Kana muthu uala ni foto ia Jezú. Muene nuka uemanene phala ku mu katula foto mba ku mu bhanga fikula ia pholo iê. Né muene kiki, ene mu mu londekesa kuala ndumba ni ndumba dia jihete mu jifikula jene mu bhanga tundé ukulu.

Mu kidi, o jihete jiji nuka a muene o pholo ia Jezú. Maji o jihete akua kubhanga jifikula jene mu seta o pholo ia Jezú ni mukutu uê mu kukaiela o athu mu jixi jâ, ilongesu ia jingeleja mba kala ki tuma o jingana jâ. Né muene kiki, o jifikula jene mu bhanga o jihete jiji, ja soko kufunhisa o ibanzelu ia athu ia lungu ni Jezú ni ilongesu iê.

Sai jihete, jene mu londekesa Jezú kala muthu ua bhele kiavulu, ni ndemba ia lebha, ni muezu ua dixalela mba kala mukua malamba. Mu jifikula ja kamukuá, Jezú a mu londekesa kala muthu mu nzumbi iala ni mukengeji ku mutue. O kuila o jifikula jiji jilondekesa kiambote Jezú? Kiebhi ki tu tena o ku kijiia? Kia dianga, tu tena kudilonga o izuelu i tu sanga mu Bibidia, i tu kuatekesa kuijiia kiebhi kia kexile o pholo ni mukutu ua Jezú. O izuelu íii i tena ku tu kuatekesa kukala ni ibanzelu ia kidi ia lungu ni muene.

Izuelu íii Jezú ua i tumbula mu kusamba, nange mu kithangana kioso kia mu batizala. (Jihebeleu 10:5; Matesu 3:13-17) Kiebhi kia kexile o mukutu uenhó? Makuinhi atatu a mivu ande dia Jezú ku mu batizala, o anju Ngambidiiele ua tangele Madiia, kuila: “Ua-ndu kuimita mu vumu diê, hinu u vuala mo’na diiala, . . . Mon’a Nzambi.” (Luka 1:31, 35) Mu kiki, Jezú uexile muthu ua iuka kala Adá kioso kia mu bhangele. (Luka 3:38; 1 Kolindo 15:45) Sé phata Jezú uexile diiala dia kexile ni mukutu ua fuama, muene nange ua difuile ni manh’â Madiia, mukua Juda.

Jezú ua kexile ni muezu, mukonda uene o ukexilu ua Jijudé, ki kiene kimoxi ni akua Loma. O miezu íii ia kexile mu lombolola kijingu ni ujitu; o miezu iâ ki i lebhele kiavulu, ki i dixalele ue kana. Jezú sé phata ua zelesele kiambote o muezu uê ni ndemba iê ku mutue. O Jinazilé, kala Sansau, ene ngó ka kexile mu bhuta o ndemba.​—Dialuilu 6:5; Afundixi 13:5.

Mu 30 a mivu, nzungule diâu, Jezú uexile kalupindelu, ua kexile mu kalakala sé o jifalamenda ja lelu. (Marku 6:3) Mu kienhiki, Jezú ua kexile ni mukutu ua nguzu. Ku dimatekenu dia ukunji uê, Jezú sé kubhinga ku mu kuatekesa, muene “u a kaiesa ene oso mu Tembulu, kumoxi ni jimbudi, ni jingombe. Anga u muangena bhoxi o itadi ia akua kutolokala, hé u lundula o meza mâ.” (Nzuá 2:14-17) Phala kutena kubhanga kiki, muene ua tokalele kukala diiala dia nguzu. Jezú ua tenene kukumbidila kiambote o kikalakalu kia mu bhele Nzambi, mukonda ua kexile ni mukutu ua nguzu, muene uixi: “Kua ngi bhingi ue kuia ku kola o Njimbu Iambote ia Utuminu ua Nzambi mu jisanzala jamukuá, kuma, kiene kia ngi bheka.” (Luka 4:43) Kua bhingile kukala ni nguzu mu mukutu phala kutena kunhunga o Palestina ioso mu kuboka o njimbu ia Nzambi.

O pholo ia Jezu ni ukexilu uê ua kusanguluka, sé phata ua bhangesa oso ‘a bhuila’ ku i taia o kixanu kiê ni ngalasa ioso. (Matesu 11:28-30) O ukexilu uê uambote ua bhana dingi nguzu ku izuelu iê ia kunhohesa  oso a mesenene kudilonga kua muene. Katé muene ni ana-ndenge a mesenene kuzukama kuala Jezú, mukonda o Bibidia iamba: “Anga u tambula [o tuana] bhu jihata jê.”​—Marku 10:13-16.

