Sina feela Mulimu hali Moya, mangeloi ni ona ki libupiwa za moya zelusa koni kubona ili ‘zesina nama ni masapo.’ Mangeloi asepahala apila mwa mahalimu mi akona kubona Mulimu.—Luka 24:39; Mateu 18:10; Joani 4:24.

Mangeloi fokuñwi naabonahalanga kwa batu inze ali mwa mibili ya butu kuli apete musebezi wafilwe ki Mulimu fa lifasi mi hasafelize kueza musebezi wo, naakutelanga mwa mibili yaona ya moya.—Baatuli 6:11-23; 13:15-20.

Nihaike kuli mwa Bibele mangeloi aboniswanga kuli ki baana, mi kwamulaho naabonahalanga kwa batu sina baana, hakuna lingeloi la muuna kamba la musali. Mangeloi hanyalangi ni kupepa mangeloi amañwi. Mane mangeloi naasika bupiwa sina mobabupezwi batu fa lifasi, ili kuba limbututu, banana, ni kuba batu babahulu. Mangeloi naabupilwe ki Jehova; kona libaka Bibele haibiza mangeloi kuli ki “bana ba Mulimu wa niti.”—Jobo 1:6; Samu 148:2, 5.

Bibele ibulela ka za “lipuo za batu ni za mangeloi,” ili kubonisa kuli mangeloi ni ona anani puo mi abulelanga. Nihaike kuli Mulimu naaitusisanga mangeloi kwa kuambola ni batu, haalulumelezi kuli lulapele mangeloi kamba kulibisa litapelo zaluna ku ona.—1 Makorinte 13:1; Sinulo 22:8, 9.

Kunani likiti zemashumi-shumi za mangeloi, mi mwendi palo ya mangeloi ieza mabilioni-bilioni. *—Daniele 7:10; Sinulo 5:11.

Mangeloi “anani maata amatuna” hahulu kufita batu mi anani butali bobuipitezi hahulu. Akona kufufa ka lubilo lolukomokisa hahulu, mi musipili olukona kuunga luna batu kuli ki omutelele ka kufitisisa, ku ona haki sesiñwi.—Samu 103:20; Daniele 9:20-23.

Nihaike kuli mangeloi anahana ka nzila yepahami hahulu mi anani maata akueza lika zetuna, anani maciñekelo, mi kunani lika zeasazibi.—Mateu 24:36; 1 Pitrosi 1:12.

Lingeloi ni lingeloi nelibupilwe ni butu bwalona, linani tulemeno totuswana ni twa Mulimu, mi linani tukuluho ya kuiketela za kueza. Ka libaka leo, ka kuswana ni batu, mangeloi akona kuketa kueza sesilukile kamba sesisika luka. Ka bumai, mangeloi amañwi naaiketezi kukwenuhela Mulimu.—Juda 6.