Kõnke Anij ej juon Jetõb, enjel̦ ro rej bar jetõb me jejjab maroñ loe er im ‘ejjel̦o̦k kanniõkier im diier.’ Enjel̦ ro retiljek rej pãd ilañ im ewõr aer maroñ ñan pãd ijo Anij ej pãd ie.​—Luk 24:39; Matu 18:10, UBS; Jon 4:24.

Ewõr iien ko me enjel̦ ro rar oktak im bõk ãnbwinnin armej ñan kõm̦m̦ani jerbal ko Anij ear lil̦o̦k bwe ren kõm̦m̦ani ijin ioon lal̦, im ãlikin aer kar kadedeikl̦o̦k jerbal kein rar bar oktak im bõk ãnbwinnin jetõb.​—Ri Ekajet 6:11-23, UBS; 13:15-20, UBS.

Meñe Baibõl̦ ej kwal̦o̦k kõn enjel̦ ro ãinwõt em̦m̦aan ro, im ke rekõn itok ñan lal̦ in im ukot m̦õraer ñan armej im oktak im ãinwõt em̦m̦aan, ak ilo m̦ool ejjel̦o̦k piktokin em̦m̦aan im kõrã ippãer, aolepeer rej jetõb im rej juon wõt. Rein rejjab pãlele im ejjab bar wõr nejier enjel̦. Bareinwõt, enjel̦ ro rar jab wal̦o̦k im pãd m̦okta ãinwõt niñniñ, ajri, im rũtto. Bõtab, Jeova ear kõm̦anm̦an er im eñin unin Baibõl̦ ej ba bwe er rej “nejin Anij.”​—Job 1:6; Sam 148:2, 5.

Baibõl̦ ej kwal̦o̦k kõn “kajin ko an armej im bareinwõt an enjel̦ ro,” im men in ej kaalikkar bwe ebar wõr an enjel̦ ro kajin. Meñe Anij ear kõjerbal enjel̦ ro bwe ren kõnono ñan armej, ak ejjab ba bwe jen kabuñ ñan er ak jar ñan er.​—1 Korint 13:1, UBS; Revelesõn 22:8, 9, UBS.

Elõñ to̦ujin im to̦ujin enjel̦ ro im bõlen emaroñ wõr pilien uwaaer. * (Lale kõmel̦el̦e eo itulal̦.)—Daniel 7:10; Revelesõn 5:11.

Enjel̦ ro el̦apl̦o̦k aer ‘kajoor’ jãn armej, im el̦ap mãlõtlõt ippãer. Elukkuun m̦õkaj aer m̦akũtkũt im itoitak jãn jikin ñan jikin jãn jabdewõt men ilo lal̦ in.​—Sam 103:20; Daniel 9:20-23, UBS.

Meñe enjel̦ ro rekajoorl̦o̦k im mãlõtlõt l̦o̦k jãn kõj, ak ewõr joñan maroñ ko aer im ewõr jet men ko rejjab jel̦ã kaki.​—Matu 24:36, UBS; 1 Piter 1:12, UBS.

Kar kõm̦anm̦an enjel̦ ro bwe en wõr wãween ko rem̦m̦an ippãer im bwe en wõr aer anemkwõj in kããlõt. Im ãinwõt bar kõj armej, ewõr aer maroñ in kããlõt ñan kõm̦m̦ane men eo ejim̦we ak men eo ebõd. Ak ekabũrom̦õjm̦õj bwe ewõr jet enjel̦ rar kããlõt ñan jum̦ae Anij.​—Jud 6.