Baibõl̦ ej ba: “Aolep menin letok ko rem̦m̦an im weeppãn rej jãn lañ; rej wanlal̦tak jãn Anij, Rũkõm̦anm̦an meram ko ilo lañ.” (Jemes 1:17, UBS) Eoon in ej kwal̦o̦k kõn an Jemãdwõj ilañ, Jeova Anij, l̦ap an jouj im m̦õn̦õn̦õ in lel̦o̦k ñan ro jet. Bõtab, ewõr juon menin letok jãne ñan kõj armej me ej make wõt em̦m̦an jãn aolep menin letok ko otemjej an. Ta in? Naan ko rebuñbuñ an Jesus ilo Jon 3:16 (UBS) ej kaalikkare ilo an ba: “Bwe joñan an Anij yokwe lal̦, ear letok Nejin eo ej make wõt, bwe jabdewõt eo ej tõmak ilo e en jab jako, ak en mour indeeo.”

Menin letok eo an Anij kõn Nejin eo ej make wõt ej menin letok eo em̦m̦antata iaan aolep menin letok ko juon emaroñ letok ñan kõj. Etke? Kõnke ikijjeen menin letok in, jemaroñ rõl̦o̦k jãn jerawiwi im jãn ad rũttol̦o̦k im mej. (Sam 51:5; Jon 8:34, UBS) Ilo m̦ool, jekdo̦o̦n ewi joñan ad kate kõj ak jejjab maroñ make karõl̦o̦k kõj jãn men in. Bõtab, kõn wõt yokwe eo el̦ap an Anij, ear letok men eo jej aikuji bwe jen maroñ rõl̦o̦k im anemkwõj. Jeova Anij ear lel̦o̦k ñan ro rej pokake juon kõjatdikdik ñan mour indeeo ikijjeen an kar letok Nejin eo ej make wõt, Jesus Christ, bwe en kõl̦l̦ã on̦ããn an armej rõl̦o̦k. Bõtab ewi wãween an katok in mour eo an Jesus kõl̦l̦ã on̦ããn ad rõl̦o̦k jãn jerawiwi im mej? Etke kar juon menin aikuj ñan kõl̦l̦ã on̦ããn ad rõl̦o̦k? Im ewi wãween bwe jen bõk tokjãn jãn menin letok in?

Katok in mour eo an Jesus ear kõl̦l̦ãik on̦ããn men eo kar jerwaane bwe en bar jepl̦aaktok, im ear kanemkwõj kõj bwe jen rõl̦o̦k. Baibõl̦ ej ba bwe kar kõm̦anm̦an Adam im Iv, ro jibwid im jim̦m̦aad, bwe erro en weeppãn im mour ñan indeeo ilo juon pedetaij ijin ioon lal̦ ippãn ro nejierro me erro naaj kar keotak tokãlik. (Jenesis 1:26-28) Ak ekabũrom̦õjm̦õj bwe erro kar luuji aolepen men kein ke erro kar kããlõt ñan jab pokake Anij. Kõn men in, erro ar erom rijjerawiwi. Ta eo ear wal̦o̦k tokãlik? Baibõl̦ ej ba: “Ãinwõt kõn juon armej, jerawiwi ear del̦o̦ñ ilo lal̦, im mej kõn jerawiwi; im ãindein mej ear itok ioon armej otemjej, bwe er otemjej rar jerawiwi.” (Rom 5:12) Innem ijello̦kun an Adam lel̦o̦k juon mour eweeppãn ñan ro nejin, ear lel̦o̦k juon mour ejerawiwi me ej tõll̦o̦k ñan mej.

Joñan on̦ããn eo kar kõl̦l̦ãiki ñan karõl̦o̦k kõj jãn jerawiwi im mej ear aikuj joñan wõt men eo kar luuji. Ke Adam ear kããlõt ñan jab pokake Anij, ear jerawiwi. Kõn men in, ear luuji mour eo eweeppãn. Ekkar ñan Baibõl̦, men in ear kõm̦m̦an bwe kõj ro nejin Adam, jen rũkõm̦akoko ñan jerawiwi im mej. Innem kar aikuji juon armej eo eweeppãn ñan katok kõn mour eo an bwe jen maroñ rõl̦o̦k ak bõk anemkwõj. (Rom 5:19; Epesõs 1:7, UBS) Kõn wõt an kar Anij letok Nejin ñan kõl̦l̦ã on̦ããn an armej rõl̦o̦k, ewõr ippãd jeraam̦m̦an eo Adam im Iv rar luuji ñan mour indeeo ilo pedetaij eo ijin ioon lal̦.​—Revelesõn 21:3-5.

