Síijen tiʼ junpʼéel u kaajil Sajonia, le úuch kaʼachoʼ tiaʼan tu luʼumil República Democrática Alemanaeʼ (RDA). In taataʼobeʼ jach u yaabiltmenoʼob yéetel tu kaʼansoʼobten baʼax maʼalob. U máakiloʼob le Luʼum tuʼux kajaʼanen kaʼachoʼ comunistaʼob, le oʼolal tu mejen kaajiloʼob Sajoniaeʼ óoliʼ mix máak yaan u religión. Desde tin paalil tak ka tu tsʼáajten 18 añoseʼ maʼatech in creertik Dios, tsʼoʼoleʼ comunistaen.

Jatsʼuts in wilik le baʼax ku beetik le comunistaʼoboʼ tumen ku creertikoʼob tuláakal máak igual. Ku creertikoʼob xaneʼ utiaʼal maʼ u yantal máaxoʼob ayikʼaloʼob yéetel máaxoʼob óotsiloʼobeʼ, tuláakal le ayikʼalil yaan teʼ luʼumoʼ kʼaʼabéet u tʼoʼoxol. Teneʼ tin woksinba ichil u jaats táankelmoʼob comunistaʼob. Le ka tu tsʼáajten 14 añoseʼ tin beetaj junpʼéel meyaj utiaʼal u yilaʼal bix jeʼel u kaʼa meyaj le juʼunoʼ. U autoridadil u kaajil Aueeʼ jach maʼalob tu yilil le meyaj tin beetoʼ hasta tu tsʼáajoʼobten junpʼéel premio. Kex táankelmeneʼ tin kʼaj óoltaj jujuntúul u autoridadiloʼob le luʼumoʼ. Como yaʼab baʼaloʼob tsʼoʼok kaʼach in beetkeʼ tin tuklaj jach maʼalob kun binteneʼ.

Chéen baʼaleʼ kʼaschaj u yokil. Tu añoil 1989, juʼut u baʼpakʼiloʼob Berlín yéetel xuʼul xan le comunistaʼob yaan Europa del Esteoʼ. Teʼ káaj in tsʼáaik cuenta yaʼab baʼaloʼob maʼ maʼalobtak táan u beetaʼal kaʼach ichil le comunistaʼoboʼ. Tin wojéelteʼ tu mixbaʼalkúuntoʼob le máaxoʼob maʼatech u tuukuloʼob jeʼex letiʼoboʼ. ¿Baʼaxten tu beetoʼob baʼal beyoʼ? Si ku kaʼanskoʼobeʼ tuláakal máak igual. ¿Chéen wa tuusnajoʼob? Le baʼax úuchaʼ tu beetaj in jach chiʼichnaktal.

Desde teʼ kʼiinoʼob jeʼeloʼ kʼexpaj in tuukul. Ka túun ooken tiʼ junpʼéel escuela tuʼux ku kaʼansaʼal paax yéetel káaj u yutstal tin wich pintar. In tuukul kaʼacheʼ in wokol universidad yéetel in kʼaj óoltaʼal bey juntúul músico yéetel pintoreʼ. Tin xúumpʼattaj tuláakal le baʼaloʼob maʼalobtak kaʼansaʼabten tin chichniloʼ. Chéen in kʼáat kaʼach in divertirtinba, tsʼoʼoleʼ maʼ chéen yéetel juntúul x-chʼúupal kin biskinbaiʼ. Pero kex kin paax, kin pintar yéetel kin divertirkinbaeʼ maʼ kiʼimak in wóoliʼ. Tak le baʼaxoʼob kin pintartik ku yeʼesik bix in wuʼuyikinbaoʼ. Mantatsʼ kin tuklik kaʼachi: ¿Bix kun tsʼoʼokol le yóokʼol kaabaʼ? ¿Baʼaxten kuxaʼanoʼon?

 Ka tin wojéeltaj u núukil le kʼáatchiʼobaʼ pʼáat jaajap in chiʼ. Junpʼéel tarde tiaʼanen teʼ escuelaoʼ, in wéet xookoʼobeʼ káaj u tsikbaltikoʼob baʼax ku taal u kʼiin. Ichiloʼobeʼ tiaʼan kaʼach Mandy, * juntúul x-chʼúupal u j-jaajkunaj Jéeoba. Letiʼeʼ tu tsʼáajten junpʼéel maʼalob consejo: «Andreas, wa taak a wojéeltik baʼax ku taal u kʼiin yéetel baʼaxten kuxaʼanoʼoneʼ xok le Bibliaoʼ».

