Dariy be’ ni bay bang e sasing rok nri yaan Jesus. Dariy be’ ni fek bang e sasing ni yaan fa ni ngongliy reb e liyos ni yaan. Yugu aram rogon, ma kab kakrom i yib ni boor e girdi’ ni yad ba salap i yoloy yaan ban’en ni yad ma yoloy yaan boch ban’en ni bay yaan Jesus riy.

Bin riyul’ riy e, de nang e pi girdi’ ney ko ri uw rogon yaan Jesus. Pi girdi’ ney e ba ga’ ni yad ma yoloy yaan Jesus nrogon nib puluw ko yalen u reb e nam, nge machib u barba’ e teliw, nge n’en ni baadag e piin ni ka rogned ni ngan yoloy yaan Jesus ni ngar chuw’iyed. Yugu aram rogon, ma pi sasing nge liyos ni ma ngongliy e pi girdi’ ney e rayog ni nge gagiyegnag fa yoornag laniyan’ e girdi’ u murung’agen Jesus nge pi n’en ni i machibnag.

Bay boch e piin ni yad ma yoloy yaan ban’en nrogon yaan Jesus ni yad ma yoloy e be’ ni bay soroben mab n’un’uw piyan lolugen mab meewar ara be’ nrib kireban’ yaan. Ku bay yu yang e sasing ni kan ngongliy ni be dag yaan Jesus ni bod reb e engel, ara bay e garathia rok, ara ir be’ nder ma lemnag yugu boch e girdi’. Ere gur, pi sasing ney e ba puluw rogon ni be dag yaan Jesus? Uw rogon ma gad nang? Reb e kanawo’ nrayog ni ngad nanged riy e aram e ngad yaliyed boch e thin nu Bible nrayog ni nge ayuwegdad ni ngad susunnaged yaan Jesus. Pi thin ney e ku ra ayuwegdad ni ngad lemnaged rarogon Jesus ko bin nib puluw e kanawo’.

Ireray boch e thin ni yog Jesus u lan e meybil rok ko ngiyal’ ni baaram nni taufenag. (Hebrews 10:5; Matthew 3:13-17) Uw rogon e re dowef ni baaram ni immoy rok Jesus? Sogonap’an 30 e duw u m’on riy, ma aram me yog Gabriel ni engel ngak Maria ni gaar: “Bay mu diyen ngam gargelnag bochi pagel . . . ni Fak Got.” (Luke 1:31, 35) Ere, Jesus e ir be’ nib flont ni bod rogon Adam nni sunmiy nib flont. (Luke 3:38; 1 Korinth 15:45) Dariy e maruwar riy ni Jesus e ir be’ nib fel’ ni girdi’, maku dabisiy ni immoy rarogon Maria ni chitiningin rok ni ir reb e Jew.

Immoy soroben Jesus, ya aram bang ko yalen rok e pi Jew nib thil ngak piyu Roma. Faanra bay soroben reb e pumoon nib Jew, ma aram e ir be’ ni yima tayfan. Machane darur ted sorobrad nge n’uw ma yad ma guy rogon ni nge par nib beech yaan. Dariy e maruwar riy ni ma guy Jesus rogon ni nge par soroben nib beech maku ma puy ya nge par nib fel’ n’umngin, maku yima th’ab piyan lolugen ni nga i par nib fel’ n’umngin. Kemus ni yigoo pi Nazirite ni bod rogon Samson e aram e piin ni yad ma tay piyan lolugrad nge n’uw ndab ni th’ab.​—Numbers 6:5; Judges 13:5.

Ba chugur i gaman 30 e duw ni i maruwel Jesus ni ir reb e daiksang ni be rin’ boch e maruwel nder fanay e pi talin e maruwel ni bay e ngiyal’ ney ni ma fanay e gamig. (Mark 6:3) Ere, dabisiy ni ir be’ nib gel gelngin. Nap’an ni ka fini tabab ko machib, ma aram me yan nga lan e tempel ni yigoo ir, me “tuluf urngin fapi gamanman ngar chuwgad u lan e tempel, ni saf nge garbaw; me thikiy e tebel rok e piin ni yad ma thiliyeg e salpiy nge wer e salpiy rorad ni wasey u but’.” (John 2:14-17) Ba mudugil nreb e pumoon nib gel gelngin e rayog ni nge rin’ ban’en ni aram rogon. Ki fanay Jesus e re dowef ni baaram ni pi’ Got ngak ni nge lebguy e maruwel ni pi’ ngak. I yog ni gaar: “Dabi siy ni ngku gu machibnag u boch e binaw i yan fare Thin Nib Fel’ ni murung’agen e gagiyeg rok Got, ya ke l’ugeg Got ku gub ni ereray e n’en ni nggu rin’.” (Luke 4:43) Ba t’uf ni nge fanay Jesus gelngin ni nge milekag u but’ nga ga’ngin yang yu Palestine ni be machib.

Bochan ni Jesus e ir be’ nib gol mab fel’ e ngongol rok ko girdi’, ma dabisiy ni aram fan ni baadag e ‘piin ni ke aw parowrad i fek e n’en nib tomal’ ni ngar bad ngak. (Matthew 11:28-30) Bochan ni ir be’ nib gol, ma aram fan ni yag rok ni nge rin’ e n’en ni ke micheg ni aram e nge fal’eg laniyan’ e piin nib m’agan’rad ngay ni ngar motoyilgad ko  pi n’en ni be fil. Mus ko piin bitir ni yad baadag ni ngar chugurgad ngak, ya be gaar e Bible: “Me kunuy Jesus fapi bitir ngak.”​—Mark 10:13-16.

