“Mtuka wuliwose wambone soni wamlama ukusatyocela kwinani, pakuti ukusatuluka kutyocela kwa Atati ŵa yakumulicila yakwinani.” (Yakobo 1:17) Atamose kuti lilembali likusala kuti Yehofa Mlungu, ŵali Atati ŵetu ŵakwinani atupele yindu yejinji mwakoloŵa makono nambope pana mtuka wine wambone watupele wakupunda mituka josope. Ana mtuka welewu ni wapi? Maloŵe gakumanyika mnope gaŵasasile Yesu ga pa Yohane 3:16 gakusatusalila kuti, “Mlungu ŵacinonyele mnope cilambo capasi mwamti ŵapelece Mwanagwe jwakupagwa jika, kuti jwalijose jwakukulupilila mwa jwalakwe akajonasika nambo akole umi wangamala.”

Mwangakayicila, mtuka waŵatupele Mlungu wa Mwanace jwakwe jwakupagwa jika, wuli mtuka wekulungwa mnope kupunda mituka josope. Mtukawu mpaka utukamucisye pakutugopola ku ulemwa, ucekulu soni ciwa. (Salimo 51:5; Yohane 8:34) Atamose tukalinjilelinjile camtuli ngamkanitukombola kugopoka ku yindu yeleyi. Nambope Mlungu ligongo lyakutunonyela, jwatupele mtuka welewu kuti tugopoce ku ulemwa, ucekulu soni ciwa. Yehofa Mlungu pakupeleka Mwanace jwakwe, Yesu Klistu mpela ciwombolo, jwapele ŵandu ŵakumpikanila cembeceyo cakutama ni umi wangamala. Nambo ana ciwombolo cili cici? Ligongo cici cili cakusosekwa? Soni ana mpaka tutende yamtuli kuti m’weji citukamucisye?

Ciwombolo cili mtengo wakulipilila cindu cacijonasice kapena kum’wombolela mundu jwali mu ukayidi. Baibulo jikusatusalila kuti Mlungu ŵapanganyisye acinangolo ŵetu ŵandanda, Adamu ni Hawa, ali ŵangali ulemwa. Nambosoni jwalakwe jwasakaga kuti jemanjaji asangalaleje ni umi wangamala m’paladaiso pacilambo capasi yimpepe ni ŵanace ŵawo ŵakaŵelece. (Genesis 1:26-28) Nambo cakutesya canasa ni cakuti ŵajasile yosopeyi mwakusagula kuti akampikanila Mlungu yayatendekasisye kuti aŵe ŵakulemwa. Ana yakuyicisya yakwe yaliji yamtuli? Baibulo jikusajanga kuti, “Ulemwa wajinjile m’cilambo kupitila mwa mundu jumo, soni ciwa kupitila mu ulemwa, m’yoyo ciwaco cawandile kwa ŵandu wosope ligongo wosope ŵalemwisye.” (Aloma 5:12) Mmalo mwakuti Adamu ŵapele ŵanace ŵakwe umi wambone soni wamlama, jwalakwe ŵapelele ulemwa soni ciwa.

Mtengo wa ciwombolo ukusasosekwasoni kuŵa wakulandana ni mtengo wa cindu cacijonasice. Ni mwayaŵelelesoni ni Adamu. Jwalakwe paŵalemwisye mwamele, jwajasile umi wamlama nambosoni Baibulo jikusasala kuti yeleyi yakwayiyesoni ŵanace ŵakwe. Kuti ŵandu agopoce ku ulemwa soni ciwa pasosekwagasoni mundu jwine jwakwete umi wamlama mpela muŵaŵelele Yesu. (Aloma 5:19; Aefeso 1:7) Mlungu mwacinonyelo, ŵapelece mbopesi jaciwombolo pakusaka kuti ŵandu ŵambone cakolesoni upile wakusangalala ni yindu yaŵayijasile Adamu ni Hawa wawuli umi wangamala m’paladaiso pacilambo capasi.—Ciunukuko 21:3-5.

Kuganicisya ya upile wa umi wangamala soni yindu yine yayikombolece ligongo lya mtuka wa mbopesi jaciwombolo, yikutusimicisya kuti welewu wuli mtuka wambone mnope mwamituka josope jatupele Mlungu. Kuti tuyamicileje “umbone” wa mtukawu, kwende tulole yaŵatesile Mlungu pakupeleka mtukawu mwakamulana ni yatutagulilene mungani jipite jila.

