Xakaj kimati kenon melauak tlachiaya Jesús pampa yejua xkeman onoyektlali niman ijkon makixkopinakan ipan se amatl noso ipan itlaj okse. Maski ijkon, itech miyek xiuitl Jesús miyekan nesi ipan intekiyo miyekej tlaixkopinkej.

Melauak ika nion se itech yejon tlaixkopinkej xkimatiyaj kenon melauak tlachiaya Jesús. Miyekpa, kixkopinayaj ipampa kenon chantiyaj ipan yejon tonaltin, tlen kineltokayaj noso ipampa tlen kuelitayaj akin kinnemakiltiayaj. Ipampa nochi yejuin, tlen kichijchiuayaj ueliskia kinpatilis kenon tlanemiliayaj itech Jesús, noso hasta ueliskia kichiuas maka kuajli matlanemilikan itech niman itech itlamachtiluan.

Sekimej okixkopinkej Jesús ken se tlakatl akin xkojtik, tsonueueyak, ika achijtsin ixayakatson noso san ajmankatlachiaya. Ipan okseki tlaixkopinaltin, Jesús nesi ken se iluikaktekitketl tlen ikuatipan onka itlaj yeualtik noso ken se tlakatl xtenotski. ¿Kiteititiaj tlen melauak yejon tlaixkopinaltin? ¿Kenon uelis tikmatiskej? Itlaj tlen techpaleuis yejua tla tomachtiaj seki tlaxeloltin tlen techpaleuiyaj tiknemiliskej kenon tlachiaya, niman noijki techpaleuis matikitakan ijkon ken noneki.

Yejuin tlajtoltin nesi ipan se teoyotl tlen Jesús okijto, kanaj ijkuak onoapolakti (Hebreos 10:5; Mateo 3:13-17, TNM). ¿Kenon katka yejon tlalnakayotl? Ikipiaya kanaj treinta xiuitl ika iluikaktekitketl Gabriel okijlika María: “Tikanas mokonetsin niman tiktlakatilis se okichkonetl, [...] iKonetsin Dios” (Lucas 1:31, 35). Kuakon, Jesús katka se tlakatl akin xkipiaya tlajtlakojli, ijkon ken Adán katka ijkuak okichijchiujkej (Lucas 3:38; 1 Corintios 15:45, TNM). Jesús kanaj okipix se itlalnakayo tlen melak kuajli tlachijchiujtli, niman ken tlachiaya kanaj seki okinokixti inan, María, akin judía katka.

Jesús, ijkon ken nochimej judíos ipan yejon tonaltin, kipiaya ixayakatson xijkon ken romanos. Tikpiyas moxayakatson kichiuaya ika mamitsueyitakan niman mamitstlakaitakan, ika yejon, nochimej kuajli kitekiyaj niman kiyektlaliayaj. Kuajli tikmatstokej ika Jesús kuajli kitekiya ixayakatson, chipauak katka itson niman notsonmelauaya. San nazareos, ken Sansón, xkitekiyaj intson (Números 6:5; Jueces 13:5).

Jesús kanaj melak chikaujtoya, pampa itech 33 xiujtin tlen kipiaya, miyek xiuitl otekit ken kojxinketl niman ijkuakon xkipiaya tlen aman kikuij ika tekitij (Marcos 6:3). Ijkuak opeuj tenojnotsa okinkixti itech teopan, niman xakaj okipaleui, nochimej akin tlanemakayaj “iuan inborregos niman inuakaxuan. On yejuan kitepatiliayaj tomin, okinxixinilij intomin ipan tlajli, niman okinxixinilij inmesa” (Juan 2:14-17). Nonekiya kojtik yes niman ijkon uelis kichiuas yejuin. Jesús okitekitilti itlalnakayo tlen toTajtsin okimakak ika kichiuas tlen yokinauatijka: “Kipiya ika nikteijlis yejon kuajli tlajtoltin itech itekiuajyo toTajtsin pampa ika yejuin onechajtitlankej” (Lucas 4:43, TNM). Nonekiya melak chikauak yes niman ijkon uelis tlaxikos nejnemis itech nochi Palestina niman kiteijlis yejon tlajtojli.

Ixayak Jesús tlen kiteititiaya pakilistli niman ken kuajli tenotsaya okichiujkej kuajli makiselikan tlen okimijli akin tlajyouijtoyaj niman kimamajtoyaj miyek tlemach (Mateo 11:28-30). Pampa kuajli tenotsaya niman kipiaya kuajli iyojlo, okichiujkej manoneltoka tlajtoltin tlen okiteijli ika kinseselis akin kinekiskiaj  nomachtiskej itech. Niman hasta telpokamej kinekiyaj nemiskej iuan Jesús, pampa Biblia kijtoua: “Jesús okinnapaloj on kokonej” (Marcos 10:13-16).

