“An tagsa nga maopay nga regalo ngan an tagsa nga perpekto nga hatag nagtitikang ha igbaw, kay tikang ito ha Amay han mga lamrag ha kalangitan.” (Santiago 1:17) Syempre, ini nga teksto nagtutudlok ha pagkamahinatagon han aton langitnon nga Amay, hi Jehova nga Dios. Kondi ha damu nga regalo han Dios ha katawohan, may usa nga labaw hito ngatanan. Ano ito? An popular nga mga pulong ni Jesus ha Juan 3:16, nasiring: “Hinigugma gud han Dios an kalibotan salit iginhatag niya an iya bugtong nga Anak basi an tagsa nga nagpapakita hin pagtoo ha iya diri mamatay kondi magkaada kinabuhi nga waray kataposan.”

An regalo nga bugtong nga anak han Dios sigurado nga amo an pinakalabaw nga regalo nga mahimo makarawat han bisan hin-o, kay tungod hito mahimo kita magkaada kagawasan ha pagkauripon ha sala, kalagas, ngan kamatayon. (Salmos 51:5; Juan 8:34) Bisan kon magpinaniguro kita, waray kita mahihimo ha aton la pangalimbasog basi magkaada hito nga kagawasan. Kondi tungod han daku nga gugma han Dios, iya igintagana an ginkikinahanglan basi makarawat naton ito. Pinaagi ha paghatag han iya bugtong nga anak, hi Jesu-Kristo, sugad nga lukat, iya iginhatag ha magsinugtanon nga tawo an paglaom nga kinabuhi nga dayon. Kondi, ano gud an lukat? Kay ano nga importante ito? Ngan paonan-o kita magpapahimulos hito?

An lukat amo an kantidad nga iginbabayad basi matubos an nawara, o magin posible nga matagan hin kagawasan an usa. An Biblia nasiring nga an aton siyahan nga mga kag-anak, hira Adan ngan Eva, ginlarang nga waray sala ngan may paglaom nga mabuhi ha waray kataposan ha paraiso nga tuna kaupod han ira magigin mga anak. (Genesis 1:26-28) Makasurubo, nawara nira ito kay ginpili nira nga talapason an Dios salit nagin makasasala hira. An resulta? An Biblia nabaton: “Pinaagi han usa nga tawo an sala sinulod ha kalibotan ngan an kamatayon pinaagi han sala, tungod hito an kamatayon inabot ha ngatanan nga tawo kay hira ngatanan nakasala.” (Roma 5:12) Imbes nga ipapanunod an hingpit nga kinabuhi ha iya mga anak, iginpapanunod ni Adan an sala ngan an resulta hito, an kamatayon.

Ha paglukat, an kantidad nga iginbabayad sadang katugbang ha kon ano an nawara. Han tinuyo nga gintalapas ni Adan an Dios, nakasala hiya salit nawara niya an hingpit nga kinabuhi sugad nga tawo. An Biblia nasiring nga tungod hito, an iya katulinan nagin uripon ha sala ngan kamatayon. Salit kinahanglan ihatag an usa pa nga kinabuhi han perpekto nga tawo​—an kinabuhi ni Jesus—​sugad nga lukat basi magin posible an pagkaada kagawasan hito nga pagkauripon. (Roma 5:19; Efeso 1:7) Tungod la kay mahigugmaon nga iginbayad han Dios ini nga lukat, nagkaada kita paglaom nga mabuhi hin dayon ha paraiso​—an paglaom nga nawara nira Adan ngan Eva.​—Pahayag 21:3-5.

Kon tatagdon an mga nahihimo hito, waray ruhaduha nga an regalo han Dios nga lukat​—nga nagpahinabo nga magin posible an kinabuhi nga dayon—​amo an pinakalabaw nga regalo. Basi masabtan kon kay ano nga “perpekto nga hatag” ito, aton kitaon kon paonan-o naaabot hito, ha diri matupngan nga paagi, an mga aspekto nga ginhisgotan ha nauna nga artikulo.

Nagtatagbaw han aton hingyap. Natural la ha tawo nga maghingyap nga padayon nga mabuhi. (Eklesiastes 3:11) Bisan kon imposible ito ha aton la pangalimbasog, ginpapahinabo han lukat nga magin posible ito. An Biblia nasiring: “Kay an bayad han sala  amo an kamatayon, pero an regalo nga iginhahatag han Dios amo an kinabuhi nga waray kataposan pinaagi kan Kristo Jesus nga aton Ginoo.”​—Roma 6:23.

Nagpupuno han aton panginahanglan. Diri maitatagana han mga tawo an lukat. An Biblia nasiring nga “an pagtubus han ira kinabuhi mahal hindoro,” salit diri nira maaakos an pagbayad hito. (Salmos 49:8) Tungod hito, kinahanglan gud naton an bulig han Dios basi makagawas ha sala ngan kamatayon. Kondi “pinaagi han lukat nga iginbayad ni Kristo Jesus,” igintatagana han Dios kon ano gud an aton ginkikinahanglan.​—Roma 3:23, 24.

Ha husto nga panahon. An Biblia nasiring: “An Kristo namatay para ha aton samtang makasasala pa kita.” (Roma 5:8) An paghatag han lukat “samtang makasasala pa kita” nagpapasarig ha aton han hilarom nga gugma han Dios bisan pa han aton pagin makasasala. Ngan naghahatag ito ha aton hin paglaom, bisan kon kinahanglan naton ilubon an mga resulta han sala.

Motibo nga maopay ngan diri makikalugaringon. Ginhihisgotan han Biblia kon ano an nakaaghat ha Dios nga ihatag an iya Anak sugad nga lukat: “An gugma han Dios iginpahayag ha aton hini nga paagi, han ginpakanhi han Dios ha kalibotan an iya bugtong nga Anak basi makarawat naton an kinabuhi pinaagi ha iya. Iginpahayag ini nga gugma, diri tungod kay ginhigugma naton an Dios, kondi tungod kay ginhigugma kita niya.”​—1 Juan 4:9, 10.

Paonan-o mo maipapakita nga gin-aapresyar mo an pinakalabaw nga regalo ha ngatanan? Hinumdumi an ginsiring ni Jesus ha Juan 3:16 nga an “nagpapakita hin pagtoo” la ha iya an matatalwas. Sumala ha Biblia, an pagtoo “amo an marig-on nga pagsarig nga matutuman an ginlalaoman.” (Hebreo 11:1) Basi magkaada hito nga pagsarig, importante an husto nga kahibaro. Tungod hini, gin-aaghat ka namon nga maggahin hin panahon basi mahibaro mahitungod kan Jehova nga Dios, an naghahatag hinin “perpekto nga hatag,” ngan mahibaro kon ano an imo sadang buhaton basi makarawat an kinabuhi nga waray kataposan nga posible mo mapahimulsan pinaagi han halad-lukat ni Jesus.

Basi mahibaroan mo ini ngatanan, usisaha an basado ha Biblia nga mga impormasyon ha www.pr418.com/war. An mga Saksi ni Jehova malilipay ha pagbulig ha imo. Sigurado kami nga samtang nahibabaro ka ngan nagpapahimulos tikang hinin pinakalabaw nga regalo, maaaghat ka ha pagsiring: “Nagpapasalamat ako ha Dios pinaagi kan Jesu-Kristo nga aton Ginoo!”​—Roma 7:25.