Bible udi wamba ne: “Dipa dionso dimpe ne dipa dionso dipuangane didi difuma muulu, difumina kudi Tatu wa butoke bua mu diulu.” (Yakobo 1:17) Bushuwa, mvese eu udi wakula bua muoyo wa kupeshangana bintu utu nawu Tatuetu wa mu diulu, Yehowa Nzambi. Kadi ku mapa a bungi adi Nzambi mupeshe bantu, kudi didi ditambe makuabu onso. Ndipa kayi adi? Mêyi a Yezu adi mamanyike bimpe adi mu Yone 3:16 adi amba ne: “Nzambi uvua munange ba pa buloba bikole menemene, kufikaye ne ku difila Muanende mulela umuepele, bua muntu yonso udi uleja ditabuja kudiye kabutudibu, kadi apete muoyo wa tshiendelele.”

Dipa dia Muana mulela umuepele wa Nzambi! Adi ke didi ne bua kuikala dipa ditambe bunene didi yonso wa kutudi mua kupeta, bualu ku diambuluisha diadi tudi mua kusungidibua ku bupika bua mpekatu, bukulakaja, ne lufu. (Misambu 51:5; Yone 8:34) Nansha tuetu benze bishi, kakuena tshitudi mua kuenza bua tuetu kudipikula ku bupika abu to. Kadi bu mudi Nzambi ne dinanga dia bungi, wakafila tshidi tshikengedibua bua tupikudibue. Padi Yehowa Nzambi mufile Muanende mulela umuepele, Yezu Kristo, bua ikale tshia kupikulangana natshi, wakapesha bantu badi batumikila ditekemena dia muoyo wa tshiendelele. Kadi tshia kupikula natshi ntshinyi menemene? Bua tshinyi bivua bikengela batshifile? Mmunyi muditshi mua kutuambuluisha?

Tshia kupikula natshi mmushinga utubu bafila bua kufuta tshintu tshidibu bajimije anyi kulekeesha tshidibu bakuate. Bible udi umvuija ne: bavua bafuke Adama ne Eva, baledi betu ba kumpala, kabayi ne mpekatu, bikale ne diakalenga dia kuikala ne muoyo wa kashidi mu mparadizu pa buloba bobu ne bana bavuabu ne bua kulela pashishe. (Genese 1:26-28) Diakabi, bakajimija bionso abi pakabengabu kutumikila Nzambi. Pakenzabu nanku, bakalua bena mpekatu. Ntshinyi tshiakalua kuenzeka? Bible udi wandamuna ne: “Bu muvua mpekatu mubuele mu ba pa buloba kupitshila kudi muntu umue, ne lufu lubuele bua mpekatu, ne mushindu eu lufu lutampakane kudi bantu bonso bua muvuabu bonso benze mpekatu.” (Lomo 5:12) Pamutu pa Adama kusambulujila bana bende muoyo mupuangane, wakabasambulujila mpekatu ne lufu ludi mpekatu eu mukebeshe.

Mu tshilumbu tshia tshia kupikulangana natshi, tshidibu bafuta tshidi ne bua kuikala tshikumbanangane ne tshivuabu bajimije. Pavua Adama mubenge kutumikila Nzambi ku bukole, wakenza mpekatu, kufikishabi ku dijimija muoyo mupuangane uvuaye nawu. Bilondeshile Bible, bualu abu buakenza bua bana ba Adama bonso bakuatshibue ku bupika bua mpekatu ne lufu. Nanku bivua bikengela kufila muoyo mupuangane wa muntu mukuabu, mmumue ne: muoyo wa Yezu, bu mulambu bua kuikale mushindu wa kupatuka mu bupika abu. (Lomo 5:19; Efeso 1:7) Bukua bantu budi ne diakalenga dia kupeta tshivua Adama ne Eva bajimije, mmumue ne: muoyo wa tshiendelele mu mparadizu pa buloba anu bualu Nzambi uvua mufile tshia kupikulangana natshi ne dinanga dionso.​—Buakabuluibua 21:3-5.

