NGANI JA PANDANDA | YAJIKUSASALA BAIBULO PAKWAMBA YA MALAYIKA
Yisyesyene Yakwe Pakwamba ya Malayika
Ana malayika gali ŵani soni gatyocele kwapi? Ana malayika gakusatenda cici? Baibulo mpaka jitukamucisye kupata kwanga kwa yiwusyo yeleyi. (2 Timoteo 3:16) Ana Baibulo jikusasala yamtuli yakwamba malayika?
-
Mpela mwayiŵelele kuti Mlungu ali Msimu, nombenago malayika gali misimu jangawoneka, nambosoni “nganigakola mnowu soni mawupa.” Malayika gakulupicika, gakusatama kwinani soni gakwete upile wakuwonegana ni Mlungu.—Luka 24:39; Matayo 18:10; Yohane 4:24.
-
Ndaŵi sine malayika gacengaga yilu yawo kuti gawonecele mpela ŵandu pacilambo capasi. Gatendaga yeleyi kuti gakamule cenene undumetume waŵagatumile Mlungu. Pagamalisisye undumetumewo, gacengagasoni yilu yawoyo ni kuŵa malayika, kaneko ni kuwujila kwinani.—Oweruza 6:11-23; 13:15-20.
-
Atamose kuti Baibulo pakusala ya malayika jikusalosya mpela kuti gali gacilume, soni kuti gawonecelaga kwa ŵandu mpela acalume, nambope pangali malayika gacilume kapena gacikongwe. Malayika ngagakusalombela soni kola ŵanace. Nambosoni ngaŵa kuti pandanda gapali mpela ŵandu pacilambo capasi kaneko ni kusyuka kuŵa malayika. Malayika gapanganyidwe ni Yehofa, ni ligongo lyakwe m’Baibulo akusagakolanga kuti, ‘ŵanace ŵa Mlungu jwakuwona.’—Yobu 1:6; Salimo 148:2, 5.
-
Baibulo jikusasala ya ‘yiŵeceto ya ŵandu soni malayika.’ Yeleyi yikulosya kuti malayika gakwete ciŵeceto cakusacikamulicisya masengo pakuŵecetana. Atamose kuti Mlungu ŵakamulicisyaga masengo malayika pakuŵecetana ni ŵandu, nambope jwalakwe ngakusasaka kuti tugalambileje, kapena kupopelaga kwa jemanjaji.—1 Akolinto 13:1; Ciunukuko 22:8, 9.
-
Malayika gapali gejinji mwinesoni mabiliyoni. *—Danieli 7:10; Ciunukuko 5:11.
-
Malayika gali “gamacili” mnope soni gakwete lunda kupunda ŵandu. Yikuwoneka kuti malayika gakusawutuka mnope ngaŵa masanje, mwakuti pangali cakusawusya cilicose campaka casokonasye mwipananga mpela mwayikusaŵela ni ŵandu.—Salimo 103:20; Danieli 9:20-23.
-
Atamose kuti malayikaga gakwete lunda soni macili kupunda ŵandu, nambope gakwete malile gakutendela yindu soni gangamanyilila yindu yosope.—Matayo 24:36; 1 Petulo 1:12.
-
Mlungu ŵagapanganyisye malayika ni maumundu gakulekanganalekangana soni kuti gakomboleje kulosya ndamo syakwe, nambosoni kulisagulila yakutenda. Mpela mwayiŵelele ni ŵandu, jemanjaji akwete ufulu wakusagula kutenda yambone kapena yakusakala. Nambo cakutesya canasa ni cakuti malayika gane gasagwile kumjimucila Mlungu.—Yuda 6.
^ ndime 8 Lilemba lya Ciunukuko 5:11, pakusala ya winji wa malayika likusati, “ma 10,000 kutupiya ni ma 10,000.” Naga 10, 000 tukutupiya ni 10, 000 yikutupa 100 miliyoni. Yeleyi yikulosya kuti malayika gapali ma miliyoni gejinji mwinesoni mabiliyoni.
You May Also Like
KWANGA KWA YIWUSYO YA M’BAIBULO
Ana Satana Ali Jusyesyene?
Ana Satana uli ulemwa wawukusaŵa mumtima mwa mundu kapena ali jusyesyene?
KWANGA KWA YIWUSYO YA M’BAIBULO
Ana Malayika Gali Ŵani?
Ana gapanganyidwe galingwa? Ana gakwete mena soni ndamo?
