Ne fanau au i se fa‵kai i Saxony, i te taimi ne pule mai ei a te Malo mua o Siamani ki Saegala (GDR). Ne lagona ne au te atafai mo te alofa i te motou kāiga. Kae ne akoako mai ne oku mātua a amioga ‵lei. A te GDR se fa‵kai kominisi, tela la, e se tāua a lotu ki te tokoukega o tino i Saxony. Ne seki talitonu au me e ola te Atua. Konā a manatu e lua kolā ne fakavae ki ei a te 18 tausaga muamua o toku olaga: ko te sē talitonu me e ola te Atua mo te pulega Kominisi.

Kaia ne gali ki a au a te pulega Kominisi? Ona ko te mea ne fiafia au ki te manatu me e ‵pau a tino katoa. E se gata i ei, ne talitonu au me e ‵tau o tufatufa faka‵lei i se auala ‵pau a mea katoa, ona ko te mea e mafai o fakagata aka ei a te mau‵mea mo te ma‵tiva malosi o nisi tino. Tela la, ne fakalavelave malosi au i te fakapotopotoga talavou a te kau Kominisi. I te taimi ko 14 ei oku tausaga, ne fakamāumāu ne au a taimi e uke i se polotieki tau te enivalomene ke fakaaoga faka‵lei a pepa kolā ko ‵pei. Ne fia‵fia malosi a tino o te fa‵kai o Aue ki aku taumafaiga, telā ne tuku mai i ei ne tino pule‵pule i ei se fāiloga. E tiga eiloa koi foliki au, ne iloa ‵lei au ne nisi tino fakapolitiki ma‵luga i te GDR. Ne mafaufau au me ne tonu te fakamoemoega ne kausaki au ki ei kae e foliga gali mai toku olaga i aso mai mua.

Kae ne ‵galo fakavave atu oku fakamoemoega katoa. I te 1989, ne malepe te Pui o Berlin mo tena potukau Kominisi i Eulopa ki te Saegala. Ne taotaomaki mai eiloa a mea faka‵poi e uke. E seki leva kae ne iloa aka ne au me ne lauiloa a faifaiga sē fakamaoni i te GDR. E pelā mo te sē fai faka‵lei ne latou a tino kolā ne ‵teke atu ki te pulega Kominisi. Ne tupu pefea te mea tenā? E a, e se tali‵tonu tatou, te kau Kominisi, me e ‵pau a tino katoa? E mata, a te pulega Kominisi se mea fakaloiloi fua? Ne kamata o maua ne au a lagonaga manavase.

Tenā ne kamata ei o ‵fuli a mea kolā e fakatāua ne au kae saga tonu atu ki pese mo te ‵lomi ata. Ona ko te mea ne mafai o kau atu au ki se akoga mō pese—mo te mafaufauga ke oko atu au ki te iunivesiti—ne manako au ke fai pelā me se tino usuusu mo se tino ‵lomi ata. E se gata i ei, ne fulitua atu au ki amioga ‵lei kolā ne tauloto ne au i taku folikiga. A te mea telā ko tāua atu nei ki a au, ko te ola fiafia fua, telā e aofia i ei a te fai famau mo tama‵liki fā‵fine kese‵kese i te taimi e tasi. Kae ko pese, te ‵lomi ata, mo se olaga fai valevale ne seki fakafeoloolo aka ei oku lagonaga manavase. Ke oko ki aku ata ne ‵lomi, ne fakaata atu i ei a lagonaga mataku. Ne a mea ka ‵tupu i aso mai mua? Kae se a te aoga o te olaga?

 I te taimi ne maua ei ne au a tali kolā ne salasala au ki ei, ne ofo masei au i ei. I te afiafi e tasi i te akoga, ne saga‵saga matou mo se potukau o tama‵liki a‵koga o sau‵tala ki aso mai mua. A Mandy * se tamaliki akoga kae se Molimau a Ieova foki. I te afiafi tenā, ne fakasino mai ne ia ki a au a te auala tonu. Ne fai mai tou fafine: “Andreas, kafai e manako koe ki tali o au fesili e uiga ki te olaga mo aso mai mua, toe onoono faka‵lei ki te Tusi Tapu.”

