso, kavena yakala ko ngatu nkento vana vena ambasi. Ke besompananga ko ngatu wutana. Vana ntandu, o lubantiku lwa mbasi ke luna ko nze lwa wantu ova nza, i sia vo, bafwete wutuka ntete nze nsedia, kingiana-ngiana yo kula se mbuta. Yave wasema ambasi; i kuma beyikilwanga muna Nkand’a Nzambi vo ‘wan’a Nzambi aludi.’ —Yobi 1:6; Nkunga 148:2, 5.

Nkand’a Nzambi uyikanga “ndinga za wantu ye ndinga za mbasi,” muna songa vo vangwa ya mwanda bavuidi ndinga ye mvovo. Kana una vo Nzambi wasadila ambasi muna mokena yo wantu, ke yambulanga ko vo twabasambila ngatu fila sambu yeto kwa yau.—1 Korinto 13:1; Lusengomono 22:8, 9.

Vena ye yazi ye yazi ya mbasi, nanga mafunda ye mafunda. *—Daniele 7:10; Lusengomono 5:11.

Ambasi basundidi wantu muna “nkuma ye ngolo” ye ngangu. Balenda kangala mu nswalu-nswalu mu mpila ina wantu ke balendi yindula ko.—Nkunga 103:20; Daniele 9:20-23.

Kanele vo bavuidi ngangu zayingi yo nkuma, ambasi bena ye tezo, kadi vena ye mambu ke bazeye ko.—Matai 24:36; 1 Petelo 1:12.

Ambasi basemwa ye kiwuntu, fu ya Nzambi yo nswa wakuyisolela. Nze wantu, balenda sola vanga oma mambote yovo mambi. Diankenda vo, mbasi zankaka basola kolamena Nzambi.—Yuda 6.