Zaho teraka tamy tanàna hely araiky ta Saxe. Tamy zen̈y, izio an̈isany Repobliky Demokratikiny Allemagne (RDA). Tsara mare fiain̈ananay tran̈o araiky sady zahay nifankatia. Ry olobeko nampianatra zaho ho tsara fitondranten̈a. RDA io tany koministy, ke ankamarozanolo tan̈y tsy pivavaka. Taminaka, Zan̈ahary zen̈y tsisy. Firaka zaho 18 taon̈o, zaho tombo tan̈aty fampianaran̈a Koministy ndreky tsy nino fisiany Zan̈ahary.

Amy Koministy, olo jiaby mitovy fo. Fomba fihevitry zen̈y ten̈a nahavy zaho ho tia fikambanan̈a io. Zaho nino fa izikoa zarain̈a mitovy fanan̈ananolo jiaby, tsisy eky olo pan̈arivo ndreky masikiny mare zen̈y. Ke zaho niditry tamy fikambanan̈any tanora koministy. Tamy zaho 14 taon̈o, zaho nan̈ano asa hiarovan̈a tontolo iain̈ana; taratasy niasa amboarin̈y baka ho afaka ampiasain̈a koa. Nankasitrahany tanànany Aue, a Saxe an̈y mare ezaka nataoko io, ke zaho namiandro kadô. Nanjary fankahay tamy pan̈ano politiky malaza ta RDA koa zaho, nata mbala tanora. Zaho nieritreritry fa ten̈a izy tanjon̈onaka io, ke ho tsara mare hoavinaka.

Tampoko tio, niova fiain̈ananaka. Taminy 1989, rongana Ribany Berlin. Ravan̈a koa firenena maromaro tan Eropy Antin̈iana, nanohan̈a kominisma. Nanjary haiko koa fa kaiky nisy fo tsy rariny ta RDA io tao. Ohatra ziô, lan̈ianolo tsy nanohan̈a Kominisma io, navakavahin̈y. Izio ma tsy mitovy fo olo jiaby? Fitaka fo zen̈y kaiky Kominisma io? Zaho niasaloha mare.

Nifantoko tamy lamoziky ndreky sary foeky zaho. Nanjary tihahay lamoziky mare zaho. Zaho baka afaka nianatra tamy lekoly fianaran̈a lamoziky, sady afaka nanohy izio taminy iniversite. Efa tsy nijireko foeky koa raha tsara nampianarindry olobeko zaho tamy zaho mbala hely in̈y. Raha ten̈a naventy taminaka misôma donia. Zaho, ohatra, niaraka tamy man̈angy maro. Fa na zen̈y, zaho mbala niasaloha fo. Nisy raha nampavozo zaho. Firaka amy sary nataoko nahitan̈a raha zen̈y. Han̈ano karakory eky hoavinaka? Nan̈ino fo ma zaho ty nisy?

Gaga oe zaho izikoa fa nahita valiny fan̈ontanian̈a aby nampiasaloha zaho in̈y. Ariva araiky zay, zaho ndreky piaramianatra taminay vitsivitsy nikoran̈a momba ny hoavy. Mandy koa niaraka taminay tio. Izy Vavolombelon̈o Jehovah. Namiany hevitry tsara be zay zaho taminio. Hoizy: “Andreas, anao koa tihahita valiny fan̈ontanian̈anao momba fiain̈ana ndreky ny hoavy, mangalà fotoan̈a handinihan̈a tsara Baiboly.”

Tsy ten̈a naharesy lahatra zaho raha nivolan̈iny in̈y, kanefa narehako fo. Nirahiny Mandy nizahako Daniela toko faha 2. Gaga mare zaho koa fa baka namaky faminanian̈a io. Koran̈iny ao aby firenena matanjaka nifandimby tambony tany teto taloha tan̈y ndreky firaka zioty. Nan̈aboahany Mandy faminanian̈a hafa tamy Baiboly tao koa zaho. Hitako fo valiny fan̈ontanian̈anaka aby in̈y! Azovy fo ma nanoratra faminanian̈a aby in̈y? Avio azovy ma ten̈a mahavita man̈ambara raha mbala hoavy? Izio ma Zan̈ahary io misy ankitin̈y?