Patudi tumona malu aditshi tshikumbaja, tudi tumona bimpe ne: dipa dia Nzambi dia tshia kupikulangana natshi didi dienza bua bantu bapete muoyo wa tshiendelele ke dipa didi dipite makuabu onso. Bua kumvua mudi dipa edi dikale “dipa dipuangane,” tumonayi mudidi dikumbaja malu atuvua bakonkonone mu tshiena-bualu tshishale adi atuambuluisha bua kuenza bua mapa atudi tufila ikale ne mushinga. Didi dikumbaja malu au mu mishindu ya dikema.

Didi dikumbaja dijinga dietu. Tuetu bantu tudi bafukibue ne dijinga dikole dia kuikala anu ne muoyo. (Muambi 3:11) Nansha mutudi katuyi tukumbana bua  kukumbaja dijinga edi tuetu nkayetu, tshia kupikulangana natshi tshidi tshitupesha mushindu wa kudikumbaja. Bible udi wamba ne: “Bualu difutu dia mpekatu ndufu, kadi dipa didi Nzambi ufila mmuoyo wa tshiendelele ku butuangaji bua Kristo Yezu Mukalenge wetu.”​—Lomo 6:23.

Didi dikumbaja tshitudi natshi dijinga. Bantu kabavua mua kufila tshia kupikulangana natshi to. Bible udi uleja ne: “Mushinga wa kupikula nawu muoyo wabu mmukole menemene kabayi mua kuwukumbaja musangu nansha umue.” (Misambu 49:8) Nanku, tuvua dijinga ne diambuluisha dia Nzambi bikole bua batupatule mu bupika bua mpekatu ne lufu. Kadi “ku dilekeledibua ku diambuluisha dia tshia kupikulangana natshi tshivua Kristo Yezu mufile,” Nzambi mmufile anu tshitudi natshi dijinga.​—Lomo 3:23, 24.

Dipa difila pa dîba diadi. Bible udi utuambila ne: “Patutshivua benji ba mpekatu, Kristo wakatufuila.” (Lomo 5:8) Bu muvuabu bafile tshia kupikulangana natshi “patutshivua benji ba mpekatu,” tshidi tshitujadikila mudi Nzambi mutunange bikole nansha mutudi benji ba mpekatu. Tshidi tshitupesha kabidi malu makuabu a bungi a kutekemena, nansha tuetu ne bua kutantamena ntatu idi mpekatu ukebesha.

Dipa dileja lungenyi luimpe lua kuambuluisha bakuabu. Bible udi uleja tshivua tshisake Nzambi bua kufila Muanende bua ikale tshia kupikulangana natshi wamba ne: “Mu bualu ebu dinanga dia Nzambi diakamueneshibua bua bualu buetu, ne: Nzambi wakatuma Muanende mulela umuepele pa buloba bua tupete muoyo ku butuangaji buende. Dinanga didi dimuenekela mu bualu ebu, ki mbua ne: tuetu tuvua banange Nzambi to, kadi nne: yeye wakatunanga.”​—1 Yone 4:9, 10.

Mmunyi muudi mua kuleja ne: udi wanyisha dipa ditambe makuabu edi? Vuluka ne: mêyi a Yezu adi mu Yone 3:16 adi aleja ne: anu bantu badi ‘baleja ditabuja’ kudiye ke basungidibua. Bilondeshile Bible, ditabuja “ndindila dishindame dia tshitudi batekemene.” (Ebelu 11:1) Bua kuikala ne dishindika adi, bidi bikengela kuikala ne dimanya dijalame. Ke bualu kayi tudi tukulomba bua ukebe dîba dia kulonga malu adi atangila Yehowa Nzambi, Mufidi wa “dipa dipuangane” edi, ne kumanya kabidi tshiudi ne bua kuenza bua kupeta muoyo wa tshiendelele. Udi mua kupeta muoyo eu ku diambuluisha dia mulambu wa Yezu udi upikulangana.

Udi mua kumanya bionso ebi wewe mukonkonone malu a mu Bible adi ku Enternete mu www.pr418.com. Bantemu ba Yehowa nebikale ne disanka dia kukuambuluisha. Tudi batuishibue ne: paudi ulonga malu adi atangila dipa ditambe bunene edi ne mudidi mua kukuambuluisha, nebikusake bua kuamba ne: “Nzambi edibue tuasakidila ku butuangaji bua Yezu Kristo Mukalenge wetu!”​—Lomo 7:25.