Neʼe Feafeaʼi Moʼoni Koa Ia Sesu?
ʼE mole ʼi ai he tahi ʼe ina maʼu he pāki ʼo Sesu. Koteʼuhi neʼe mole fai pea neʼe mole togi hona pāki. Kae, lolotoga ni sekulo neʼe tuʼu ʼi te ʼu pāki ʼa te hahaʼi tufuga faiva.
Koia, ko te kau tufuga faiva ʼaia ʼe mole natou iloʼi moʼoni pe neʼe feafeaʼi ia te fofoga mo te agaaga ʼo Sesu. Ko te kau gaue tufuga ʼaia neʼe uga natou e ʼanatou agaʼi fenua, mo te ʼu akonaki fakalotu ke natou togi mo fai he pāki ʼo Sesu. Kae, ko ʼanatou gaue ʼaia ʼe tupu ai he faʼahiga manatu peʼe ko he faʼahiga sio ʼe hala ʼo ʼuhiga mo Sesu pea mo ʼana akonaki.
ʼE ha ia Sesu ʼi te ʼu pāki ʼa ʼihi tufuga faiva ʼe lauʼulu loloa pea ʼe sino kovi, ʼe kaukava pea ʼe matamamahi. Ko ʼihi pāki leva, ʼe ha ai ia Sesu ʼe malohi pea mo he pale gigila peʼe ʼe tuʼu mamaʼo mai te hahaʼi. ʼE feia moʼoni koa te agaaga ʼo Sesu? ʼE feafeaʼi hatatou iloʼi? ʼE tonu ke tou vakavakaʼi te ʼu manatu ʼae ʼi te Tohi-Tapu ke tou iloʼi ai pe neʼe feafeaʼi moʼoni ia Sesu. Pea ʼe toe tokoni mai anai ke tou maʼu te faʼahiga manatu ʼae ʼe lelei ʼo ʼuhiga mo ia.
“NEʼE KE TEUTEUʼI HE SINO MAʼAKU”
Ko te ʼu palalau ʼaeni neʼe fai e Sesu ʼi tana faikole, ʼi te temi ʼae neʼe papitema ai. (Hepeleo 10:5; Mateo 3:13-17) Neʼe feafeaʼi tona sino? ʼI te ʼu taʼu ʼe 30 ki muʼa atu, neʼe ui fenei e te ʼaselo ko Kapeliele kia Malia: “ ʼE ke faitama anai, pea ʼe ke fanauʼi anai he tama, . . . ko te ʼAlo ʼo te ʼAtua.” (Luka 1:31, 35) Koia, ko Sesu neʼe ko he tagata haohaoa ohage pe ko Atama ʼi te temi ʼae neʼe fakatupu ai. (Luka 3:38; 1 Kolonito 15:45) Neʼe talavou ia Sesu pea neʼe lagi hoko ki tana faʼe ko Malia, ʼae ko te fafine Sutea.
Neʼe kaukava ia Sesu ʼo mulimuli ki te agaʼi fenua Fakasutea kae mole ki te agaʼi fenua ʼa te kau Loma. Ko te faʼahiga tokaga ʼa te kau Sutea ki ʼonatou kava neʼe ha ai tonatou maʼa pea mo te fakaʼapaʼapa. Pea neʼe mole tonu ke loloa fau ʼonatou kava pea mo ʼuli. Koia, neʼe tokaga ia Sesu ke maʼa pea mo lelei ʼona kava mo te faʼahiga kosi ʼo tona ʼulu. Neʼe ko te kau Nasilea pe ʼae neʼe mole tonu ke tuʼusi ʼonatou lauʼulu, ohage ko Samisoni.—Numelo 6:5; Tui Fakamaau 13:5.
Lolotoga ni taʼu ʼo kaku ki tona taʼu 30, ko Sesu neʼe ko he tagata tufuga ʼakau. Pea neʼe gaue pe ʼaki te ʼu meʼa gaue ʼo te temi ʼaia. (Maleko 6:3) Koia neʼe ko he tagata neʼe hoihoifua pea mo sino malohi. ʼI te kamata ʼo tana minisitelio, neʼe ko ia tokotahi pe ʼae neʼe ina “kapu ʼi te fale lotu ia natou fuli mo ʼanatou ovi pea mo ʼanatou pipi, mo ina huaʼi te ʼu piesi ʼa te hahaʼi fetogi paʼaga pea mo tokatokahi ʼanatou laupapa.” (Soane 2:14-17) Neʼe gata pe ki he tagata malohi ke ina fai te meʼa ʼaia. Neʼe fakaʼaogaʼi e Sesu te sino ʼae neʼe teuteuʼi e te ʼAtua maʼa ia ke ina fakahoko ʼaki te gaue ʼo tana Tamai. Neʼe ina ui fenei: “ ʼE tonu foki ke au tala te logo lelei ʼo te Puleʼaga ʼo te ʼAtua ki te ʼu kolo ʼae, ko te tupuʼaga ʼaia ʼo toku fekauʼi mai.” (Luka 4:43) Koia neʼe ʼaoga ki ai he toe malohi ke feala hana fealuʼaki lalo ʼi Palesitina katoa ʼo fakamafola te logo ʼaia.
“KOTOU ʼOMAI KIA TE AU, . . . PEA ʼE AU FAKAFIMALIEʼI ANAI KOUTOU”
ʼUhi ko tana agalelei, neʼe faigafua ai ki te hahai ʼae neʼe “kinakina mo mafasia” ke natou tali te fakaafe ʼaia ʼa Sesu. (Mateo 11:28-30) Pea neʼe ha ai ʼe ina fakafimalieʼi anai ia natou ʼae ʼe natou fia iloʼi ia ia. Maʼia mo te ʼu kiʼi tamaliki neʼe natou fia fakaovi kia Sesu, he ʼe ui fenei ʼi te Tohi-Tapu: “Neʼe faʼufua ai ki te ʼu kiʼi tamaliki.”—Maleko 10:13-16.