Zaho niprezanteny Mandy taminy Horst ndreky Angelika, olo fivadiany, Vavolombelon̈o Jehovah zay. Iro nan̈ampy zaho hahay tsara Baiboly. Tsy ela, efa hitako fa Vavolombelon̈o Jehovah zaraiky fo fivavahan̈a ten̈a mampiasa an̈aran̈a Zan̈ahary, ndreky man̈ambara izio aminolo. (Salamo 83:18; Matio 6:9) Nianarako koa fa Jehovah nan̈amia olombelon̈o jiaby fan̈antinan̈a hiain̈y mandrakizay ambony tany eto, lera izity ivoany paradisa. Koran̈iny Salamo 37:9: “Zay olo man̈anten̈a Jehovah fo handova tany ty.” Ten̈a maharavoravo mahay fa hahazo kadô zen̈y lan̈iany miezaka mare man̈araka fitsipiky Zan̈ahary momba fitondranten̈a amy Baiboly ao.

Na zen̈y, tsy nora taminaka niova. Zaho baka nanjary olo poerapoera, fotony nanjary nalaza tamy lamoziky ndreky sary. Ke ten̈a nila nianatra nanetry ten̈a mare zaho. Ten̈a tsy nora taminaka koa voly tamy fitondranten̈a ratsy. Man̈ano mersy Jehovah mare zaho, fotony izy nanampaharetan̈a ndreky namindra fô taminaka. Tsapany fa ten̈a tsy mora aminolo sasany mifen̈y man̈araka raha ampianariny Baiboly zen̈y.

Firaka zaho18 taon̈o, fampianaran̈a Koministy raha ten̈a nampianarin̈y zaho. Zaho koa tsy nino fisiany Zan̈ahary zen̈y. Ke Baiboly io ten̈a nan̈ova fiain̈ananaka mare. Zaho efa tsy niasaloha momba ny hoavy eky, baka io nanjary nisy dikany oe koa fiain̈ananaka. Natao batisa taminy 1993 zaho, ke nanjary Vavolombelon̈o Jehovah. Zaho baka tio nanambady Tabitha, tamy taon̈o 2000. Izy miaraka mivavaka aminay sady mazoto koa. Zahay ziô manokana fotoan̈a be han̈ampian̈a olo hafa hahay raha koran̈iny Baiboly. Maro aminolo aby io manan̈a fiain̈ana nitovy tamy ninaka taloha; iro sady tsy mino Zan̈ahary sady Koministy koa. Zaho ten̈a ravoravo ndreky mahatsiaro afapo izikoa fa man̈ampy iro hahay Jehovah.

Tamy zaho vo nianatra Baiboly tamy Vavolombelon̈o Jehovah, neloko mare ry olobeko. Fa tafara tatỳ, hitandro fa kaiky nisy vokany tsara taminaka fo izio. Zaho ten̈a ravoravo fotony iro zioty efa mamaky Baiboly ndreky mandeha mivory miaraka amy Vavolombelon̈o Jehovah.

Mahatsiaro sambatra zahay roeny Tabitha, fotony zahay mifen̈y man̈araka torohevitriny Baiboly momba vadian̈a. Koran̈iny ao, ohatra, fa tsy tokony hivadiky amy vadiny olo araiky manambady. Narehanay torohevitry zen̈y, ke nahaifatatra fo vadian̈anay.—Hebreo 13:4.

Zaho efa tsy miasaloha momba ny hoavy eky. Haiko fa zaho an̈isany fianakaviambeny pirahalahy erantany. Ten̈a mihavan̈a ndreky miray sain̈y fianakavian̈a io. Ao tsisy fan̈avakavahan̈a zen̈y, fa olo jiaby ao mitovy fo. Efa zen̈y edy raha niriko letrizay.