“Kese otyiawa otyiwa notyali tyafuapo, tyitunda keulu, tyetyi tyitunda ku Tate yovimimi vio keulu.” (Tiago 1:17) Oversikulu ei ipopia otyali Tate yetu Jeova Huku ena. Mahi, koviawa aviho Huku aavela ovanthu, pena tyimwe otyiwa vali kuaviho. Otyipi? Tutyivasa monondaka ombu mba Jesus mu João 3:16 mbati: “Mokonda Huku una oluembia olunene novanthu, waava Omona wae wongunga, opo kese omunthu ukala nekolelo mwe ahakanyimueko, mahi akala nomuenyo uhapu.”

Otyiawa Huku etuavela, Omona wae wongunga. Otyo, otyiawa otyinene vali tyipona oviawa viatyo aviho tupondola okupewa. Iya mokonda yotyiawa otyo, tupondola okuyovoka kononkhali, no kokukulupa iya no kononkhia. (Salmo 51:5; João 8:34) Namphila tulinga ononkhono mbokulinga atyiho tuvila, mahi tutupuale etyi tupondola ukulinga opo tuyovoke. Mahi moluembia lwae olunene, Huku waava etyi tyesukisa pala okutuyovola. Mokuava omona wae Jesus Kristu ngofeto yeyovo, Jeova Huku waavela ovanthu vetavela ekevelelo lio muenyo uhapu. Mahi ofeto yeyovo oityi? Omokonda yatyi yesukisila? Iya oñgeni tupondola okupolako ouwa?

Ofeto yeyovo, otyipuka tyifetwa pala okuyovola otyipuka wavombesa ine pala okuyovola omunthu moupika. Ombimbiliya ihangununa okuti, ovo tate yetu votete, Andau na Eva, vatungwa tyihena nkhali, vatungwa opo vakaleko apeho nehambu momphangu yombembwa kumwe novana vavo. (Gênesis 1:26-28) Mahi, vavombesa atyiho, etyi valingila tyawina avehetavela Huku. Okutuka opo, avakala ovakuankhali. Otyo atyieta-tyi? Ombimbiliya ikumbulula okuti: “Mokonda yomunthu wike vala, onkhali yanyingila mouye, iya onkhali yaeta ononkhia. Moluotyo ononkhia mbeliyandyana kovanthu vatyo aveho, mokonda aveho valinga onkhali.” (Romanos 5:12) Andau wetutambulisa onkhali, no nonkhia, ehetutambulisa omuenyo wokuahapu.

Pala okuava ofeto yeyovo, ofeto yatyo ina okulifwa netyi tyavovembeswa. Etyi Andau ehetavelele Huku tyawina, wakuata onkhali, otyo atyimuetela ononkhia kumwe novana vae. Ngetyi tyipopia Ombimbiliya, otyo atuho tutyitilwa nonkhali, iya mokonda yotyo tunkhia. Moluotyo, atyisukisa vali omunthu omukuavo uhena nkhali, nga Jesus, opo aave omuenyo wae ngotyilikutila opo etuyovole. (Romanos 5:19; Efésios 1:7) Huku moluembia lwae, waava ofeto yeyovo opo ovanthu aveho vakale nomuenyo Andau na Eva vavombesa, avakala nomuenyo uhapu.​—Apocalipse 21:3-5.

Mokonda yetyi Huku alinga, tyimoneka nawa okuti ofeto yeyovo maitukalesa nomuenyo uhapu. Otyo, otyiawa otyiwa vali Huku etuavela. Opo tulekese okuti tuapandula “otyiawa otyo tyafuapo,” matutale omokonda yatyi otyo tyituavelela ondundo yokukala notyali ngetyi tuamona monthele yokualamba.

Huku wetuavela etyi ankho tuhanda. Onthue vanthu katuhande okunkhia, tuhanda okutualako nomuenyo. (Eclesiastes 3:11) Ankho  katutyivili okufuisapo ehando olio, mahi mokonda yofeto yeyovo, pahe matutualako apeho. Ombimbiliya yati: “Mokonda ofeto yonkhali ononkhia, mahi otyali tuapewa na Huku omuenyo wahapu, menyina lia Kristu Jesus Tatekulu yetu.”—Romanos 6:23.

Etyi ankho tuesukisa. Ovanthu kavapondola okulifetelako ofeto yeyovo. Ombimbiliya ihangununa okuti: “Ofeto yeyovo yomuenyo wavo yakolela unene, iya yaavuale pala omuvo uhapu.” (Salmo 49:⁠8) Ngotyo, ankho tuesukisa umwe ekuateso lia Huku opo etuyovole konkhali no kononkhia. Mahi, mokonda “yotyilikutila tyeyovo tyafetwa na Kristu Jesus,” Huku wetuavela etyi ankho tuesukisa.—Romanos 3:23, 24.

Momuvo waviuka. Ombimbiliya itupopila okuti: “Kristu wankhia mokonda yetu, etyi ankho nkhele tuvakuankhali.” (Romanos 5:⁠8) Otyo tyilekesa nawa okuti, Huku utuhole unene namphila nkhele tuvakuankhali. Tupu matyituetela ouwa komutwe wandyila namphila nkhele tumona ononkhumbi mbutundilila konkhali.

Tyalundwa nohole nokankhenda. Ombimbiliya ipopia oityi tyalunda Huku okuava ofeto yeyovo, yati: “Moluotyo, oluembia Huku ena nonthue lualekeswa. Mokonda Huku watuma Omona wae wongunga pano pohi, opo tukamone omuenyo menyina liae. Oluembia omonkhalelo ei, hakuti onthue tuakala nohole na Huku, mahi oe wakala noluembia nonthue.”—1 João 4:9, 10.

Oñgeni molekesa okuti wapanda otyiawa otyo otyinene vali kuaviho? Hinangela onondaka mba Jesus mbukahi mu João 3:16 mbati, “vana vakala nekolelo” mwe ovo vala mavayovolwa. Ngetyi tyipopia Ombimbiliya, ekolelo “onthumbi yotyotyili yovipuka vikevelelwa.” (Hebreus 11:1) Opo ukale nonthumbi yatyo oyo, wesukisa okukala nenoñgonoko liafuapo. Mokonda yotyo, tukuavela ondundo opo wovole okunoñgonoka vali nawa Jeova Huku, Omuavi “wotyiawa” otyo, netyi upondola okulinga opo ukakale nomuenyo wokuahapu mokonda yotyilikutila tyeyovo tya Jesus.

Ove upondola okulilongesa atyiho otyo momikanda vikahi mo internete mo www.pr418.com. Onombangi mba Jeova mavakala nehambu liokukuatesako. Onthue tuna onthumbi yokuti, tyina wamanoñgonoka nawa otyiawa otyo, otyo upolako ouwa, mopopi okuti: “Ndyipandula Huku, menyina lia Jesus Kristu Tatekulu yetu!”—Romanos 7:25.