In nul itzʼje toj jun kojbʼil te tnam Sajonia, aju tbʼi ojtxe República Democrática Alemana (RDA). Tbʼanelxixtoq kymod toj njaye ex tzaj kyxnaqʼtzaʼn nmane weye tuʼn tel nnikʼe tiʼj alkye bʼaʼn ex nya bʼaʼn. Aju RDA juntoq tnam comunista, tuʼntzunju nyatoq nim toklen okslabʼil toj kywitz nim xjal te tnam Sajonia. Mintiʼtoq in xi wokslaʼne qa at Dios. Ten kabʼe ximbʼetz toj nwiʼye kyoj qeju 18 abʼqʼi te wanqʼibʼile: aju qa mintiʼ Dios ex aju comunismo.

¿Tiquʼn pon ngane tiʼj comunismo? Tuʼnju wajtoqe tuʼn tok qʼoʼn ax kyoklen kykyaqil xjal. Ax ikx, kubʼ nximane qa tuʼn miʼn ttentl paʼbʼil kyxol xjal qʼinun ex mebʼa, iltoq tiʼj tuʼn t-xi sipet qʼinumabʼil kyxol xjal. Tuʼntzunju, xi tzyet tuʼn wonine tukʼil jun kʼloj kuʼxun tiʼj comunismo. Tej qʼiʼntoq 14 abʼqʼi wuʼne, in tene nim ambʼil tuʼn wonine tuʼn tchmet uʼj aju in kyaj xoʼn twitz txʼotxʼ. Aʼyeju aj sanjelal te tnam Aue tzaj kyqʼoʼn nim chjonte ex tzaj kyqʼoʼn jun oyaj weye. Maske tzmatoq kuʼxun qine, e ok wojtzqiʼne junjun aj sanjelal nim kyoklen toj tnam. Kubʼ nximane qa otoq jaw njyoʼne jun tbʼanel bʼe ex qa ktel tbʼanel wanqʼibʼile.

Noqtzun tuʼnj, kubʼ xitj aju otoq kubʼ nximane. Toj 1989 kubʼ tzʼaq tmuro Berlín, ax ikx kubʼ naj aju kʼloj tnam comunista te Europa del Este. Tzaj nbʼise tej kybʼaj qe tiʼchaq lu. El nnikʼe tiʼj qa otoq bʼant nim nya bʼaʼn. Jun techel, aʼyeju mintiʼ in che onin tiʼj comunismo, nya ax kyoklen xi qʼoʼn ik tzeʼn qeju e onin tiʼj. ¿Tiquʼn in bʼanttoq jlu? ¿Mintiʼpe in tzajtoq t-xnaqʼtzaʼn comunismo qa junx qoʼ qkyaqil? ¿Noqpe jun witzikʼ aju comunismo? Tzaj bʼaj nkʼuʼje tuʼn tkyaqil jlu.

Chʼexpaj aju wajtoqe tnejel, tuʼntzunju ten wajbʼile tiʼj bʼitz ex tuʼn npintarine. In okxe toj jun tja t-xnaqʼtzbʼil tiʼj bʼitz tuʼntzun wokxe yajxitl toj Universidad: wajtoqe tuʼn tajbʼen nchwinqlale tiʼj bʼitz ex tuʼn npitarine. Mintiʼtl ok nqʼoʼne toklen aju tzaj kyxnaqʼtzaʼn nmane weye tej kʼwaʼlx qine. Oʼkxtoq in chin ximane tuʼn ntzalaje, axpe ikx in nexe kyukʼil nim txin toj ax ambʼil. Pero mintiʼ el bʼis wiʼje tuʼn bʼitz, tuʼnju kubʼ npintarine nix tuʼnju alkyexku tiʼchaq in bʼant wuʼne, axpe ikx qʼanchaʼltoq kyiʼj cuadro in che bʼanttoq wuʼne. ¿Tzeʼntoq qanqʼibʼil ktel toj ambʼil tzul? ¿Tiʼ toklen qchwinqlal?

 Tej kykanet tzaqʼwebʼil wuʼne kyiʼj nxjele, bʼiʼx in kyaj weʼye. Toj jun qale, akux at qine toj tja xnaqʼtzbʼil te bʼitz, in kubʼ qeʼye kyukʼil jun kʼloj kuʼxun in che xnaqʼtzan aʼyeju in che yolintoq tiʼj ambʼil tzul. Kyxol jlu tokxtoq Mandy, * jun txin testigo de Jehová aju tzaj tqʼoʼn jun tbʼanel consej weye. Tqʼama jlu: «Andreas, qa taja tuʼn tkanet tzaqʼwebʼil kyiʼj t-xjela tiʼj chwinqlal ex tiʼj ambʼil tzul, jyonkuxa toj Tyol Dios».