Ukusakwanilisya yakusacilila yetu. Ŵanduwe tukusasacilila mnope kuti tutameje kwangamala. (Mlaliki 3:11) Atamose kuti m’weji pajika ngaŵa mkupakombola kutenda yeleyi nambope mbopesi jaciwombolo mpaka jitukamucisye kutama kwangamala. Baibulo jikusasala kuti, “Ligongo malipilo ga ulemwa gali ciwa, nambo mtuka wakusapeleka Mlungu uli umi wangamala kupitila mwa Klistu Yesu Ambuje ŵetu.”—Aloma 6:23.

Wakwanilisye yakusoŵa yetu. Ŵanduwe ngamkanitukombola kupata mbopesi jaciwombolo.  Baibulo jikusasala kuti, ‘Soni mtengo wakuwombolela umi wawo wuli wapenani mnope mwakuti ŵandu nganaŵa akombwele kuwupata.’ (Salimo 49:8) M’yoyo, twasosecelaga mnope cikamucisyo ca Mlungu kuti tugopoce ku ulemwa soni ciwa. Nambo “tugopoledwe kupitila mumbopesi jaciwombolo jaŵapelece Klistu Yesu.” Pelepa Mlungu jwatupele cindu cisyesyene catwasosecelaga.—Aloma 3:23, 24.

Wapelecedwe pandaŵi jakwe. Baibulo jikusatusalila kuti, “Patwaliji ŵakulemwa, Klistu ŵatuwilile.” (Aloma 5:8) Ligongo lyakuti mtuka wa mbopesi jaciwombolo wapelecedwe pandaŵi jele m’weji ‘twaliji ŵakulemwa,’ yeleyi yikusalosya cenene kuti Mlungu akusatunonyela mnope ŵanduwe atamose kuti tuli ŵakulemwa. Nambosoni ukusatupa cembeceyo cakusangalasya ca msogolo atamose kuti apano tukusimana ni yakuyicisya yakupweteka ya ulemwa.

Wapelecedwe ni cakulinga cambone. Baibulo jikusasala cacamtendekasisye Mlungu kuti apelece Mwanagwe mpela mbopesi jaciwombolo. Jikusati, “Mlungu ŵalosisye cinonyelo cakwe kwetuwe pakuŵa ŵamtumisye Mwanagwe jwakupagwa jika pacilambo capasi kuti kupitila mwa jwalakwe tupate umi. Cinonyelo celeci cikugopolela kuti m’weji nganitumnonyela Mlungu, nambo jwalakwe ni juŵatunonyele.”—1 Yohane 4:9, 10.

Ana mpaka alosye camtuli kuyamicila mtuka wekulungwawu? Akaliŵalila maloŵe ga Yesu ga pa Yohane 3:16 gakuti, jwalijose “jwakukulupilila” mwa jwalakwe cacikulupuka. Mwakamulana ni Baibulo cikulupi cili “cembeceyo cisyesyene ca yindu yatukulindilila.” (Ahebeli 11:1) Kuti tukole cembeceyo celeci tukusasosekwa kumanyilila yisyesyene yakwamba Mlungu. Ni ligongo lyakwe tukwaŵenda kuti apateje ndaŵi jakulijiganya yakwamba Yehofa Mlungu, Juŵapelece mtuka “wambonewu” soni yakusosekwa kutenda kuti casangalale ni umi wangamala. Yosopeyi yikombolece ligongo lya mbopesi jaciwombolo ja Yesu.

Mpaka alijiganye yindu yejinji pakwamba yeleyi mwakuŵalanga ngani sya m’Baibulo syasikusimanikwa pa Intaneti ja www.pr418.com/yao. Ŵamboni sya Yehofa mpaka aŵe ŵakusangalala kwakamucisya wawojo. Ngatukukayicila kuti pakulijiganya umbone watukupata ligongo lya mtuka wa mbopesi jaciwombolo yicalimbikasya kuŵeceta kuti, “Sikomo Mlungu kupitila mwa Yesu Klistu Ambuje ŵetu!”—Aloma 7:25.