Avave ningo ndoikuaái mbaʼéichapa raʼe añetehápe Jesús pínta pórke haʼe núnka noñemoĩri vaʼekue álgien odivuha hag̃ua haʼanga térã ojapo hag̃ua chupe peteĩ estátua ijoguaha. Upéicharõ jepe ymaite guive oĩ hetaiterei artísta ojapóva Jesús raʼanga.

Sapyʼánte haʼekuéra odivuha térã ojapo hag̃ua Jesús raʼanga oreko enkuénta umi rrelihión omboʼéva, umi kostúmbre orekóva la hénte upe tiémpope térã la ikliénte oipotáva. Péro umi Jesús raʼanga ojapóva hikuái ikatu hína oafekta la hénte opensáva Jesúsre térã umi mbaʼe haʼe omboʼe vaʼekuére.

Umi artísta apytépe oĩ vaʼekue heta ojapóva Jesús raʼanga haʼerõguáicha peteĩ kuimbaʼe kangypami, ijavukúva, ivárva pokãmi ha hova ñembyasýva. Ótro katu odivuha chupe haʼerõguáicha peteĩ ánhel ko yvy ape ári, orekóva iñakã ári peteĩ aureóla térã nopenáiva voi avavére. Péro, ¿añetehápepa péicha raʼe Jesús? ¿Mbaʼéichapa ikatu jaikuaa mbaʼéichapa rakaʼe haʼe? Upearã ikatu jahecha umi rreláto bíblico ikatúva ñanepytyvõ ñañeimahina hag̃ua mbaʼéichapa raʼe añetehápe Jesús pínta ha jahecha hag̃ua chupe hendaitépe.

Péicha heʼi vaʼekue Jesús oñemboʼérõ guare Ñandejárape, posívlemente ojevautisárõ guare (Hebreos 10:5; Mateo 3:13-17). Péro, ¿mbaʼéichapa rakaʼe upe hete? Treinta áñorupi upe mboyve, pe ánhel Gabriel heʼi vaʼekue Maríape: “Nderyeguasúta ha reguerekóta peteĩ mitãkuimbaʼe”. Ha upe mitãme “oñehenóita Ñandejára Raʼy” (Lucas 1:31, 35). Upévare jaʼekuaa Jesús perfékto hague, Adán haʼe haguéicha avei perfékto iñepyrũme (Lucas 3:38; 1 Corintios 15:45). Jesús katuete ifísiko porãne raʼe ha ikatu oime avei ojogua umi judíope pórke isy María judía vaʼekue.

Jesús ivárva vaʼekue pórke umi judío itiémpope guare oipurúmi vaʼekue várva, péro umi románo nahániri. Umi judíope g̃uarã ningo iñimportánte vaʼekue pe várva pórke upéva ohechauka ojerrespeta ha oñemombaʼe vaʼerãha pe persónape, upéicha rupi siémpre omantene vién rrekortádo. Avei upe tiémpope umi nasaréo añoite noikytĩri vaʼekue la iñakãrague, por ehémplo Sansón. Opa umi mbaʼére ikatu jaʼe Jesús katuete orrekorta porãne hague la ivárva ha iñakãrague (Números 6:5; Jueces 13:5).

Jesús katuete imbareténe raʼe pórke heta áñore ombaʼapo vaʼekue karpinteríape ha ni ndorekói vaʼekue umi erramiénta koʼág̃a ojepurúva (Marcos 6:3). Avei oñepyrũmírente opredika, haʼeñoite omosẽmbaite vaʼekue pe témplogui umi ojapóvape negósio upépe. Omosẽ chupekuéra entéro “umi ovecha ha vakakuéra reheve, avei oipetepa yvýre umi kambistakuéra mesa ha omosarambipa imonedakuéra” (Juan 2:14-17). Jesús oipuru kuri pe kuérpo Ñandejára omeʼẽ vaʼekue chupe okumpli hag̃ua ivolunta. Haʼe heʼi: “Aha vaʼerã ótro siudápe amombeʼu hag̃ua umi marandu porã oñeʼẽva Ñandejára Rréinore. Upearã ningo añembou vaʼekue” (Lucas 4:43). Jesús opredika vaʼekue yvýrupi Palestina tuichakuére pe mensáhe ha ijestádo porãmante vaʼerã ojapo hag̃ua upéva.

Katuete ojekuaáne raʼe Jesús rehe hory ha otrata porãha umi héntepe, upévare koʼýte oñemoag̃uise vaʼekue hese umi osufríva ha iprovléma hetáva (Mateo 11:28-30). Ohechávo hikuái Jesús iñamávle ha ivuenoitereiha, haʼekuéra oĩ kuri segúro Jesús katuete okumplitaha ipromésa ha ombopiroʼytaha chupekuéra.  Umi mitã jepe ovyʼa vaʼekue Jesúsndi. La Biblia heʼi voi haʼe ohupi hague ijyva ári umi mitãme (Marcos 10:13-16).

