Chapwa chachikalu kutachikiza wana uze namumona ngwenu nge namuuhana mutu mwasakwilila. Mutu mwatambula wana kana ikiye mwasolola numba nge waulemu nyi chiku. Kaha nawa wana mwasakwilila mutu umwe, mutu weka mwaumona nge wamokomoko.

Chakutalilaho, mukweze nahase kusakwilila chikuma nge navamuhana shinga chipwe likina vavuluka ngwavo tablet. Oloze mukulwane nahase kusakwilila chikuma nge mumuhana wana weka. Muvisemwa vimwe, wana vasaka vatu vosena vapwa vanyike chipwe vakulwane shina jimbongo, mwomwo mutu nahase kulanda kala vyeshovyo nasake.

Chamokomoko navyumevi, vatu vavavulu veji kutondatondanga wana wamwenemwene uze vanahase kuhana vatu vazanga. Numba tuhu chapwa chachikalu kuwana wana wamwenemwene, oloze kushinganyeka havishina evi natushimutwila nachimikafwa. Tushimutwilenu vishina viwana vize vinahase kulingisa mutu mwatambula wana asakwilile chikuma.

Vyuma azanga mutu muli nakusaka kuhana wana. Lunga umwe wakunote yanganda yaBelfast, muIreland, ambile ngwenyi kinga yakuhemesa vamuhanyine omu apwile namyaka 10 chipwe 11 yapwile wana wakulipwila chikuma. Mwomwo ika? Ambile ngwenyi: “Mwomwo ngwazangile kupwa nakinga.” Awa mazu asolola nge vyuma azanga mutu vikiko vinahase kumulingisa asakwilile hawana navamuhana chipwe chiku. Ngocho shinganyekenu hamutu muli nakusaka kuhana wana. Shinganyekenu vyuma amona kupwa vyavilemu, mwomwo vyuma kana vikiko azanga. Chakutalilaho, tushinakaji vazanga kushikama navatanga javo. Vasaka kumona vana vavo navazukulu javo kuswakumwe. Kuvatambukila chipwe kuvasanyika vamitambukile chinahase kupwa wana waulemu kuli vakiko kuhambakana kuvahana chuma.

Chuma nachimikafwa mutachikize vyuma asaka mutu shina kwivwililanga kanawa. Mbimbiliya yatukolezeza, ‘twanguhwenga kwivwilila, tushipwokelenga kuhanjika.’ (WaYakova 1:19) Omu namushimutwilanga hakumbi hakumbi namasepa navausoko, mwatela kuvevwililanga kanawa mangana mutachikize vyuma vasaka navize kavasakako. Kulinga ngocho nachimikafwa muhane mutu wana uze mwazanga chikuma.

 Vyuma nakalikiza mutu muli nakusaka kuhana wana. Mutu nahase kusakwilila hawana navamuhana numba vene waundende kachi nge wana kana naumukafwa. Uno munahase kutachikiza ngachilihi vyuma nakalikiza mutu?

Pamo chinahase kupwa chamwaza kuhulisa mutu amilweze vyuma ali nakusaka mumuhane. Oloze vaka-kuhana vavavulu veji kwivwanga kuwaha kuhana chuma mutu mukukasumuna. Kaha nawa vatu vamwe vanahase kukasunuka kumilweza vyuma vasaka navize kavasakako, oloze nachipwa chachikalu kumilweza vyuma vanakalikiza.

Shikaho pwenunga vakuvanguluka nakutalanga kanawa hachiyoyelo chamutu. Uno mutu muli nakusaka kuhana wana apwa kanyike tahi, nyi mukulwane, nyi mujike, nyi atwama muulo, nyi alukuluka, nyi tuliwe, nyi atwama hamilimo, nyi atambula litayamende? Shinganyekenu hawana uze unahase kukafwa mutu uze ali muukalu.

Hakusaka mutachikize vyuma nakalikiza mutu uze muli nakusaka kuhana wana, hulisenu vatu vaze vayoyaho lyehi chiyoyelo ali nakuyoya mutu kana. Vanahase kumilweza vyuma vize kavatachikiza vatu vavavuluko. Ngocho munahase jino kuhana wana uze mwazanga chikuma nakumukafwa nawa mukuyoya chenyi.

