„Ala bun sani anga ala sani di ná abi fowtu e komoto a tapu. Den komoto na a Dda di meke a mun anga den sitali” (Yakowbesi 1:17). A tekisi ya e soi fa Yehofa Gadu lobi gi sama sani. Ma fu ala den sani di a gi u, wan fu den bun moo ala. San na a sani ya? Yesesi taki aini Yohanisi 3:16 taki: „Gadu be lobi goontapu te, neen ede meke a sende a wan kodo Manpikin fi en kon, fu meke den sama di e biibi aini en, á mu dede, ma den mu fende a libi fu teego.”

A sende di Gadu sende en wan kodo Manpikin kon dede gi u a goontapu, na a moo bun kado di u be sa fende. A kado ya o puu sondu, gaandi anga dede gi u (Psalm 51:5; Yohanisi 8:34). Winsi sowtu moiti u be o meke, useefi á be o poi puu den sani ya. Ma fu di Gadu lobi u, meke a yeepi u. A meke en Manpikin pai wan paiman fu fii wi. A so den sama di e aliki en sa fende a libi fu teego. Ma san na a pai di Yesesi pai fu fii wi? Saide a be de fanowdu? Sowtu wini wi e fende fu a sani ya?

Yu e pai wan paiman fu fii wan taawan. Son leisi yu e pai wan paiman tu te i lasi wan sani fu wan taawan. Beibel e soi taki u fosi mma anga dda, Adan anga Efa, á be abi sondu. Den anga den pikin di den be o meke, be abi a okasi fu libi fu teego aini wan paladeisi a goontapu ya (Genesesi 1:26-28). Ma a tyali taki den lasi a libi ya di den ná aliki Gadu. A so den toon sondu sama. Fa sani waka? Beibel taki: „Wan man meke sondu de a goontapu, neen sondu tyai dede. Neen meke ala sama e dede, bika ala den abi sondu” (Romesama 5:12). Di Adan anga Efa sondu, neen den pikin di den meke kisi a sondu tu. Den á be poi libi fu teego moo. A sondu meke den e dede.

Efi i mu pai gi wan sani di i lasi, da a moni di yu o pai mu man bai a sani di i lasi baka. Di Adan ná aliki Gadu, a sondu. A lasi a libi fu teego di Gadu be gi en. Enke fa Beibel e soi, na a sani ya meke den pikin di a meke toon sondu sama. Neen meke den e dede. A wan sama di á be abi sondu enke Adan wawan be sa fii wi fu sondu anga dede. A sama ya a Yesesi. A kon a goontapu enke wan sama di ná abi sondu neen a dede gi u (Romesama 5:19; Efeisesama 1:7). A di Gadu lobi u meke a pai a paiman ya gi u. A sani ya o yeepi u fu fende a libi di Adan lasi. Dati na a libi fu teego aini wan paladeisi a goontapu ya.​—Openbaring 21:3-5.

Te u luku den wini di wi e fende fu a dede fu Yesesi, da wi e si taki sani á de di bigi moo a kado ya. Enke fa u si aini a artikel a fesi, u mu holi wantu sani a pakisei efu u wani gi wan sama wan moin kado. Meke u luku fa den fo sani di u be taki a fesi o yeepi u fu si saide a kado di Gadu gi u, na a moo bun kado di u be sa fende.

Ai meke u fende a sani di u wani. Ala sama wani libi fu teego (Peleikiman 3:11). Useefi á poi du nawan sani fu libi fu teego, ma a dede di  Yesesi dede gi u sa meke u fende a libi ya. Beibel taki: „A paiman fu sondu a dede. Ma Gadu koboloiki Kelestesi Yesesi fu gi u teego libi enke kado.”​—Romesama 6:23.

Ai gi u san wi abi fanowdu. Nawan libisama á be o poi pai a paiman ya. Beibel taki: „A paiman di mu pai fu fii wan sama bigi. Neen meke noiti wan sama o poi pai en” (Psalm 49:8). U be abi Gadu fanowdu fu fii wi fu sondu anga dede. Beibel taki Gadu meke „Yesesi Kelestesi pai a paiman fu fii wi”, fu u be sa fende a sani di wi abi fanowdu.​—Romesama 3:23, 24.

Na a yuu di wi abi en fanowdu. Beibel taki Gadu „meke Kelestesi dede gi u, aladi u be de sondu sama ete” (Romesama 5:8). A gi wi a kado ya di u „be de sondu sama ete”. A sani ya e soi taki ná pikin lobi Gadu lobi u winsi fa wi a sondu sama. Ai meke u pakisei ala den wini di Beibel taki wi o fende aini a ten di e kon, winsi fa sondu e fooseli u nownow.

A gi wi a kado ya anga en hii ati. Beibel e soi saide Gadu gi wi a kado ya. A taki: „Na a fasi ya Gadu soi taki a lobi u di a sende a wan kodo manpikin fi en kon a goontapu, fu a sa yeepi u fu fende a libi. A lobi ya á wani taki a wi be lobi Gadu, ma neen be lobi wi.”​—1 Yohanisi 4:9, 10.

Fa i sa soi Gadu taki a sani di a du e bigi gi i? Ná feegete taki Yesesi taigi wi a Yohanisi 3:16 taki, a „den sama di e biibi” Gadu o fende libi fu teego. Beibel taki „biibi a te wan sama abi a fitoow taki den sani di ai howpu, o kon tuu” (Hebrewsama 11:1). Efu u wani abi a biibi ya, u mu leli sabi Gadu. Neen meke u wani gi i taanga-sikin fu teke ten fu leli sabi Gadu moo bun, bika neen gi wi a moo bun kado. Meke moiti tu fu sabi san i mu du fu fende a teego libi di a dede fu Yesesi o meke u fende.

I sa sabi ala den sani ya te yu e go a www.pr418.com. Den Yehofa Kotoigi o piisii fu yeepi i. U sabi taki te yu o leli moo fu a kado ya, te yu o si den wini di i sa fende, yu o wani bali taki: „Mi e gi Gadu daa, di a meke a masaa fu wi, Yesesi Kelestesi, yeepi mi!”​—Romesama 7:25.