Sumbala Jezú uevuile ndolo iavulu ni malamba mu kithangana kioso kia kexile ku mu jibha, maji muene k’exile mukua malamba kana. Mu kifika, muene ua bhange kima phala kuuabhesa o fesa ia ukaza ia bhitile mu mbanza ia Kanana, muene ua bhilula o menha mu vinhu. (Nzuá 2:1-11) Mu kithangana kia mukuá, muene ua longo madisá ambote, a kala ku muxima ua athu mu mivu ni mivu.​—Matesu 9:9-13; Nzuá 12:1-8.

Benge-benge, o ukexilu ua Jezú ua kuboka, uexile mu bhana kidielelu kia muenhu ua kalela-ku ni kuzediua kua ió akexile ku muivua. (Nzuá 11:25, 26; 17:3) Kioso o 70 a maxibulu mê kia mu tangela ioso ia bhitile ni ene mu kuboka, muene ua “sanguluka kiavulu” iu uambe: “Mu sangulukila o majina menu kuma a ma soneka ku diulu.”​—Luka 10:20, 21.

O atuameni a jingeleja mu izuua ia Jezú, a funhile jindunge phala ku a ximana kuala o athu ni kua londekesa o ungana uâ. (Dialuilu 15:38-40; Matesu 23:5-7) Maji Jezú ki kiene kia bhange, muene ua longo o jipoxolo jê phala ka ‘tumine’ akuâ. (Luka 22:25, 26) Jezú ua a tangela uixi: “Dimukinenu o jimesene já kulonga Kitumu, endi o kukembela mu izuatu ia lebha ni kutambula maumenekenu bhu itanda mu nzunga.”​—Marku 12:38.

Maji Jezú ua dibundile ni mundu, katé muene sai kithangana ka tenene ku muijiia. (Nzuá 7:10, 11) Né muene mu kaxi ka 11 dia jipoxolo jê ja fiiele, o mukutu uê uexile kala ua jipoxolo jê. Phala ku mu londekesa ku jinguma jê, Juda dia Kadiota, ua bhingile kubhana beju kala “kijimbuete.”​—Marku 14:44, 45.

Mu kiki, sumbala kuene ima iavulu ia lungu ni Jezú tua kambe ku ijiia, maji mu kidi Jezú ka difuile ni jifikula jene mu bhanga o jihete. O kia beta o kota, ko kuijiia kiebhi kia kexile o pholo ni mukutu ua Jezú maji kiebhi ki tu mu mona lelu.

Mu kizuua kioso Jezú kia tange o izuelu íii, kiene o kizuua kia mu jibha iá a mu fundu. (Nzuá 14:19) Muene ua bhana o ‘muenhu uê mu kukula o mundu.’ (Matesu 20:28) Mu kizuua kia katatu, Nzambi ua mu fukununa “mu nzumbi” ni “u mu tukulula” ku maxibulu mê. (1 Phetele 3:18; Ikalakalu 10:40) Kiebhi-phe kia kexile Jezú kioso muene kia tukulukila o maxibulu mê? Muene ua lungulukile bhofele mukonda katé muene ni maxibulu mê a kazola ka tenene ku mu tungula ni lusolo kioso kia mu mono. Madiia dia Manda ua mu fikile kuila mudimi ua jaludim; mu njila ia kuia ku sanzala ia Emaú, kiiadi kia maxibulu mê a mu fikile kuila musonhi.​—Luka 24:13-18; Nzuá 20:1, 14, 15.

Kiebhi ki tua tokala kutala Jezú mu lelu didi? Mu kubhita makuinhi a samanu a mivu ndenge, kioso Jezú kia fu, o poxolo Nzuá ua mu tale mu kisuma. Nzuá ka mono muthu ua mu fua ku dikulusu. Maji ua mono “Sobha ia jisobha, Ngana ia jingana,” o Sobha ia Utuminu ua Nzambi, ua-nda buikisa o jinguma ja Nzambi, kikale o madimonho kikale o athu. Mu kusuka-ku ua-nda bheka mabesá a kalela-ku ku athu.​—Dijingunuinu 19:16; 21:3, 4.