Ja Dyosi ikʼ ason ay, cha jachuk ja anjeliki, wa xkʼan yale, mey «sbʼakʼtel mini sbʼakel». Chomajkil, ja anjelik toji ti aye bʼa satkʼinal sok wani xkʼumajiye yuja Dyosi (Lucas 24:39, Ja yajkʼachil sju‘unil ja dyosi; Mateo 18:10; Juan 4:24).

Ajyel ekʼeleʼik, ja anjeliki paxele jastal winike bʼa skʼulajel aʼtelik bʼa Dyos ja bʼa Luʼumi sok yajni chʼakta skʼuluke, wa xcha paxye ikʼ ason (Jueces 6:11-23; 13:15-20).

Ama ja anjeliki jitsan ekʼele paxele jastal winike sok ja Biblia wa staʼa tiʼal jastal winike, pe mini winikuke ma ixuke. Mi xnupaniye sok mi xbʼobʼ yil yuntikile. Chomajkil, ja anjeliki, mi yal alatsuke, yal untik ma ixuk winike, bʼa ti wajye bʼa satkʼinal ja chamyeʼi. Jani kʼulajiye yuja Jyoba, ja yuj wa xya sbʼiʼiluk ja Biblia ‹ja yuntikil ja Dyos smeranili› (Job 1:6; Salmo 148:2, 5).

Ja Biblia wa xyala sbʼaja ‹skʼumal ja ixuk winiki soka jastal wa xkʼumani ja anjeliki›, ja it wa sjeʼa ja anjeliki wani xbʼobʼ kʼumanuke sok ayni jun skʼumale. Ama ja Dyos yaʼunej makunuk anjelik bʼa oj ya ekʼyi ja rason ja ixuk winiki, mini skʼana oj jtoytike ma oj katik kʼot sbʼaj ja korasyontiki (1 Corintios 13:1; Apocalipsis 22:8, 9).

Ay jitsan lek miyonik anjelik (Daniel 7:10; Apocalipsis 5:11).

Ja anjeliki jelni ja yipeʼi; masni jel biboʼe sok jel yipe yuja keʼntiki. Chomajkil, masni jel wego wa xkʼotye ja bʼa wa xwajyeʼi yuja jas wa xnaʼatik sbʼaj ja bʼa luʼumkʼinali (Salmo 103:20; Daniel 9:20-23).

Anima jel chaʼan ja sbiboʼileʼi soka yipeʼi, ja anjeliki mini xchʼak snaʼe spetsanil (Mateo 24:36; 1 Pedro 1:12).

Kʼulajiye sok tuktukil smodoʼe, modoʼalik jastalni yiʼoj ja Dyosi soka libreʼil bʼa stsajel. Ja yujil jastalni keʼntik, wani xbʼobʼ stsaʼe skʼulajel ja bʼa toji soka bʼa mi tojuki. Pe jujuntik jani stsaʼawe skontraʼajel ja Dyos (Judas 6).