Jesús ohasa asyetereíramo jepe omano mboyve, haʼe ndahaʼéi vaʼekue peteĩ persóna oikóva oñembyasyháre. Por ehémplo, siuda de Canápe oikórõ guare peteĩ kasamiénto, haʼe ojapo vaʼekue ýgui víno iporãva (Juan 2:1-11). Haʼe avei oñembyatými umi héntendi ha omboʼe chupekuéra heta mbaʼe opokoitereíva hesekuéra (Mateo 9:9-13; Juan 12:1-8).

Hiʼarive pe predikasión rupive Jesús omeʼẽ vaʼekue umi héntepe oportunida oiko hag̃ua hikuái pára siémpre, ha upe esperánsa katuete ombovyʼáne raʼe chupekuéra (Juan 11:25, 26; 17:3). Umi 70 disípulo omombeʼúrõ guare Jesúspe umi mbaʼe porã ohupyty vaʼekue hikuái predikasiónpe, haʼe “ovyʼaiterei” ha heʼi chupekuéra: “Pevyʼa [...] pende réra ojehai haguére yvágape” (Lucas 10:20, 21).

Jesús tiémpope, umi rrelihión omoakãva oñembotuicha vaʼekue ha ohechaukaseterei hikuái la ijautorida (Números 15:38-40; Mateo 23:5-7). Péro Jesús heʼi vaʼekue idisipulokuérape haʼekuéra ndoikói vaʼerãha oñembotuicha ni omandase hapicháre (Lucas 22:25, 26). Heʼi voi chupekuéra: “Peñeñangarekóke umi mboʼehára leipeguágui. Haʼekuéra oikose okorre opárupi ijao puku reheve [ha] oipota ojesaluda chupekuéra umi plasahárupi” (Marcos 12:38).

Jesús katu iñumílde ha ojeheʼa vaʼekue umi héntere, heta vése oĩ voi ni norrekonoséiva chupe oĩvo ijapytepekuéra (Juan 7:10, 11). Haʼe ndahaʼéi vaʼekue voi la idiferentetereíva umi ijapóstolgui. Upévare Judas otraisionárõ guare Jesúspe, ohetũ vaʼekue chupe ikatu hag̃uáicha umi hénte opilla mavaitévapa raʼe Jesús (Marcos 14:44, 45).

Upéicharõ, jepe ndajaikuaaporãi mbaʼeichaitépa raʼe añetehápe Jesús pínta, jaʼekuaa hese ndahaʼéi hague umi artísta odivuha haguéicha chupe. Péro ndaivaíriramo jepe jaikuaase mbaʼéichapa rakaʼe Jesús pínta, iñimportanteve hína jaikuaa mbaʼéichapa koʼág̃a jahecha vaʼerã chupe.

Péicha heʼi vaʼekue Jesús omano mboyvemi (Juan 14:19). Haʼe omano vaʼekue “opaga ha oguenohẽ hag̃ua hetápe pekádo poguýgui” (Mateo 20:28). Tres día haguépe, Ñandejára omoingove jey chupe peteĩ espírituicha “ha oheja umi hénte ohecha chupe”, umíva apytépe oĩ vaʼekue heta idisípulo (1 Pedro 3:18; Hechos 10:40). Péro, ¿mbaʼéichapa raʼe upérõ Jesús pínta? Amalisia idiferenteterei vaʼekue ha upévare ni umi iñamigoite ndoikuaái chupe. Por ehémplo, María Magdalena oimoʼã kuri peteĩ hardineronteha, ha mokõi idisípulo ohórõ guare Emaúspe, ojotopa hikuái hendive pe tapére, péro haʼekuéra oimoʼã haʼeha peteĩ extranhéro (Lucas 24:13-18; Juan 20:1, 14, 15).

¿Mbaʼéichapa ñañeimahinakuaa Jesúspe koʼág̃arupi? Mas de 60 áño Jesús omano rire, apóstol Juan ohecha vaʼekue chupe heta visiónpe. Péro haʼe ndohechái vaʼekue peteĩ kuimbaʼe omanombotávape peteĩ kurusúre, síno ohecha peteĩ “Rréi omandáva entéro rréire ha mburuvichakuéra Ruvicha”. Apóstol Juan ohecha Jesúspe ogovernávo Ñandejára Rréinope, peteĩ rréi koʼẽrõitéma ohundítava umi oñemoĩvape Ñandejárare, tahaʼe yvypóra térã demóniope, ha oguerútava heta mbaʼe porã ko yvy ape ári umi hénte iñeʼẽrendúvape g̃uarã (Apocalipsis 19:16; 21:3, 4).