Don na Margaret * agbia ngbarago ho wiriyo aye ni na gari aborokporo ka bi yo. Ti regbo gayo yangara riahe, Margaret nangia bawene namangi riahe mbata apasi makoronya na kputakputa mamunya, nga gu riahe naaima ngba gbe ti agu atita ri naadu ue.

Fuo aboro sungu dunduko, Margaret aye na gi riahe re ki moihe rii mbisa. Wa ri adi he ngbaha, kina ngba ri naazere ka bi gupai nga kina pasipasi kputakputa mamunya naadu rogoho! Bangiri Margaret aima go ti gu he i naapasa ha na ni nga makoronya! *

Zanga bipa gu garã watadu gu inohe du boro na ni, ani dunduko namanga ingahe. Si rengbe ka du nga gba sa fugo watadu ka manga wenepai angianga ti wene regbo ya, watadu si rengbe ka du nga bangirani nigo ago. Tipagine aboro naamanga ingahe ti ni? Wai gu rengbe ani ka mangapai kuti ni? Ya mo boro rengbe ka he mangaha? Padu ani na ruru bipai tipa aingahe nika undo rani ani karagapai kuti agi asanahe re.

Ho ani amanga gupai ni du ni wenehe, ani nagbia tambuahe tipaha na ki bi gupai nga ani ima rẽ tipa ka dia gu tambuahe re. Ho ani amanga ingahe ni, ka si vura du nga ani naainongo ho te watadu kura aboro ainongo pai tipaha te, ya mo si aidanga ani idi pa gaani ingahe te? Ka manga gipai re naida boro du na umbasitise.

Ka ani aberãpa tirani ki susi, ani ima rengba ka ba pa gaani ingahe, ka bira kura boro tipa gu ingahe re, watadu ka ká ida gupai nga ani du ni mangi gupai re. Ngbatunga gi mangaapai re dedede naye na kina gbegberẽ sangbanaha. Gu kpakarapai re rengbe ka nye zanga i mbakadihe, na i rengbe kaa bira kina kura aboro tipaha. Ka ani mangi ingahe ani ki ni kaa neka asangbanaha awere, si naida ani tingidi gupai nga, ni yangaraha, “ani aríngbisa pa tirani aringbisa ti ni fu Mbori ni ba sa sa.”—ARomo 14:12.

Mbori na ruru bipai tipa aingahe. Rogo gu buku nga Atambuahe, i fura yo tipa Mbori ni gu boro du na “nunga aboro na inapai”; ko “aká nga kuti gako zinga kindi a te.” Ko ima inoho nga kpakpa aboro nga ani, na ko ima rugatiko na pa bororani, “ko natingida pa rani ya nvutu sende nga ani.”—Atambuahe 103:8, 9, 14.

Kurigure, wakina gu bagude du na nunga, Mbori nakpinyemu gupai nga, wa ngia ani awiriko, ani du na kina gako bipai tipa aingahe. (Atambuahe 130:3) Fugoko nafu dungu arugute gbiati arugapai tipa ka undo rani wai rengbe ani ka mangapai ho ani namangi ingahe ni na ho kura boro naingi ni kuti rani a.

Dedede, ho boro ni mangi ingahe ni, ni nadia regbo dunduko na gani ome kina kuti bira kura aboro tipa gupai boro ni mangihe watadu gumbaha. Ono Kuba gure, ka si du nga fugoro ni ima imisa kura boro, tipagine ka mo ahõnga mbupai ki mbakadi gaoni pagume ti ni ya. Ya mo mo mangi gupai  arunga ya si ki ye na tagbagapai dagba ro watadu kura aboro? Kuba gupai nga mo du na zinga watadu kaa bira kura aboro tipa gupai re, tipagine ka mo amanganga ome ka mbakada gupai re ti ni ya? Pa ka kuti gupai nga kura boro kia ni mangi gupai re rengbe ka sa zinga si naandu kina kumbatayo na gu kpakarapai re ki kii ni bakerehe. Kuba gure, mo wirikipai ti ni, ki mbakadi gupai re, ki ni mangi gupai si aida mo mangihe.

