Paykunaqa Dios jinallataj mana rikukoj cuerpoyoj kanku, mana aychayoj, mana tullusniyoj. Chantapis kasukoj angelesqa cielopi tiyakunku, Diospa ñaupaqenmantaj yaykuyta atinku (Lucas 24:39; Mateo 18:10; Juan 4:24).

Wakin kutis angelesqa runasman tukorqanku, kay jallpʼapi Diospa munayninta ruwanankupaj. Chayta juntʼaytawantaj watejmanta mana rikukoj cuerpoyojman tukorqanku (Jueces 6:11-23; 13:15-20).

Paykunaqa aychallikuspa qharisman tukorqanku, Bibliataj paykunamanta qharismanta jina parlan. Jinapis paykunaqa mana qharischu, nitaj warmischu kanku. Paykunaqa mana casarakunkuchu, nitaj wawasniyoj kayta atinkuchu. Chantapis mana runaschu kanku, nitaj runasmanta angelesman tukuspachu cieloman rinku. Paykunataqa Jehová ruwarqa, chayrayku Biblia nin “Diospa wawasnin” kasqankuta (Job 1:6; Salmo 148:2, 5).

Bibliaqa parlan runaspa parlayninkumanta, angelespa parlayninkumantawan. Chaytaj rikuchiwanchej angelesqa parlayta atisqankuta, uj parlayniyojtaj kasqankuta. Jehová Dios paykunanejta runaswan parlajtinpis, mana saqewanchejchu paykunata yupaychananchejta, nitaj paykunamanta mañakunanchejtapis (1 Corintios 13:1; Apocalipsis 22:8, 9).

Angelesqa mana yupay atina waranqa waranqas kanku, millones millonestaj (Daniel 7:10; Apocalipsis 5:11).

Paykunaqa atiyniyoj kanku, noqanchejmanta nisqataj aswan kallpayoj, aswan yachayniyojtaj. Maymanpis uj ñawi chʼirmiypi jina chayarpanku (Salmo 103:20; Daniel 9:20-23).

May yachayniyoj, may kallpayoj kaspapis angelesqa wakin imasta mana ruwayta atinkuchu (Mateo 24:36; 1 Pedro 1:12).

Paykunaqa Jehová Dios jina kʼacha kaykunasniyoj kanku, ajllayta atinankupaj jinataj ruwasqas kanku. Chayrayku noqanchej jina, paykunaqa allin kajta mana allin kajta ajllayta atinku. Llakikunapaj jinataj wakenqa Diospa contranpi oqharikorqanku (Judas 6).