Danwan Margaretwanqa * warmi wawanku familianwan visitarisqankumanta kusisqa kasharqanku. Margaretqa cocinera profecionniyoj karqa, jubilasqañataj. Payqa niraj ripushajtinku allchhisitusninman gustasqan mikhunata waykʼuyta munarqa, fideota ahogadoyojta, quesosniyojta ima.

Margaretqa mankata mesaman churaytawan tapararqa, tʼukullataj qhepakorqa, imaraykuchus mankapeqa ahogadituwan, quesollawan kasharqa. Margaretqa qonqarparisqa fideota churayta.

Mashkha watasniyoj kaspapis chayri imata sumajta ruwayta yachaspapis pantasunpuni. Imaraykuchus wakin kutisqa mana yuyaychakuspalla imatapis parlarparinchej chayri ruwarpanchej, manachayri imatapis qonqarparinchej. ¿Imaraykutaj pantanchej? ¿Imatá ruwasunman pantajtinchej? ¿Imata ruwasunman mana pantanapaj? Chayta yachanapajqa pantasqasninchejmanta maychus kajta yuyana.

Imatapis sumajta ruwajtinchejqa allinta ruwanki niwajtinchej kusikunchej. Wakin kutis mana reparakuspalla pantanchej chayri wajkuna pantasqanchejta mana reparankuchu. Chay kutispi mana wajkunata pantasqanchejmanta juchachanachu, ajinamanta llampʼu sonqo kasqanchejta rikuchisun.

Mana llampʼu sonqoyoj kajtinchejqa pantajtinchej mana pantanichu nisunman chayri pantasqanchejmanta wajkunata juchachasunman. Ajinata ruwajtinchejqa chʼampayninchejta mana allinchayta atisunmanchu, wajkunatapis ñakʼarichisunman. Pantasqanchejmanta chay rato mana ñakʼarejtinchejpis, yuyarikunanchej tiyan aswan qhepaman “sapa ujninchej ruwasqasninchejmanta Diosman cuentata” qonanchejta (Romanos 14:12).

Diosqa mana runas jinachu pantasqanchejta qhawan. Salmo libro Diosmanta “kʼacha khuyaj sonqo” kasqanta nin. Chantá nillantaj: “Mana tukuy kutichu kʼamiwanchej, phiñakuynintaj mana wiñaypajchu”, nispa. Diosqa yachan pantaj runas kasqanchejta, imaspichus pantayta atisqanchejta, yuyarikuntaj “jallpʼalla kasqanchejta” (Salmo 103:8, 9, 14). Diosqa khuyakuyniyoj tata jina. Chayrayku pantasqasninchejmanta pay jina yuyanata munan (Salmo 130:3). Munakuwasqanchejraykutaj Biblianejta mayta yanapawanchej, pantasqasninchejmanta wajkunaj pantasqankumantapis maychus kajllata yuyanapaj.

Wakinkunaqa pantarparispa wajkunata juchachanku chayri imatapis ruwarparisqankumanta mana juchayoj kasqankuta ninku. Chayta ruwanaykimantaqa wajpaj sonqonta nanachejtiyki “perdonariway” ninayki aswan sumaj kanman.  Ajinamanta chay chʼampayta allinchanki, amigosllapunitaj kankichej. Mana allinpi rikuchisunanpaj jina imatapis ruwajtiyki, chayri wajkunata mana allinpi rikuchinaykipaj jina ruwajtiykeqa ama qanllawantaj phiñakuychu, nitaj wajkunata juchachaychu. Astawanpis ruwasqaykita allinchanaykipaj kallpachakuy. Mana juchayojchu kasqaykita nejtiykeqa, problemasllata rikhurichiwaj. Aswan allin kanman pantasqaykimanta yachakunayki, allinchanayki, qonqapunayki ima.

