Niun hende no tin potrèt di Hesus. Nunka nan no a pinta un plachi òf traha un eskultura di dje. Pero tòg, atraves di siglonan el a sali den diferente obra di arte.

Ta klaru ku e artistanan di e obranan ei no tabata sa ki aparensia Hesus tabatin. Ta e kultura di e époka, e estilo di e artista òf e smak di e klientenan tabata determiná kon nan a pinta Hesus. Asina mes nan pintura- i eskulturanan por influensiá òf nubla e manera ku hende ta mira Hesus i su siñansanan.

Algun artista a pinta Hesus komo si fuera e tabata un hòmber suak ku kabei largu i ku un barba fini òf nan a yega di pint’é ku kara tristu. Den otro obranan, Hesus ta parse un hende sobrehumano, ku un krans di lus riba su kabes òf un hende ku ta tene otro hende leu for di dje. E obranan akí ta duna nos un bon idea kon Hesus su aparensia tabata? Kon nos por haña sa esei? Un manera ku nos por haña sa ta di analisá algun pasashi di Beibel ku por yuda nos komprondé ki aparensia Hesus tabatin. Ademas, nan lo yuda nos tin un punto di bista korekto di Hesus.

Ora Hesus a batisá, el a bisa e palabranan akí den un orashon. (Hebreonan 10:5; Mateo 3:13-17) Kon e kurpa akí tabata? Un 30 aña promé, e angel Gabriel a bisa Maria: “Lo bo sali na estado i duna lus na un yu hòmber, . . . Yu di Dios.” (Lukas 1:31, 35) Pues, Hesus tabata un hòmber perfekto, meskos ku Adam tabata ora Dios a kre’é. (Lukas 3:38; 1 Korintionan 15:45) Hesus mester tabata un hòmber bon formá, i muy probablemente e tabata parse su mama, Maria.

Na kontraste ku e romanonan, Hesus tabatin un barba pasobra esei tabata e kustumber di e hudiunan. E barba akí tabata un símbolo di dignidat i rèspèt i no tabata largu ni mal mantené. Sin duda Hesus tabatin su barba i kabei nèchi kòrtá. Solamente e israelitanan ku tabata nazareo, manera Sámson, no tabata kòrta nan kabei.—Numbernan 6:5; Huesnan 13:5.

Pa un gran parti di Hesus su 33 añanan di bida riba tera el a traha komo karpinté, i e no tabatin hèrmèntnan moderno. (Marko 6:3) Pa e motibu akí, e mester tabata un hòmber fuerte. Por ehèmpel, na kuminsamentu di su sirbishi, sin yudansa di niun hende, el “a kore ku e karnénan i ku e bakanan for di tèmpel, huntu ku esnan ku tabata bende nan, i el a basha e monedanan di e kambiadónan di plaka abou i bòltu nan mesanan.” (Huan 2:14-17) Ta un hòmber ku hopi forsa so por hasi algu asina. Pues Hesus a usa e kurpa ku Dios a dun’é pa kumpli ku e asignashon ku Dios a dun’é. Hesus a bisa: “Mi tin ku deklará e bon notisia di e Reino di Dios na e otro statnan tambe, pasobra ta pa esaki Dios a manda mi.” (Lukas 4:43) Pa e por a logra esei, e mester tabatin hopi energia i resistensia pa biaha na pia den Palestina pa deklará e mensahe akí.

Hesus su ekspreshonnan kaluroso i su personalidat amabel lo mester a atraé hende ku tabata ‘traha  duru i ku tabata kargá’ pa skucha na su siñansanan. (Mateo 11:28-30) Su amabilidat i bondat a yuda hende ku kier a siña di dje mira ku lo el a refreská nan. Asta mucha tabata ke ta serka Hesus. Beibel ta bisa: “El a brasa e muchanan.”—Marko 10:13-16.

Aunke ku Hesus a pasa doló promé ku el a muri, e no tabata un hende tristu. Por ehèmpel, pa hasi e momento mas gososo, el a kambia awa i a hasié biña di bon kalidat ora e tabata na un fiesta di kasamentu na Kana. (Huan 2:1-11) Na otro okashonnan, el a siña otro hende lèsnan ku hamas nan lo a lubidá.—Mateo 9:9-13; Huan 12:1-8.

Riba tur kos, e mensahe ku Hesus tabata prediká a yuda hende ku tabata skuch’é haña e speransa di bida eterno. (Huan 11:25, 26; 17:3) Ora 70 di su disipelnan a bin kont’é tokante e éksito ku nan tabatin den nan predikashon, el a “yena ku goso” i a bisa: “Alegrá pasobra boso nòmber a ser skirbí den shelu.”—Lukas 10:20, 21.

Lidernan religioso den tempu di Hesus a buska manera pa hala atenshon na nan mes i demostrá nan outoridat. (Numbernan 15:38-40; Mateo 23:5-7) Na kontraste ku nan, Hesus a siña su apòstelnan pa no “dominá” otro hende. (Lukas 22:25, 26) De echo, Hesus a spièrta nan i a bisa: “Tene kuidou ku e eskribanan; nan gusta kana rònt den paña largu i pa hende kumindá nan ku rèspèt riba plasa.”—Marko 12:38.

Kontrali na esei, Hesus su aparensia sí no tabata diferente for di otro hende, i na algun okashon nan no por a distinguié for di e hendenan den e multitut. (Huan 7:10, 11) Ademas, den sentido físiko, e no a diferensiá mashá for di su 11 fiel apòstelnan. Hudas, esun ku a traishoná Hesus, a “palabrá un señal” ku e hendenan ku a bai pa arestá Hesus. El a duna Hesus un sunchi, i esei a sirbi komo señal pa nan por a identifiká Hesus i arest’é.—Marko 14:44, 45.

Pues, aunke ku nos no tin tur detaye, ta opvio ku Hesus no tabata manera hopi biaha nan a pint’é. E manera ku awe nos ta mira Hesus ta mas importante ku ki su aparensia tabata.

E mesun dia ku Hesus a bisa e palabranan akí, el a muri i nan a der’é. (Huan 14:19) El a duna su bida komo un “reskate a kambio di hopi hende.” (Mateo 20:28) Riba e di tres dia, Dios a dun’é bida bèk “den spiritu” i “a laga” algun di su disipelnan mir’é. (1 Pedro 3:18; Echonan 10:40) Kon e aparensia di Hesus tabata ora el a aparesé na su disipelnan? Aparentemente e tabata mustra otro for di loke e tabata promé, pasobra asta su mihó amigunan no a rekonos’é mesora. Maria Magdalena a kere ku e tabata un kunukero, i dos di su disipelnan ku tabata rumbo pa Emaus a kere ku e tabata un estranhero.—Lukas 24:13-18; Huan 20:1, 14, 15.

Kon nos mester imaginá ku Hesus ta aworakí? Mas ku 60 aña despues ku Hesus a muri, Huan, e apòstel stimá, a mira vishonnan di Hesus. E no a mira Hesus ta muri na un krus. Mas bien, el a mira e “Rei di reinan i Señor di señornan,” e Rei di e Reino di Dios, kende un bes lo vense e enemigunan di Dios, esta, angelnan i hende malbado, i trese bendishon eterno pa humanidat.—Revelashon 19:16; 21:3, 4.