Nyatoq qʼuqlixix nkʼuʼje tiʼj, noqtzun tuʼnj, kux njyoʼne tzaqʼwebʼil toj Tyol Dios. Tzaj tyekʼin Mandy capítulo 2 te uʼj te Daniel weye ex tej tjaw wuʼjine bʼiʼx in jaw labʼine tiʼj. Aju yol lu, in yolin tiʼj jun kʼloj aj kawil o ten nim kyipumal twitz tkyaqil Txʼotxʼ ex in nul bʼaj toj ambʼil jaʼlo. Yajxitl, tzaj tyekʼin Mandy junjuntl yol weye aju kyaj tziyen tiʼj kyanqʼibʼil xjal toj ambʼil tzul. Kanet tzaqʼwebʼil kyiʼj nxjele. Noqtzun tuʼnj, ¿alkye kubʼ tzʼibʼin kye yol lu? ¿Alquʼn kyaj qʼamaʼn aju kbʼajelxix toj ambʼil tzul? ¿In tzajpe tyekʼin jlu qa at Dios?

Tzaj tyekʼin Mandy jun mejebʼleʼn weye Horst ex Angelika kybʼi, aʼyeju testigos de Jehová qe. E onin wiʼje tuʼn telxix nnikʼe tiʼj Tyol Dios. Jun rat el nnikʼe qa oʼkx okslabʼil kye testigos de Jehová kukx in najbʼen tbʼi Dios kyuʼn ex in xi kyyekʼin kye txqantl (Isaías 42:8; Mateo 6:9). El nnikʼe tiʼj qa in tzaj tqʼoʼn Jehová ambʼil kye xjal tuʼn kyanqʼin te jumajx twitz Txʼotxʼ aj tok te jun tbʼanel najbʼil. In tzaj tqʼamaʼn Salmo 37:9 jlu: «Atzun qeju qʼuql kykʼuʼj tiʼj Qman che okel etzal teju txʼotxʼ». Tbʼanel ela te weye qa in xi qʼet ambʼil lu kye kykyaqil xjal aʼyeju in nok tilil kyuʼn tuʼn kyanqʼin ik tzeʼn in tzaj tqʼamaʼn Tyol Dios.

Kwest ela te weye tuʼn nchʼexpaje ex tuʼn wanqʼine ik tzeʼn in tzaj tqʼamaʼn Tyol Dios. Jaw nnimsan wibʼe tuʼnju otoq chin oke te jun tbʼanel chimbʼal toj bʼitz ex te jun tbʼanel pintor. Tuʼntzunju iltoq tiʼj tuʼn tkubʼ win wibʼe. Ax ikx, kwest kyaj ntzaqpiʼne aju tten wanqʼibʼile nya bʼaʼn. In xi nqʼoʼne nim chjonte te Jehová tuʼnju at tpasens, at tkʼujlabʼil ex in nel tnikʼ kyiʼj xjal in nokxix tilil kyuʼn tuʼn tkubʼ kybʼinchaʼn aju in tzaj tqʼamaʼn Xjan Uʼj.

Kyoj qeju 18 abʼqʼi te wanqʼibʼile in ximane tiʼj comunismo ex qa mintiʼ Dios, pero o chʼexpaj nximbʼetze tuʼn Tyol Dios. Aju el nnikʼe tiʼj tzaj tqʼoʼn ttxolil wanqʼibʼile ex onin wiʼje tuʼn miʼn ttzaj bʼaj nkʼuʼje tiʼjju kbʼajel toj ambʼil tzul. Toj 1993 jaw aʼ nwiʼye ex in oke te testigo de Jehová, ex toj abʼqʼi 2000 in kubʼ mojeʼye tukʼil Tabitha, jun tbʼanel ajbʼel te Dios. Qkabʼile in nok tilil quʼne tuʼn tel qpaʼne ambʼil tuʼn t-xi qxnaqʼtzaʼne kye xjal aju in tzaj tqʼamaʼn Tyol Dios. Ik tzeʼn weye tnejel, o che tzaj xnaqʼtzaʼn xjal tiʼj comunismo ex tiʼj qa mintiʼ Dios. In chin tzalaje tuʼnju in chin onine kyiʼj xjal tuʼn tel kynikʼ tiʼj Jehová.

Tej t-xi tzyet tuʼn tok nchmon wibʼe kyukʼil testigos de Jehová, e tzaj xobʼ nmane. Pero tej tbʼet ambʼil, ok kykeʼyin tzeʼn o tzʼonin jlu toj wanqʼibʼile. Jaʼlo in chin tzalaje tuʼnju in che xnaqʼtzan tiʼj Tyol Dios ex in cheʼx toj kychmabʼil testigos de Jehová.

In nok tilil quʼne tukʼil Tabitha tuʼn t-xi qbʼiʼne nabʼil in tzaj tqʼamaʼn Tyol Dios kye xjal o che kubʼ mojeʼ, ex in qo tzalaje tuʼn jlu. Jun techel, in xi qbʼiʼne kawbʼil in tzaj qʼoʼn tuʼn qten tzʼaqli twitz qukʼil, a jlu in nonin tuʼn tten qmejebʼleʼne kyuw (Hebreos 13:4).

Ya mintiʼtl in tzaj bʼaj nkʼuʼje tiʼj chwinqlal nix tiʼj ambʼil tzul. Atine toj jun ja xjal aju at twitz tkyaqil Txʼotxʼ kyxol testigos de Jehová, jatumel at axix tok mujbʼabʼil ex tzalajbʼil. Toj ja xjal lu junx qoʼ qkyaqilx, aju kukx o chin ximane tiʼj ex o chin jyone tiʼj toj tkyaqil wanqʼibʼile.