Wajkuna pantajtinkoqa usqhayllata phiñarparikuyta yachanchej. Chayrayku may allin kanman Jesuspa yuyaychasqanta kasukuna. Pay nerqa: “Imastachus munankichej runas qankunapaj ruwanankuta, chayllatataj qankunapis paykunapaj ruwapuychej”, nispa (Mateo 7:12). Pantajtinchejqa wajkuna khuyakunawanchejta, perdonanawanchejta munanchej. Chayrayku wajkuna pantajtinkoqa noqanchejpis khuyakunanchej, perdonananchejtaj tiyan (Efesios 4:32).

Uj diccionario nisqanman jina wakin kutisqa, mana allin yuyayniyoj kasqanchejrayku, imallamantapis mana allinta yachasqanchejrayku chayri mana allinta uyarisqanchejrayku pantanchej. Ajinapitaj tukuy runas ima ratollapis rikukunchej. Jinapis Bibliaj yuyaychaykunasninman jina ruwaspaqa mana anchata pantasunchu.

Chay yuyaychaykunamanta ujnenqa Proverbios 18:13 versiculopi kashan, chaypi nin: “Manaraj allinta uyarishaspa imatapis kuticheyqa wampu kaymin, pʼenqaytaj”, nispa. Imatapis allinta uyarisun, kutichinapajtaj sumajta tʼukurisun chayqa, mana imatapis wajkunaj sonqonkuta nanachinapaj jina parlasunchu, nitaj phiñarparikusunchu. Imallamantapis allinta uyarispaqa mana wampu jina imatapis ruwarparisunchu.

Romanos 12:18 versiculopis kayta yuyaychallawanchejtaj: “Tukuy atisqaykichejta ruwaychej, tukuywan allinpi kausakunaykichejpaj”, nispa. Tukuywan allinpi, ujchasqataj kausakunapaj kallpachakuna. Trabajopipis wajkunaj allinninkuta maskʼana, respetana, allinta ruwanki nina, kallpacharinataj. Chaytaj wajkuna sonqonchejta nanachinawanchejpaj jina parlajtinku perdonanapaj yanapawasun. Jatuchaj imaspi pantajtinkupis kʼachamanta allincharqollasun.

Pantasqasninchejmanta mayta yachakusunman. Chayrayku imatapis ruwajtinchej chayri parlarparejtinchej, tʼukurina chay pantasqasninchej sumaj cristianos kanapaj yanapanawanchejpi. Ichapis necesitanchej aswan pacienciayoj kayta, aswan kʼacha kayta, aswan munakuyniyoj, sonqo tiyaykusqa kayta, munayninchejwan mana atipachikoj kayta ima (Gálatas 5:22, 23). Chaykunaqa yanapawasun qhepan kutipi imatachus ruwanapaj. Amataj anchata pantasqallanchejpi yuyanachu. Nitaj wajkunata pantasqanchejmanta juchachanachu. Uj problema kajtintaj allin kanman imallamantapis asirikunanchej chay problemata atipanapaj.

Yachanchej jina tukuypis pantaj runas kanchej, chayrayku noqanchej pantajtinchej chayri wajkuna pantajtinku ama chay rato phiñarpakunachu. Chantapis wajkunawan allinpi kasunchej, noqanchejwanpis. Pantasqasninchejmanta yachakusunchej chayqa, aswan allin yuyayniyoj kasunchej, wajkunapis chimpaykamuyta munawasun. Chantapis mana anchata llakikusunchu, nitaj yuyasunchu noqanchejpuni tukuy imamanta juchayoj kasqanchejta. Wajkuna mana pantanankupaj mayta kallpachakushasqankuta yachaspataj paykunaman qayllaykusun. Astawantaj Jehová jina wajkunata munakusun, perdonasuntaj (Colosenses 3:13).

Yachakorqanchej jina Margaretqa waykʼushaspa fideota churayta qonqarparerqa, jinapis familianqa waykʼusqanta kusiywan mikhurikorqanku. Chayraykutaj allchhisnenqa watas pasasqanman jina wawasninkuman chay pasasqanmanta parlarillarqankupuni. Ajinamanta yuyarikorqanku awelitusninkuwan khuska kaspa mayta kusirikusqankuta.