Neyi chochekalayi Nzambi hiSpiritu, añelu niwena hiyileñaleña yakuspiritu yabulaña kumwekana nawa “hiyekala namusunyi nimafwahaku.” Añelu ashinshika ashakamaña mwiwulu nawa adimonaña naNzambi.—Luka 24:39; Matewu 18:10; Yowanu 4:24.

Añelu mpinji yikwawu avwalaña nyijimba yawuntu kulonda azati mudimu wunayitumiwu kudi Nzambi, chamanishawu anvwalaña cheñi nyijimba yawu yakuspiritu nakufunta.—Ansompeshi 6:11-23; 13:15-20.

Hela chakwila añelu ayilumbulula muBayibolu nawu hiyamayala nawa amwekanaña neyi amayala, ilaña hiyakweti chaambu chakuyilukilakuku. Hiyasumbulaña nikusema anyanaku. Hela chochu, añelu hiyasemukaña neyi chasemukañawu antu nakwikala anyikeki, anyana, hela akulumpiku. Añelu ayileñeli kudi Yehova; dichayitenenañawu muBayibolu nawu “anyana kaNzambi.”—Yoba 1:6; Masamu 148:2, 5.

Bayibolu yahosha “mumadimi awantu niawañelu,” chinakumwekesha nawu antu akuspiritu ahoshaña mumadimi. Hela chakwila Nzambi wazatishili añelu kuhanjeka nawantu, ilaña hatwiteja kudifukula hela kulomba kudi añeluku.—1 Akorinda 13:1; Chimwekeshu 22:8, 9.

Kudi mazaza namazaza awañelu, hadaha kuyichinda akushika kumabiliyoni. *—Danyeli 7:10; Chimwekeshu 5:11.

Añelu ‘asweja ñovu chikupu,’ kubadika antu nawa akweti maana chikupu. Anateli kwenda sipidi chikupu, kubadika chendaña iseki.—Masamu 103:20; Danyeli 9:20-23.

Hela chakwila akweti maana chikupu niñovu yakuspiritu, añelu niwena akweti mwakukumina nawa kudi yuma yikwawu yabula kwilukawu.—Matewu 24:36; 1 Petulu 1:12.

Añelu ayileñeli nawuntu niyilwilu neyi yaNzambi niwuswa wakudifuukwila. Kufwana antu, niwena anateli kutondahu kwila yuma yayiwahi hela yatama. Chawushona, añelu amakwawu atondelihu kudikaña naNzambi.—Yuda 6.