Yugu aram rogon nib gel e amith ni tay u m’on ni nge yim’, machane gathi ir be’ ni yugu ma par nib kireban’. Bod ni, immoy ba ngiyal’ ni un nga reb e madnom ko mabgol nni tay u Kana ma aram me pilyeg e ran nge ngal’ ni tin th’abi fel’ e wain. (John 2:1-11) Ku bay boch e madnom ni i un ngay ma aram me fil boch ban’en ko girdi’ riy ni par u lanin’rad.​—Matthew 9:9-13; John 12:1-8.

Ma bin th’abi fel’ riy e, machib ni i tay e aram e n’en ni ayuweg e piin ni ur motoyilgad ngak ni nge yag e athap ko yafos ni manemus ngorad. (John 11:25, 26; 17:3) Tomuren ni sul 70 i gachalpen mar weliyed boch ban’en nib manigil ni ke buch u nap’an e machib ni kar ted, ma aram mi ri “felfelan’” me yog ni gaar: “Nge felan’med ni fan e kan yoloy fithingmed nga babyor u tharmiy.”​—Luke 10:20, 21.

Pi tayugang’ ko teliw u nap’an Jesus e ur rin’ed boch ban’en u reb e kanawo’ nra k’aring e girdi’ ni ngar pininged e sorok ngorad, me m’ug ni yad e ba ga’ lungurad u puluwon e girdi’. (Numbers 15:38-40; Matthew 23:5-7) Machane Jesus e ba thil ko pi tayugang’ ko teliw nem, ya yog ngak e pi apostal rok ndabi “ga’ lungurad u puluwon” e girdi’. (Luke 22:25, 26) Bin riyul’ riy e, ginangrad Jesus ni gaar: “Mu ayuweged gimed rok e pi tamachib ko Motochiyel, ya yad ba adag ni nguu ranod ni ka ron’ed e mad nib n’uw, ma yad ba adag ni nguun siro’ ngorad ko gin ni bay e market riy.”​—Mark 12:38.

Jesus e ba thil ni bochan e der ma guy rogon ni nge gagiyel ni yugu ba thil u fithik’ e tin ka bay e girdi’. Bin riyul’ riy e, bay yu ngiyal’ nda un poy. (John 7:10, 11) Mus ko ngiyal’ ni yad fa 11 i apostal rok nra pared ni yad ba yul’yul’ ma kub mo’maw’ ni ngan poy u fithik’rad. Aram fan nnap’an ni yib fapi girdi’ ni ngar koled Jesus ni ngan fek ni ngan li’, ma aram me yan Judas ni ir e en ni yognag i faray owchen, ni aram e “pow” ni ke dag ngorad ni bochan e nge yag nra poyed.​—Mark 14:44, 45.

Ere, yugu aram rogon ni boor ban’en u yaan Jesus ndan nang, machane bin riyul’ riy e de taareb rogon yaan nga rogon ni bay u boch e sasing ni ke ngongliy boch e girdi’. Machane bin riyul’ riy e, kab ga’ fan rogon ni gad ma lemnag rarogon Jesus ko bin ni ngad nanged ko ri uw rogon yaan.

Rofen ni yog Jesus e pi thin ney e aram e rofen ni yim’ min k’eyag. (John 14:19) I pi’ e yafos rok ni nge “biyuliy boor e girdi’ ngay.” (Matthew 20:28) Dalip e rran nga tomuren, ma aram me faseg Got nga reb e dowef ni gathi ‘downgin e girdi’,’ ma aram me n’igin ni nge “m’ug” ngak boch i gachalpen. (1 Korinth 15:44; Acts 10:40) Uw rogon yaan Jesus u nap’an ni m’ug ngak pi gachalpen e ngiyal’ nem? Ba mudugil ni ke thil yaan ko ngiyal’ ni baaram ni immoy nib girdi’, ya mus ngak pi gachalpen nri yad ba chugur ngak ma de yag nra poyed. Maria Magdalene e lemnag ni ir be’ ni ma milay’; ma fa gali cha’ ni baaram ni gachalpen ni ur moyew u daken e kanawo’ ni yan nga Emmaus e ra lemnagew ni yugu be’ ni be yan.​—Luke 24:13-18; John 20:1, 14, 15.

Susun ni uw rogon ni ngad lemnaged yaan Jesus e ngiyal’ ney? Ba pag 60 e duw nga tomuren ni yim’ Jesus, ma aram min pilyeg e changar rok apostal John nge guy Jesus. De guy John yaan be’ ni ke yim’ u daken e kuruth. Ya guy e en ni ir e “Pilung ko pi pilung nge Somol ko pi somol,” ma ir e Pilung u Gil’ilungun Got, maku ir e en ni bayi gel ko pi kan nib kireb nge girdi’ ni yad e toogor rok Got, me tow’athnag e girdi’ ndariy n’umngin nap’an.​—Revelation 19:16; 21:3, 4.