Semi ouij tikmatiskej toni netetayokolil uelis kiyolpaktis akin tiknekij tikmakaskej teisa. Tein melauj, akin kiselia netetayokolil kinextis ox kipatiuita oso amo. Tein aksa kiita ke kitelpia ipatiuj xa okse aksa amo ijkon kiita.

Se telpoch oso se ichpoch xa kijtos ke tepos tein yankuixtok kisak yejua okachi kuali netetayokolil. Sayoj ke, se akin ueyiya xa okachi kipatiuitas kiselis teisa tein ichankauan mopanoltilijtiyouij. Uan itech seki xolalmej, telpochmej, ichpochmej uan akin uejueykej okachi kiuelitaj kiseliskej tomin uan ijkon kikuiskej itech tein yejuan kinekiskej.

Maski ijkon, miakej mochikauaj kiajsiskej okachi kuali netetayokolil tein uelis kimakaskej akin kitasojtaj. Maski amo nochipa uelis tikajsiskej, moajsi tein tapaleuis maj titemakakan se kuali netetayokolil. Tikitaskej naui taman tein tapaleuis maj netetayokolil tein tiktemakaskej kuali kiselikan.

Tein kinejneki akin kiselia netetayokolil. Se takat akin kayot Belfast (Irlanda del Norte), kijtoua ke bicicleta tein kimakakej keman kipiaya 10 oso 11 xiujmej katka okachi kuali netetayokolil tein kiseliani, porin kitelnekia kipias se. Nejon kinextia ke yeski se kuali netetayokolil komo tein tiktemakaj yejua tein kinekia kipias. Xiontanemili itech akin tikonneki tikontayokolis teisa. Xikontemo tikonmatis toni taman kipatiuita porin nejon mouika ika tein kinejneki. Akin kipiaj ininixuiuan kipatiuitaj moajsiskej iniuan ininkalyetouanij. Xa kinejnekij miakpa kinitaskej ininkoneuan uan ininixuiuan. Komo kinyoleuaj maj iniuan takuatij, teueyitatmej okachi kipatiuitaskej nejon ke tein yeski taman tein kinmakaskej.

Uelis tikonmatis tein aksa kinejneki kipias komo kuali tikonkaki. Biblia kijtoua: “Ximoijsiuilikan para xikakikan [...]. Pero xiyolikachiakan para xitajtokan” (Santiago 1:19). Keman tiontajtos  iniuan akin kuali tionmouika uan iniuan mokalyetouanij, xikonnejmachkaki keman kijtoskej tein kiuelitaj. Ijkon amo mitsonouijmakas tikontayokolis tein kinyolpaktis.

Tein kipoloua akin tiknekij tiktayokoliskej teisa. Keman se netetayokolil kipaleuia akin tikmakaj maski amo ueyi, semi kipatiuita. ¿Keniuj uelis tikmatiskej tein aksa kipoloua?

Tapaleuiskia maj se kitajtani tein kineki. Sayoj ke, miakej kinemiliaj ke amo yeskiaok kemej ijkuak amo kimati tein kitayokolitij; ta kinekij kimakaskej keman amo kichia. Uan no, maski moajsij akin kijtouaj tein kiuelitaj uan tein amo, xa amo kijtouaj tein kinpoloua.

Yejua ika, kuali xikonita tein kipanotok akin tikonneki tikontayokolis teisa. ¿Telpoch, ichpoch, ueyiya, iselti, kipia inamik oso amook? ¿Tekiti oso amook? Uan satepan xikonnemili toni taman netetayokolil uelis kipaleuis.

Uelis tikonmatis toni yekmelauj kipoloua akin tikonneki tikontayokolis teisa, komo tiontajtoua iniuan akin kipanouanij se taman tein yejua kipanotok. Xa mitsoniluiskej seki taman tein amo nochin kimatij. Ika tein tikonmatis uelis tikontayokolis tein yekmelauj kipolojtos, tein oksekin amo kiitakej.

Keman moneki. Biblia kijtoua: “Se tajtol tein moijtoua keman monektok, ¡tel kuali temachililtia!” (Proverbios 15:23). Nejin kinextia ke tikmatiskej kemanian moneki tikijtoskej teisa tapaleuia maj kuali momachili akin techkaki. No ijkon panoua ika tein tikchiuaj: titetayokoliskej teisa keman moneki tapaleuia maj semi yolpaki akin kiselia.

Miakej kitetayokoliaj teisa ijkuak monamiktia se akin kuali iuan mouikaj, ijkuak se telpoch oso se ichpoch kisati kaltamachtiloyan oso se namikuanij kipiatij se konetsin. Moajsij akin kiamataliaj kemanian mochiuas nejon uan ijkon achto kiitaskej toni uelis kitetayokoliskej. *

Uelis titetayokoliskej keman yeski, amo sayoj keman mochiua nejon taman. Sayoj ke, moneki timoyekpiaskej. Komo se takat kitayokolia teisa se siuat keman amo kichia, siuat uelis kinemilis ke kineki kiixmatis okachi. Uan komo takat amo yejua tein kitemoua, ueliskia kiajsikamatiltis tein amo kineki uan onkaskia kuejmolmej. Nejin kinextia ke moneki tikitaskej okse taman: tein kiyololinia akin kitemaka netetayokolil.

Tein kiyololinia akin kitemaka netetayokolil. Kemej moijtoj achto, moneki tikitaskej ox akin tiktayokoliaj teisa ueliskia kinemilis okse taman. Sayoj ke, no moneki tikitaskej toni techyololinia keman tiknekij titetayokoliskej teisa. Maski miakej tiknekij tiknemiliskej ke ijkuak titetayokoliaj teisa tikchiuaj porin techyololinia tein kuali, miakej kichiuaj itech seki tonalmej itech xiuit porin moneki kichiuaskej. Uan oksekin porin kichiaj maj no kinmakakan teisa oso maj kuali kinitakan.

¿Toni uelis techpaleuis maj techyololini tein kuali keman titetayokoliskej teisa? Biblia kijtoua: “Nochi ten nankichiuaske, xikchiuakan sayo ika ne tetasojtalis” (1 Corintios 16:14). Komo tein mitsonyololinia ijkuak tiontetayokolia teisa yejua netasojtalis uan porin tikonneki tiontapaleuis, kiseliskej ika miak pakilis. Uan tikonitas ke se kiuelitas se kitemakas teisa kichiua maj semi se yolpaki. Keman titetayokoliaj ika netasojtalis no tikyolpaktiaj toTajtsin Dios. Pablo, se imomachtijkauj Jesús kiniluij imomachtijkauan Cristo akin kayomej Corinto ke kuali tein kichiujtoyaj keman ika miak pakilis kintitanilijkej takual ininikniuan ompa Judea. Itech se amatajkuilol  kiniluij: “Dios kitasojta se tagat ten kitemaka itapaleuilis ika yolpakilis” (2 Corintios 9:7).

Komo tejuatsin tikonchiua tein tikitakejya, uelis tiontetayokolis teisa tein kinyolpaktis oksekin. Dios kichiuak nejon uan okseki taman keman techmakak okachi kuali netetayokolil. Itech okse tamachtilis tikitaskej toni nejon okachi kuali netetayokolil.