Maʼ tin jach creertaj le baʼax tu yaʼaloʼ, pero taak in wojéeltik wa jaaj. Mandyeʼ tu yeʼesajten le capítulo 2 tiʼ Danieloʼ, ka tin xokeʼ jaʼakʼ in wóol. Le profecíaaʼ ku tʼaan tiʼ yaʼab gobiernoʼob tu beetoʼob baʼaloʼob tak bejlaʼa táan u afectarkoʼoneʼ. Tsʼoʼoleʼ tu yeʼesaj xan ten uláakʼ profecíaʼob kun béeytal maʼ tun xáantal. Bey úuchik in wojéeltik u jaajiloʼ. Joʼopʼ in tuklik: «¿Máax tsʼíibt le profecíaʼoboʼ? ¿Máax aʼal jach baʼax kun úuchul? ¿Jach wa túun jaaj yaan Dios?».

Mandyeʼ tu presentartajten Horst yéetel Angelika, u yatan. Letiʼobeʼ u j-jaajkunajoʼob Jéeoba yéetel tu yáantenoʼob in kan baʼax ku kaʼansik le Bibliaoʼ. Séeb úuchik in tsʼáaik cuenta chéen u religionoʼob usartik u kʼaabaʼ Dios yéetel ku kaʼanskoʼob tiʼ uláakʼ máak (Salmo 83:​18, NWT; Mateo 6:​9). Tin kaneʼ Jéeobaeʼ u kʼáat ka kuxlak máak tiʼ junpʼéel paraíso way Luʼumeʼ. Salmo 37:9, ku yaʼalik: «Le máaxoʼob ku kʼubik u yóoloʼob tiʼ Jéeobaoʼ yaan u pʼáatloʼob way luʼumeʼ». Kiʼimakchaj in wóol úuchik in kanikeʼ le máaxoʼob ku kuxtaloʼob jeʼex uts tu tʼaan Diosoʼ yaan u kʼamkoʼob le jatsʼuts bendicionaʼ.

Chéen baʼaleʼ maʼ chéen chʼaʼabil úuchik in beetik baʼax ku kaʼansik le Bibliaoʼ. Kʼaʼabéet kaʼach in weʼesik kabal óolal tumen ikil in beetik in musicoil yéetel in pintorileʼ jach kaʼanchaj in wich. Talam tin wilil in pʼatik le kʼaakʼas kuxtal yaanten kaʼachoʼ. Le oʼolal jach kin tsʼáaik gracias tiʼ Jéeoba ikil u yeʼesik utsil, paciencia yéetel yaabilaj tiʼ le máaxoʼob ku tsʼáaik u yóol u beetoʼob baʼax ku yaʼalik le Bibliaoʼ.

Dieciocho años tin kʼubinba tiʼ le comunismooʼ yéetel maʼatech in creertik Dios, pero le Bibliaoʼ tsʼoʼok u kʼexik in kuxtal. Le baʼax tin kanoʼ tu yáanten utiaʼal maʼ in sen chiʼichnaktal tu yoʼolal baʼax ku taal u kʼiin yéetel tu beetaj u kiʼimaktal in wóol. Tu añoil 1993, okjaʼanajen bey u j-jaajkunaj Jéeobaeʼ. Teʼ año 2000, tsʼoʼok in beel yéetel Tabitha, juntúul x-chʼúupal u kʼubmaj u yóol u meyajt Jéeoba. Tu kaʼatúulaloʼon k-máansik yaʼab tiempo utiaʼal k-kaʼansik tiʼ uláakʼ máakoʼob baʼax ku yaʼalik le Bibliaoʼ. Yaʼab tiʼ le máakoʼobaʼ jach bey u tuukuloʼob jeʼex teen kaʼachoʼ. Kiʼimak in wóol ikil in wáantkoʼob u kʼaj óoltoʼob Jéeoba.

Ka káaj in muchʼkinba yéetel u j-jaajkunajoʼob Jéeobaeʼ jaʼakʼ u yóol in papá yéetel in maama. Chéen baʼaleʼ tsʼoʼok u tsʼáaikoʼob cuenta yaʼab utsil tsʼoʼok u taasikten. Bejlaʼeʼ jach kiʼimak in wóol tumen táan u xokikoʼob le Bibliaoʼ yéetel ku binoʼob muchʼtáambal.

Teen yéetel Tabithaeʼ k-ilik k-tsʼáaik ichil k-kuxtal le tsolnuʼukoʼob ku yaʼalik Dios tiʼ le máaxoʼob tsʼokaʼan u beeloʼoboʼ. Le Bibliaoʼ ku kaʼansikeʼ maʼ unaj k-tusik k-núupiʼ, lelaʼ tsʼoʼok u beetik k-maas yaabiltikba yéetel u yantaltoʼon kiʼimak óolal (Hebreos 13:4).

Bejlaʼeʼ kiʼimak in wóol tumen in wojel baʼax ku taal u kʼiin. Tiaʼanen ichil le máaxoʼob ku meyajtikoʼob Jéeoba teʼ yóokʼol kaabaʼ. Ichiloʼobeʼ ku yeʼesaʼal yaabilaj, junmúuchʼ u meyajoʼob yéetel mix máak creertik wa maas maʼalob tiʼ uláakʼ. Lelaʼ letiʼe baʼax tin tsʼíiboltaj desde tin paaliloʼ.