Ho kura boro amanga ingahe ni, si taata furani tipa ani mangipai ngba gu gene nayugo gupai nga rago ima gberã tirani. Si adu ni wenepai furani tipa ani pekefuo ga Yesu Kristo arugute ko agumbaha ki ya: “Agu apai dunduko oni akpi nyemu aboro nimangi he fu roni, oni nimángi kina ha fu yo a.” (Matayo 7:12) Ho mo amanga ingahe ni, zavura kere gbegberẽhe, si ni rengo nga mo naida aboro mangipai na mo rogo nunga watadu ka mbupai foro ti gamo ingahe. Tipagine ka mo amanganga ome ka yugo kina gu bangisa asino re ti ni fu kura aboro ya?—AEfeso 4:32.

Kura buku sakarogoapai yo naya, aingahe naye mbiko “iraira sarangbanga, zanga du na inohe, watadu zanga maaberãse fuo pai.” Si naida ani tingidi gupai nga, kura regbo kinaho ani nika mangapai amanga sa dagba agi apai re. Wa vura duhe wo, ani ima rengba ka zogosa bete manga aingahe ka ani wisigi agu arugute du rogo Ziazia Kekeapai yo.

Rugute sa dagba agu arugute re gu du rogo Asanza 18:13, nga gu naya: “Ka boro karagapai mbata fu gia pai, si nga pa mungo na zee fu ni.” Ni rengo, pa dia ani bete regbo ka rugatirani na agu arengo dunduko du tipa pai na ki ini wai ani ka karagapai ima rengbe ka undo rani ka ani gbanga sa fugo watadu ka mangapai zanga berãkuriihe ya. Pa dega ani turani wenengai tipa ka rugatirani na pai na nyanyakipaha tipa ka sarani ka ani mangingo iraira sarangbanga ya—na si nasarani ani bandatirani ti manga ingahe.

Kura arugute nga ga Ziazia Kekeapai naya: “Oni dú zezeredi na aboro dũ, kina ro tigamo ka si du wa ka mo mangi he.” (ARomo 12:18) Mo mangi bakere asadatise tipa ka sonosa gu toro nga ga zereda na giatise. Ti agu aregbo mo amangasunge na kura aboro, mo niberẽ payo na kini fu irisa fuyo, na mo ni aasadi ka fu tambuahe na ngarasaro fuyo. Ka ani aamangapai wa gere, bangiri aboro ima rengba ka go ti gu wiri aingahe ani amangaha zanga berãkuriihe watadu i ima rengba ka mbupai furani ti ni, na ka ani mangi kere ingaapai, ani ima rengba ka mbakada gupai re ngba wene gene.

Mo asadi ka ino gupai rengbe mo ka wirikaha ti gamo ingahe. Ku ba gupai nga kaa gbata gene tipa ka songoda gupai mo ni pehe watadu mo ni mangihe, mo bihe ni momu tipa ka sonosa wene asino rogo ro yo. Ya mo si naida mo du na zerangbaduse, wene sino, watadu zatise ti pai? Ya mo si naida mo du na zera, zereda, na nyemuse? (AGaratio 5:22, 23) Rogo agi apai re dunduko, mo ima rengba ka wirika gupai si aidanga mo mangihe berewe kumbatayo ya. Ka mo naamanganga pai zanga berã ku rogoho yo mbata ya, ka mo naaberãnga kina pa wai gupai re naimisi ro ya. Padu ani na nyemuse rengbe ka sarani ani zeresi zinga.

Padu ani na ruru bipai tipa aingahe nika undo rani ani mangipai wa sa ho ka si mangi ni. Ani nika du na zereda na tirani gbiati kura aboro. Ka ani asaditirani ka wirikapai ti gaani aingahe, ani ka da ni airatatamana na aboro ki idi na ani. Ani adunga na bakere gberãrago watadu kaa berã ni bakere tipa tirani te. Pa ino ani gupai nga kura aboro nasota na gayo aingahe kinawo a nika mbedisa rani koyo du yo ni. Gu susi gbe nga, ani ka gbia undo ti wirika ani wai Mbori ayugo nyemuse na pa wai du ko regerege ka vu aboro.—AKorosaio 3:13.

Ya mo gu ga Margaret ingahe ani nifura tipaha kusayo aima gbarasa pa gayo sungo nga ga aborokporo? Wagusa te. Aboro dunduko aima bihe ni wiri tooni pai, gbe Margaret, i ki ri gu riahe re kinawo zanga—makoronya! Rogo kura agarã naye kusa, agu atitayo re aima gumba pa gu riahe nga ga aborokporo re fu awiriyo na si ki tingidiyo na pa gu wene aregbo i adu wa sa na avunguyo. Nirengo, kungbo ingahe du gbua naadu!