“A bek lungil ngat ma bek el cherrungel sengk a ngarbab el ngara Demal a bek el llomes el mei.” (Jakobus 1:17) Tia el bades a bleketakl el mesaod el kirel a bekururau el Demad el ngar a eanged el Jehovah el Dios. Ngar a chelsel aike el betok el ungil sengk el bla lebsa klechad, e ngar er ngii a chimong el kot el ngarbab el sengk er ngii el rokui. Tiang ngera el sengk? A merael chisel tekingel a Jesus el llechukl er a Johanes 3:16, a kmo: “Ele Dios a kmal mle betik a rengul er a beluulchad me ng milsa di tal Ngelekel, me tirkel rokui el mo oumera er a Ngelekel a Dios a diak le mad e bai mo ngar el diak a ulebengelel.”

Me a sengk er a di ta el Ngelekel a Dios a kot lungil sengk el sebechel a ngii di el chad el nguu, e le tiang a mo uchul e ngsebeched el mo mimokl er a belsel a klengit me a cheluodel me a dirrek el kodall. (Psalm 51:5; Johanes 8:34) Me alta e kede mora tkurrebab el sebeched el melasem, engdi ngkmal diak lsebechel el di kid el ngubetid er tia el blals. Engdi ngokiu a klou el bltkil a rengul a Dios e ngmla meskid aike el dousbech me ngsebeched el mengubet er ngii. Ngmeskid lokiu sera loderchii a di ta el Ngelekel el Jesus Kristus, el me mad el mo olubet el tenget, e tiaikid a rolel e a Jehovah el Dios a mesterir a rebekongesenges el chad a omelatk el mo kiei el mo cherechar. Engdi ngerang a olubet el tenget? E ngera uchul me ngklou a ultutelel? E mekera sebeched el ngmai a klungioled er ngii?

A olubet el tenget a char el sebechel mo mecherar a tekoi el ririid, me a lechub e ngmo ngubetii a chad me ngmo mimokl er a blsel. Me a Biblia a mesaod el kmo tirke el kot el demad me a delad el Adam me a Eva, a ulebeob el cherrungel el dimlak a kngterir, e dirrek el uleba omelatk el kiei el mo cherechar er a chelsel a baradis el chutem lobengterir a rengelekir el bo lomechell er tir. (Genesis 1:26-28) Engdi ngkmal klengiterreng e le ngdi mle tir loriid a rokui el techellir er sera lolilt el mo diak lolengesenges er a Dios, e lebo er a klengit. Me ngera mlo rsel? A Biblia a mesaod el kmo: “A klengit a siliseb er a beluulchad el okiu a tal chad, ma kodall a ulekiu a klengit el mei, ma kodall a ulemerk el mor a re chad el rokui, ele rokui a mlor a klengit.” (Rom 5:12) Me a Adam a bai dimlak lebesterir a rengelekel a cherrungel el klengar, e ngbai milsterir a klengar el ngar a klengit el ngii a mlo uchul a kodellir.

Me a olubet el tenget a kirel meketmokl el di osisiu er sel ririid el tekoi. Sel taem el Adam a mle durengul mo diak lolengesenges er a Dios, e ngmlo er a klengit el mlo uchul e ngurridii a cherrungel el klengar er ngii. Me a doltirakl er a omesodel a Biblia, e tiang a mlo uchul me a ruldidellel a rsechel a Adam a mlo oudiukes er a klengit me a kodall. Me nguaisei, engdi ngoeak a ta er a cherrungel el klengar el klengar er a Jesus, el mlo ua olubet el tenget e ngmo sebechel el kokedir a blals el mlo er ngii. (Rom 5:19; Efesus 1:7) E tiang a mlo sebechel meketmokl e le betik a rengul el Dios a kiltmeklii me bo lsebechel a klechad el oba omelatk el mo kiei el dmeu a rengrir er a tekoi el Adam me a Eva a urridii, el ngii a klengar el mo cherechar er a chelsel a baradis el chutem.​—Ocholt 21:3-5.