ʼE moʼoni neʼe mamahi ia Sesu ʼi muʼa ʼo tana mate kae neʼe mole ko he tahi neʼe lotomamahi tuʼumaʼu. Ohage la, neʼe kau ki te faiʼohoana ʼae ʼi Kana ʼo ina fetogi ai te vai ko he vino. (Soane 2:1-11) Pea ʼi ʼihi atu ʼu fakatahi, neʼe ina fai he ʼu akonaki neʼe mole feala ke galoʼi.—Mateo 9:9-13; Soane 12:1-8.
Pea ʼaki te faifakamafola ʼa Sesu neʼe fiafia te hahaʼi pea neʼe malave ki ʼonatou loto te ʼamanaki ʼae ki te maʼuli heʼe gata. (Soane 11:25, 26; 17:3) ʼI te temi ʼae neʼe fakamatala age ai e te toko 70 tisipulo tanatou faifakamafola, neʼe “fiafia ʼaupito” ia Sesu pea neʼe kalaga fenei ai: “Kotou fakafiafia he ʼe kua tohi ʼokotou higoa ʼi selo.”—Luka 10:20, 21.
“KAE ʼE MOLE TONU KE KOTOU FEIA”
Ko te kau takitaki lotu ʼo te temi ʼo Sesu, neʼe natou faigaʼi ke tokagaʼi natou e te hahaʼi pea mo tonatou ʼuhiga pule. (Numelo 15:38-40; Mateo 23:5-7) Kae neʼe mole feia ia Sesu. Neʼe ina akoʼi ki ʼana tisipulo ke mole natou “puleʼi” he tahi. (Luka 22:25, 26) Neʼe fai e Sesu te fakatokaga ʼaeni: “Kotou tokakaga ki te kau sekelipa ʼae ʼe natou feoloʼaki mo ʼonatou kofu loloa pea mo natou loto ke fai age he ʼu fakamalo ʼi te ʼu fakatauʼaga koloa.”—Maleko 12:38.
Ko Sesu neʼe fakatahi mo te hahaʼi. Kae ʼi ʼihi temi, neʼe fealuʼaki fakapulipuli. (Soane 7:10, 11) Maʼia pe la mo tana fakatahi mo ʼana apositolo ʼe 11 neʼe mole hona kehekehe mo natou. Koia ko Sutasi ʼae neʼe ina lavakiʼi ia Sesu neʼe ina ʼumaʼi ia ia pea neʼe ko he “fakailoga” ʼaia ke iloʼi kehe ai ia Sesu mai ia natou.—Maleko 14:44, 45.
Logo la ʼe mole tou iloʼi lelei pe neʼe feafeaʼi ia tona agaaga, kae ʼe mahino ia neʼe mole hage ia ko te ʼu pāki peʼe ko te ʼu fakatata ʼae neʼe fai ʼo ʼuhiga mo ia. Kae ko te meʼa ʼae ʼe maʼuhiga age ʼe ko tatatou faʼahiga manatu ʼo ʼuhiga mo Sesu ʼi te temi nei ʼi tatatou fia iloʼi pe neʼe feafeaʼi moʼoni ia ia.
“ ʼE KEI TOE TE KIʼI TEMI SIʼI PEA ʼE MOLE TOE SIO ANAI TE MALAMANEI KIA TE AU”
Neʼe mate pea neʼe tanu ia Sesu ʼi te ʼaho pe ʼae neʼe ina fai ai te ʼu palalau ʼaeni. (Soane 14:19) Neʼe ina foaki tona maʼuli ko “he totogi maʼa te tokolahi.” (Mateo 20:28) Neʼe fakatuʼuake e te ʼAtua ia ia ʼi te tolu ʼaho ko “he laumalie” pea neʼe ina “fakagafua age ke ha” ki ʼihi ʼo ʼana tisipulo. (1 Petelo 3:18; Gaue 10:40) Neʼe feafeaʼi koa ia Sesu ʼi tana ha ʼaia ki ʼana tisipulo? Neʼe mole kei tatau tona agaaga. Maʼia pe la mo ʼana tisipulo neʼe mole kei natou iloʼi ia ia. Ohage la, neʼe ui e Malia Maketalena ko Sesu neʼe ko he tagata fai ʼoloto. Pea ʼi te olo ʼa te ʼu tisipulo ʼe lua ki Emausi, neʼe nā ui ko he matapule.—Luka 24:13-18; Soane 20:1, 14, 15.
ʼE feafeaʼi ia Sesu ia ʼaho nei? Hili taʼu ʼe 60 talu te mate ʼa Sesu, neʼe ha ki te apositolo ko Soane ni meʼa maʼuhiga ʼo ʼuhiga mo Sesu. Neʼe mole sio ia ʼe mate ʼi he koluse. Kae neʼe sio ia ki te “Hau ʼo te ʼu hau pea mo ʼAliki ʼo te ʼu ʼaliki,” te Hau ʼo te Puleʼaga ʼo te ʼAtua ʼae ka ina tauteaʼi anai te ʼu fili ʼo te ʼAtua, ia te ʼu temonio mo te hahaʼi talagataʼa. Pea ʼe foaki mai anai e te Puleʼaga ʼaia he ʼu fua lelei ʼe heʼe gata ki te malamanei.—Fakaha 19:16; 21:3, 4