Lwola lwakutamo lwakuhana mutu wana. Mbimbiliya ngwayo: “Mazu akuhanjika halwola lwakutamo anapu amwaza.” (Vishimo 15:23) Echi chisoneka chasolola nge, kuhanjika mazu amwaza halwola lwakutamo chinahase kukolezeza chikuma mutu. Chochimwe navyuma natulinga nawa. Nganomu mazu navahanjika halwola lwakutamo anahase kukolezeza mutu, nawana uze navahana halwola lwakutamo unahase kunganyalisa mutu mwautambula nakumwivwisa kuwaha.

Shinganyekenu halwola lwamwaza munahase kuhana wana. Chakutalilaho nge sepa lyenu ali nakusaka kumbata chipwe kusomboka. Mukweze kalinwomu amanyise shikola. Vapwevo nalunga kalinwomu vapwenga namwana. Vamwe vachiwana kupwa chamwaza kusonekanga vilika vili nakwiza kulutwe. Mwomwo kulinga ngocho cheji kuvakafwanga vashinganyekele chimweza wana wamwaza wakuhana vakwavo halwola lwakutamo. *

Tuyokutuyoku nawa, kanda kuvandaminanga vilika numba jino muhane vakwenu mawanako. Munahase kupwa vakuwahilila kala lwola namuhana wana. Oloze nawa mwatela kuzangama. Chakutalilaho, nge lunga mwahana pwevo wana okunyi nevi viliho vyauchi, uze pwevo mwashinganyeka ngwenyi ou lunga namuzange, kaha ali nakusaka kukamumbata. Kuvanga kaha nge lunga naikiye ali navishinganyeka vyovimwe, nge pimbi kaha wana kana unahase kuneha ukalu navikokojola. Ngocho twatela kushinganyeka hachishina chikwavo chachilemu, chishina kana shina vyuma ali nakushinganyeka uze ali nakuhana wana.

Vyuma ali nakushinganyeka uze ali nakuhana wana. Nganomu tunashimutwila muchakutalilaho echi chinafumuho, chapwa chamwaza kukekesa vyuma mwashinganyeka uze natuhana wana wetu. Kaha nawa mutu uze ali nakuhana wana atela kutachikiza ovyo ali nakuhanyina wana kana. Numba tuhu vatu vamwe veji kwivwanga kuwaha kuhana vakwavo mawana, oloze vavavulu veji kuhananga vatu mawana havilika vimwe mwomwo mwakulingila mwauchi. Veka nawa veji kuhananga mawana mangana uze navahana avalingileko vyuma vimwe vyamwaza chipwe navakiko avahane wana.

Vyuma muka mwatela kulinga mangana muhanenga mawana chakufuma kumuchima wenu? Mbimbiliya yamba ngwayo: “Vyuma vyenu vyosena vilingenunga muzangi.” (Wavaka-Kolinde 1, 16:14) Kachi nge namuhana vatu mawana mwomwo yakuvazanga nakuvazakama, kaha navawahilila chikuma hakutambula wana kana nakumilingisa nawa nayenu muwahilile chikuma mwomwo yakupwa namuchima wazumbu. Nge namuhananga mawana akufuma kumuchima, kaha naSenu  wamwilu mwevwa kuwaha. Kaposetolo Paulu asangejekele vaka-Kulishitu vamuKolinde vaze valisuwile namichima yavo yosena kuhana vyuma vyakukafwa vakwavo vaka-Kulishitu muYuleya. Paulu avalwezele ngwenyi: “Kalunga azanga muka-kuhana nakuwahilila.”—Wavaka-Kolinde 2, 9:7.

Kushinganyeka chikuma havishina evi tunashimutwila nachitukafwa tuhanenga mawana aze nawevwisanga vakwetu kuwaha. Vishina kanevi navyeka vikiko vyakafwile Kalunga ahane wana waunene chikuma uze vasaka vatu vosena. Wanenu wana kanou waulemu hakutanga chihande chinakavangizaho.