Me sel domtab a tekoi el mileketmokl, e ngmo ulterekokl a rengud el kmo a sengk er a Dios el olubet el tenget el ngii a uchul a diak a ulebengelel klengar a kot lungil el sengk er a rokui el sengk. Me a lsekum ngsoad lochotii omereng el saul er kid el kirel a “cherrungel sengk” e bo desa sel kot lungil el rolel e ngkutmokl a rokui el tekoi el ngosukid el remuul a sengk er kid el mo ngar er ngii a ultutelel, el ua dulsaod er a uchei el suobel.

Ngotaut a urunguled. Kid a rechad a mera loureng el soad el kiei el mo cherechar. (Olisechakl 3:11) Me alta e ngdiak lsebechel di klisiched e dotutii tia el urunguled, engdi a olubet el tenget a rullii el mo sebeched. E a Biblia  a dmu el kmo: “Ele omeksullel a klengit a kodall, e ngdi diak el ocheraol el sengk er a Dios, a diak a ulebengelel klengar el ngar a Kristus Jesus el Rubak er kid.”​—Rom 6:23.

Ngmeskid aike el dousbech. A rechad a diak lsebechir el kutmeklii a olubet el tenget. Me a Biblia a mesaod el kmo: “Ng imis el klou a cheral a klengar er a tal chad. A ikel bo le kekad a kmal diak bo lungil a ildisel.” (Psalm 49:8) Tiaikid a uchul me kede mera el ousbech er a ngelsuil a Dios me bo lsebeched el mo mimokl er a blals el ngii a klengit me a kodall. Me ngokiu a “sengk er a Dios el okiu a Jesus Kristus el ngii a rulleterir el mo mimokl.” Me a Dios a mera el omeskid aike el rokui el dousbech.​—Rom 3:23, 24.

Ngulterekokl a temel. A Biblia a subedid el kmo: “Ser a dirk de ngar a klengit, e a Kristus a mlad el kired.” (Rom 5:8) Me a sengk el dengiluu er a “dirk de ngar a klengit” a olubet el tenget el oterekokl a rengud el kirel a dmolech el bltkil a rengul a Dios el mei er kid alta e kede ngar a klengit. Ngdirrek el meskid a betok el omelatk el domes el beduluchei el kirel, alta e ngdirk kired loutekangel a telemellel a klengit el kid a uldiukes er ngii.

Ngochotii a moktek er ngii me a ulekerreuil. A Biblia a smodii a uchul me a Dios a kilengei er a Ngelekel me ngkutmeklii a olubet el tenget el kmo: “E a Dios a ulechotii a bltkil a rengul er a loderchii a di tal Ngelekel el mer a beluulchad, me bo dokiu ngii el mo nguu a klengar. Tiakid a bltikerreng el kmo, ng diak le kid a mle betik a rengud er a Dios; ng bai Dios a mle betik a rengul er kid.”​—1 Johanes 4:9, 10.

Me ke mekerang e ochotii el kmo ke mereng a saul el kirel tia el kot el ungil sengk? Ka molatk a tekingel a Jesus el medung er a Johanes 3:16 el kmo ngdi “tirkel rokui el mo oumera” er ngii a mo suobel. A dotirakl er a omesodel a Biblia el kirel a klaumerang, e ngkmo a “chad el oumerang a kmal medengei a ikel tekoi el lolatk e mengiil.” (Hebru 11:1) Me a lsekum ngsoad el mo ulterekokl a rengud el kirel tiang, e ngklou a ultutelel el domekeroul er a klemedengei er kid el kirel. Tiaikid a uchul me aki mengemedaol er kau el mo mesuub el kirel a Jehovah el Dios, el Ngike el Omeskid tia el “cherrungel sengk,” e dirrek el mo medengei a tekoi el kirem el meruul me bo lsebechem el mo kiei el mo cherechar el dmeu a rengum el olubet el tengetengel a Jesus a mla kutmeklii el kirem.

Ngkmal sebechem el mesuub el kirel aika el tekoi lokiu sel morriter a omesodel a Bades el ngar a www.pr418.com. A Resioning er a Jehovah a kmal dmeu a rengrir el mo ngosukau. Ngdirrek el ulterekokl a rengmam el kmo sel bo mosuub el kirel me aike el klungiolel tia el kot lungil sengk, e ngdirrek el mo soam el melekoi el kmo: “Le modanges a Dios, el meruul er itiang el oeak a Rubak er kid el Jesus Kristus.”​—Rom 7:25.