Ejjel̦o̦k pere bwe menin letok in an Anij ikijjeen Jesus me ej letok mour indeeo, ej menin letok eo em̦m̦antata jãn jabdewõt menin letok. Bwe jen mel̦el̦e etke menin letok in an ekanooj ‘em̦m̦an im weeppãn,’ jen etale ewi wãween an menin letok in kajejjet 4 wãween ko kõn kilen lel̦o̦k menin lel̦o̦k ko rem̦m̦an, ãinwõt ad kar etali ilo katak eo l̦o̦k.

Kajejjet kõn̦aan eo ad. Ej piktokin kõj armej bwe jen kõn̦aan wõnm̦aanl̦o̦k wõt im mour. (Ekklisiastis 3:11) Kõj armej jejjab maroñ kajejjete kõn̦aan in ad,  bõtab ikijjeen katok in mour eo an Jesus emaroñ in jejjet. Baibõl̦ ej ba: “Bwe on̦ããn jerawiwi, mej; ak menin letok eo an Anij, ej mour indeeo, ilo ad juon wõt ippãn Christ Jesus ad Irooj.”​—Rom 6:23, UBS.

Katõprak ad aikuj. Armej rejjab maroñ make kõl̦l̦ã on̦ããn aer rõl̦o̦k jãn jerawiwi im mej. Baibõl̦ ej kõmel̦el̦e im ba: “On̦ããn mour an armej ekanooj l̦ap. Joñan eo emaroñ kõl̦l̦ãiki ejãmin bwe.” (Sam 49:8, UBS) Innem, jaar lukkuun aikuj jipañ jãn Anij bwe jen rõl̦o̦k jãn ad pãd ium̦win jerawiwi im mej. Kõn men in, Anij ear katõprak men eo jaar lukkuun aikuji ilo an kar kõl̦l̦ã on̦ããn ad rõl̦o̦k ikijjeen Christ Jesus.​—Rom 3:23, 24.

Ejejjet ekkar ñan iien eo. Baibõl̦ ej kõmel̦el̦eik kõj im ba: “Ilo iien eo ke jaar pãd ilo jerawiwi Christ ear mej kõn kõj!” (Rom 5:8, UBS) Kõn an kar Anij letok Nejin “ilo iien eo ke jaar pãd ilo jerawiwi,” men in ej kam̦ool joñan an l̦ap yokwe eo an ñan kõj meñe kõj rijjerawiwi. Bareinwõt, menin letok in an ej letok ad kõjatdikdik kõn ilju im jekl̦aj ilo tõre in jej kijenmej wõt kõn apañ ko rej wal̦o̦k itok wõt jãn ad jab weeppãn.

Kwal̦o̦k bwe unin an letok ej kõn an kea. Baibõl̦ ej kaalikkar ta eo ear kõm̦akũt Anij ñan ajel̦o̦k Nejin bwe en kõl̦l̦ã on̦ããn ad rõl̦o̦k. Ej ba: “Wãween dein an Anij kar kwal̦o̦k yokwe eo an ñan kõj: ear jilkintok Nejin eo ej make wõt ñan lal̦, bwe jen maroñ mour kõn e. Eñin yokwe eo: ejjab bwe jaar yokwe Anij, ak bwe ear yokwe kõj.”​—1 Jon 4:9, 10, UBS.

Ewi wãween am̦ maroñ kwal̦o̦k am̦ kam̦m̦oolol kõn menin letok in ej make wõt em̦m̦an jãn jabdewõt menin letok? Naan ko an Jesus ilo Jon 3:16 (UBS) rej kaalikkar bwe ro wõt rej “tõmak” ilo e renaaj bõk lo̦mo̦o̦r. Baibõl̦ ej ba bwe tõmak “ej ãinwõt lõke kõn men ko jej kõjatdikdik kõj kaki.” (Hibru 11:1) Innem bwe en l̦ap tõmak in ad, eaorõk bwe jen bõk jel̦ãl̦o̦kjen̦ eo ejim̦we. Kõn men in, kõmij rõjañ eok ñan bõk am̦ iien im katak kõn Jeova Anij, eo ear letok ‘menin letok eo em̦m̦an im eweeppãn.’ Bareinwõt, katak kõn ta ko kwõj aikuj in kõm̦m̦ani bwe kwõn maroñ bõk mour indeeo, eo ej jeraam̦m̦an eo epel̦l̦o̦k ñan eok ikijjeen katok in mour eo an Jesus.

Kwõmaroñ kal̦apl̦o̦k am̦ mel̦el̦e kõn aolepen men kein ilo am̦ etali katak ko jãn Baibõl̦ im rej wal̦o̦k ilo website in www.pr418.com. Ri Kõnnaan ro an Jeova rej m̦õn̦õn̦õ in jipañ eok. Kõmij tõmak bwe ñe enaaj l̦apl̦o̦k am̦ katak kõn menin letok eo em̦m̦antata an Anij im bõk tokjãn jãne, bũruom̦ enaaj kõm̦akũt eok ñan ba: “Ij kam̦m̦oolol Anij kõn Jesus Christ ad Irooj.”​—Rom 7:25.