Ekj wort en eene kjliene Staut en Sachsen jebuaren, waut ieeschtemma to een Launt jehieed, waut Deutsche Demokratische Republik (DDR) heet. Wie hauden een sea scheenet Famieljenläwen un miene Elren lieeden mie sea väl feinet. De DDR wia een kommunistischet Launt un de mieeschte Menschen en Sachsen jeewen nich väl om Gloowessachen rom. Un fa mie jeef daut kjeenen Gott. En de ieeschte 18 Joa en mien Läwen jeef et twee Lieren, waut sea väl aun mie deeden: Daut et kjeenen Gott jeef un de Kommunismus.

Ekj jleicht dän Kommunismus sea, wiels doa jelieet wort, daut aule Menschen sullen äwareen behaundelt woaren. Ekj jleicht daut uk sea, daut doa aule tietelje Sachen sullen äwareen vedeelt woaren, soo daut et nich mea sea Rikje un sea Oame jeef. Doawäajen schloot ekj mie eene kommunistische Jugentgrupp aun. Aus ekj 14 Joa wia, vebrocht ekj väl Tiet doamet, oolet Papia tooptosaumlen, om de Natua reintohoolen. De Staut Aue, wua ekj oppwoss, wia sea dankboa doafäa un jeef mie een Jeschenkj un ieeden mie doafäa. Wan ekj uk noch mau junk wia, lieed ekj waut sea bekaunde Rejierungsmana von de DDR kjanen. Mie feeld sikj soo, daut ekj no daut baste sträwen deed un väl goodet em Verhop haud.

Oba dan jinkj aules tonuscht, wua ekj opp jehopt haud. Aune 1989 jinkj de Jrens op tweschen Oost-Berlin un Wast-Berlin un de Kommunisten en Oost-Europa veluaren äare Macht. Ekj wia emma dolla enteischt. Ekj wort en, daut daut en de DDR väl Ojjerajchtichkjeit jejäft haud. Biejlikj worden soone Menschen, waut de Kommunisten nich unjastetten deeden, schlajcht behaundelt. Woo wia daut mäajlich? Jleewd wie aus Kommunisten nich, daut de Menschen aula sullen äwareen sennen? Hilt daut met dän Kommunismus opplatst doch goanich soo väl en? Ekj muak mie sea väl Sorjen.

Dan wort ekj mie eenich, no waut aundret to sträwen, soo aus Musikj spälen un molen. Ekj kunn no eene Musikjschool gonen un ekj hopt doaropp, daut ekj lota wudd kjennen no de Uniwersität gonen, soo daut ekj kunn een bekaunda Musikjspäla un Mola woaren. Ekj schmeet uk aulet goode wajch, waut ekj aus Kjint jelieet haud. Fa mie wia daut wichtichste, daut ekj een Scheengonen haud, un doa wia uk met en, daut ekj met miere Mejalen tojlikj deed. Oba Musikj spälen, molen un aules doonen, waut mie jankad, muak mie nich werkjlich schaftich. Aun de Bilda, waut ekj mold, wia to seenen, woo besorcht ekj ennalich wia. Woo sull daut nu wiedagonen? Un to waut läw wie verheipts?

Aus ekj dan entlich de Auntwuaten fa dise Froagen kjrieech, kunn ekj daut schia nich jleewen. Eenen Owent wia ekj met miene Schoolpoatna toop bie de Musikjschool un wie räden doaräwa, waut lota noch mol komen wudd. Eene von de Schoolpoatna wia Mandy, * un see wia eene von Jehova siene Zeijen. See jeef mie eenen gooden Rot. See säd: “Andreas, wan du west de Auntwuaten fa diene Froagen kjrieen, dan motst du mol iernstlich en de Bibel nenkjikjen.”

Ekj twieweld doa een bät aun, oba oppe aundre Sied wia ekj uk nieschierich. Mandy säd, daut ekj Daniel, Kapitel 2 läsen sull, un doa wia ekj sea vewundat äwa, waut ekj doa läsd. Dise Profezeiunk räd von veschiedne Weltmachten, ooda Rejierungen, waut eent no daut aundre oppkjeemen bat en onse Tiet. Mandy wees mie uk noch aundre Sachen, waut de Schreft verutsäd, waut doa noch mol komen wudd. Entlich kjrieech ekj de Auntwuaten fa miene Froagen! Oba wäa schreef dise Profezeiungen un wäa kunn soo krakjt verutsajen, waut doa noch mol komen wudd? Kunn daut sennen, daut et opplatst doch eenen Gott jeef?

Derch Mandy lieed ekj Horst un Angelika kjanen, een Poa Lied, waut Jehova siene Zeijen wieren un mie holpen, Gott sien Wuat bäta to vestonen. Mie wort boolt kloa, daut Jehova siene Zeijen de eensja Gloowen wia, waut emma Gott sienen Nomen Jehova brukt un dän bekauntmuak (Psalm 83:18, NW; Matäus 6:9). Ekj lieed uk, daut Jehova aule Menschen de Jeläajenheit jeef, fa emma en een Paradies oppe Ieed to läwen. Psalm 37:9 sajcht: “Dee waut ruich nom HARN luaren, woaren daut Launt oawen.” Ekj jleicht daut sea, daut aul deejanje dise Hopninj hauden, waut soo läwen wudden, aus Gott daut haud loten en de Schreft oppschriewen.

Oba mie foll daut sea schwoa, mie to endren un soo to läwen, aus de Schreft daut haben wull. Ekj wia stolt, wäajen ekj goot wiedakjeem met de Musikj un met molen. Un ekj must daut lieren, deemootich to sennen. Un daut wia fa mie uk nich leicht, daut orreine Läwen tochtoloten. Ekj sie Jehova sea dankboa doafäa, daut hee jeduldich un metfeelent es un deejanje vejeft, waut soo läwen wellen, aus de Schreft daut sajcht.

De Kommunismus un de Gloowen, daut et kjeenen Gott jeef, deeden de ieeschte 18 Joa en mien Läwen sea väl aun mie. Oba lota veendad de Schreft mien Läwen gaunz. Waut ekj lieed, holp mie, daut ekj nich mea soo besorcht wia äwa de Tookunft un daut ekj wist, to waut ekj läwd. Aune 1993 leet ekj mie dan aus eent von Jehova siene Zeijen deepen, un aune 2000 befried ekj mie met Tabitha, eene sea flietje Sesta. Wie nämen ons soo väl Tiet aus mäajlich, om aundre von de Schreft to lieren. Väle von dee, waut wie trafen, sent uk mank de Kommunisten oppjewossen un jleewen, daut et kjeenen Gott jeft. Ekj feel mie sea tofräd, wan ekj soone halpen kaun, Jehova kjanen to lieren.

Aus ekj mie aunfunk met Jehova siene Zeijen auftojäwen, wieren miene Elren sea besorcht doaräwa. Oba dee haben jeseenen, woo goot daut fa mie wia, daut ekj met Jehova siene Zeijen toop wia. Ekj frei mie sea, daut dee nu de Schreft läsen un no de Toopkomes von Jehova siene Zeijen komen.

Tabitha un ekj haben een scheenet befriedet Läwen, wäajen wie ons opp iernst aun dän Rot von de Schreft hoolen. Biejlikj sajcht de Schreft, daut wie ons sellen unjarenaunda tru bliewen, un daut stoakjt ons, daut wie noch dolla veeent sent (Hebräa 13:4).