Kina wai du Mbori nga Toro, amaraika kina wo a, zanga “pasio na meme.” Ruru amaraika naraka ngbangbaturũ yo na ki du barabangiri Mbori.—Ruka 24:39; Matayo 18:10; Yoane 4:24.

Amaraika anaadia kpoto aboro adia kutiyo mbata tipa ka manga gu sunge Mbori anaafuhe fuyo auru kpotosende, fuo nyasa yo gayo sunge i ki ingi.—Abasapungbanga 6: 11-23; 13:15-20.

Wa vura duhe nga i nayugo amaraika dedede rogo Ziazia Kekeapai ni kina akumba, amaraika akparakanga ku rogo riko yo ue nga akumba na adee te. I amanganga rogatise kini vungu ngbatunga yo te. Ono tie, amaraika aenganga mbata ni aboro auru kpotosende te, watadu ni tooni agude watadu ni kuru aboro a te. Yekova nambakadi amaraika; si du Ziazia Kekeapai ayambayo ti ni nga “awiri Mbori.”—Eyobo 1:6; Atambuahe 148:2, 5.

Ziazia Kekeapai nafura tipa “afugo nga ga aboro na gu nga ga amaraika,” nayugo gupai nga amaraika na kina fugoyo ti ni, na i nafura afura. Wa vura duhe nga Mbori aima mangasunge na amaraika ka fura na aboro, ko ambunga gene furani ani irisiyo watadu ka kpara fuyo te.—1 AKorindo 13:1; Yugoti 22:8, 9.

Badungu kutu akutu nga ga amaraika duho, du bangeyo wa abirioni. *—Daniere 7:10; Yugoti 5:11.

Amaraika “na nyaka na tandu”—na ome ki susi aboro—na gayo inohe susi ga aboro. I nandu tuturũ vuru wiri tooni regbo yo, ni wiri ipo kisusi wai rengbe ani ka berãha.—Atambuahe 103:20; Daniere 9:20-23.

Wa vura du pa yo kuari na gu ome du tiyo nga ga toro, si na kina bangbandaha ti ni, kura apai kinaho i ainongo ho ya.—Matayo 24:36; 1 Petero 1: 2.

I akusi amaraika na asinoyo ti ni, agu asino naye be Mbori, gbiati ranirii. Sidu, wakina aboro, i ima rengba ka sia ka manga wenepai watadu gbegberẽpai. Si nafu kina gberãrago nga kura amaraika adiberã ka samungu kuti Mbori.—Yuda 6.