Ne fakalotolotolua kae ne fia logo foki au, kae ne manumalo te fia logo i te aso tenā. Ne fakaasi mai ne Mandy a te Tanielu mataupu e 2, kae ne poi malosi au i mea ne faitau ne au i ei. E fakamatala mai i te valoaga tenei a te fakasologa o malo ma‵losi, ko pulega kolā ne ‵tau o pule mai ke oko ki ‵tou aso nei. Ne fakaasi mai ne Mandy a nisi valoaga i te Tusi Tapu e uiga ki ‵tou aso mai mua. Ne fatoa maua eiloa ne au a tali ki aku fesili. Kae ko oi ne tusi ne ia a valoaga konā, kae ko oi foki e mafai o ‵valo tonu mai ne ia a mea kolā ka ‵tupu i aso mai mua? E mata, e e fakauiga i ei me e ola te Atua?

Ne fakatoka ne Mandy ke fetaui matou mo Horst mo Angelika, se tauavaga Molimau kolā ne fesoasoani mai ke momea aka toku malamalama i te Muna a te Atua. Ne lavea fakavave ne au me ko Molimau a Ieova fua, ko te fakapotopotogā lotu telā e fakaaoga kae fakasino atu faeloa ki te igoa totino o te Atua, ko Ieova. (Salamo 83:18; Mataio 6:9) Ne iloa aka ne au me e tuku mai ne Ieova te Atua a te avanoaga ki tino ke mafai o ola ki te se-gata-mai i te lalolagi palataiso. E fai mai te Salamo 37:9: “Kae ko latou kolā e fakamoe‵moe ki a Ieova ka fai mō latou te lalolagi.” Ne gali ki a au me e tuku atu te fakamoemoega tenei ki tino katoa e taumafai o ola e ‵tusa mo tulaga o te Atua i mea tau amioga kolā e fakamatala mai i te Tusi Tapu.

Kae ne faigata ki a au ke ‵fuli oku auala ko te mea ke ola e ‵tusa mo te Tusi Tapu. A toku iku manuia e pelā me se tino usuusu kae ‵lomi ata, ne fai ei ke fakamatamata au, tela la, ne ‵tau o fakamasani au ki te loto maulalo. E sili atu i ei, ne seki faigofie ke tiakina ne au toku olaga fai valevale i mea tau amioga. Ko oko eiloa i toku loto fiafia me ne fakaasi mai ne Ieova a te kufaki, te alofa fakamagalo, mo te malamalama ki tino kolā e taumafai malosi ke fai a mea kolā e akoako mai i te Tusi Tapu!

Ne fakavae a te 18 tausaga muamua o toku olaga ki te pulega kominisi mo te sē talitonu me e ola te Atua; ne ‵fuli ne te Tusi Tapu toku olaga talu mai te taimi tenā. A mea ne tauloto ne au ne fai ei ke galo atu toku manavase ki aso mai mua kae ko mafai o maua ne au se olaga aoga. I te 1993, ne papatiso au pelā me se Molimau a Ieova, kae i te 2000, ne avaga māua mo Tabitha, se tuagane talitonu loto finafinau. Ne fakamāumāu ne māua a taimi e uke e mafai ne māua ke fesoasoani ki nisi tino ke iloa ne latou te Tusi Tapu. Ne fetaui matou mo tino e tokouke kolā e ‵pau mo au, se tino telā ne fakavae tena olaga ki te pulega Kominisi mo te sē talitonu me e ola te Atua. Ko maua nei ne au a te lotomalie sili māfai e fakaasi atu ne au a te auala ke iloa ne latou a Ieova.

I te taimi ne kau muamua atu au ki Molimau a Ieova, ne ‵poi malosi oku mātua. Kae ne lavea ne lāua a ikuga ‵lei i toku olaga ona ko te kau atu ki Molimau. Ne fiafia malosi au me ko fai‵tau nei lāua ki te Tusi Tapu kae ko ‵kau atu ki fakatasiga Kelisiano a Molimau a Ieova.

Ne maua ne māua mo Tabitha se olaga avaga ‵lei, me e taumafai māua ke tau‵tali fakapili‵pili atu ki pati fakatonutonu i te Tusi Tapu mō tauavaga. E pelā mo te fakalogo ki pati fakatonutonu i ei e uiga ki te fakamaoni i te avaga, ne fakamalosi aka faeloa i ei te mā olaga avaga.—Epelu 13:4.

Ko se toe mataku au ki mea ‵tupu i te olaga io me manavase ki aso mai mua. Ko fai au mo vaega o se kāiga o taina tali‵tonu i te lalolagi kātoa, telā e maua i ei te filemu mo te fealofani. I loto i te kāiga tenei, e mafau‵fau matou me e ‵pau a tino katoa. Tenā loa te mea ne talitonu au ki ei kae ne manako au ke kausaki atu ki ei i toku olaga kātoa.