Maski melauak ika Jesús melak otlajyoui achto ika mikis, yejua xkatka se tlakatl akin najmantinemiya. Se neskayotl, ijkuak onochiuj se iluitl ipampa se namiktilistli ipan Caná, yejua otepaleui maonia pakilistli ijkuak okikuep atl ika vino tlen melak kuajli (Juan 2:1-11). Ipan okseki tlanechikoltin okiteijli tlamachtiltin tlen xkeman kilkauaskiaj akin ompa nemiyaj (Mateo 9:9-13; Juan 12:1-8).

Niman tlen ueyi kijtosneki, ika itenojnotsalis, Jesús okichiuj ika akin kikakiyaj makipiyakan se teyolpakti tlamachialistli itech se nemilistli tlen xkeman tlamis (Juan 11:25, 26, TNM; 17:3). Ijkuak 70 inomachtijkauan okijlikej kenon onokuepatoj ipan tenojnotsalistli, Jesús “sanoyej okipaktij” niman okijto: “Xpakikan pampa nemotoka ye tlajkuilolnestikaj ne iluikak” (Lucas 10:20, 21).

Tlanauatijkej ipan tlaneltokijli itech itonaluan Jesús kitejtemouiliayaj kenon oksekimej makinueyiitakan niman kiteititiskej ika yejuamej akin tlanauatiayaj (Números 15:38-40; Mateo 23:5-7). San ika, Jesús okimijli itlatitlankauan maka manoneltokakan tetekouan itech oksekimej (Lucas 22:25, 26). Niman noijki, okimijli manotlajpiyakan itech escribas ijkuak okijto: “Yejuamej kuelitaj kistinemiskej ikan intlaken uejueyakej para nochi tlakatl kinemilis  ika on temachtijkej ikan itlanauatil Dios sanoyej ueyixtikaj. Niman kuelitaj ijkuak tlakamej kintlajpalouaj neka ipan plaza” (Marcos 12:38).

Jesús, xijkon katka, yejua poliuiya intsajlan miyekej; kemantika nion xkitayaj ika yejua katka (Juan 7:10, 11). Nion ken tlachiaya xkichiuaya ika Jesús nimantsin manoixmati ijkuak nemiya iuan 11 itlatitlankauan yolmelaujkej. Judas, akin okinemakak, ononek kiteijlis ika kitenkuaskia noso kipipitsoskia niman ijkon akin kitejtemouayaj kimatiskiaj akinon katka Jesús (Marcos 14:44, 45)

Kuakon, maski onka miyek tlen xtikmatij, kuajli nestika ika Jesús xijkon tlachiaya ken miyekej yokixkopinkej. San ika, melak ueyi kijtosneki matikmatikan kenon kipiya tikitaskej Jesús aman xijkon ken tikmatiskej kenon melauak tlachiaya.

Sakin ika okijto yejuin tlajtoltin, Jesús okimiktijkej niman okitokakej (Juan 14:19). Yejua okitemakak inemilis ken tlaxtlauijli ipampa miyekej (Mateo 20:28). Opanok yeyi tonajli, niman toTajtsin okiyoliti “kentla espíritu” niman “okichiu para ma kuajli noteititi” ixpan seki inomachtijkauan (1 Pedro 3:18, TNM; Hechos 10:40). ¿Ijkuakon kenon tlachiaya Jesús? Nesi ika melak yonopatlaka, pampa nion akin melak inuan nouikaya xnimantsin okixmatkej. María Magdalena okinemili ika katka akin kintlajpiaya kojtlakilyomej, niman omemej inomachtijkauan akin yayaj Emaús okinemilijkej ika katka yakaj akin xompa chantiya (Lucas 24:13-18; Juan 20:1, 14, 15).

¿Kenon nonekiskia tiknemiliskej ika tlachia Jesús aman? Ipantsin 60 xiuitl sakin ika Jesús omik, apóstol Juan, akin kitlasojtla, miyekpa okitak ipan tlatlachalistin. Juan xokitak se tlakatl akin imiktika ipan se kojnepanojli, yejua okitak se “Rey impan nochimej on reyes niman inTeko impan nochimej on tetekouan” akin sa achijtsin poliui ika kinpopolos itlauelikniuan toTajtsin, xkuakualtin tlaltikpakchanejkej niman espíritus, niman kinmakas tlaltikpakchanejkej tlateochiualistin tlen xkeman tlamiskej (Apocalipsis [Revelación] 19:16; 21:3, 4).